Ep. 15 - Die onmoontlike "geluk" - Prof Anton van Niekerk

“Goue tafels, goue stoele en goue vloere kan seker soms geluk beteken, maar nie ’n goue dogtertjie nie.” Só reflekteer prof. Anton van Niekerk oor koning Midas se obsessie met geluk en goud, tot op die dag dat Marygold, sy dogtertjie, ook in goud verander. Prof. Anton het tydens die ringsitting van die Ring van die Paarl op 9 Oktober 2024 gepraat oor die ware betekenis van geluk. “Dit was een van daardie gesprekke wat nooit te lank sou voel nie,” beskryf een van die ringsleraars sy ervaring. In kort: Geluk is nie iets wat ons kan najaag of skep nie. Waar kom geluk dan vandaan? Luister gerus na prof. Anton se diskoers hieroor. Prof. Anton van Niekerk is ’n gerespekteerde Suid-Afrikaanse filosoof en akademikus, en was voor sy aftrede verbonde aan die Universiteit Stellenbosch, waar hy gefokus het op etiek, politieke filosofie en die filosofie van godsdiens. Sy navorsing het veral ’n impak gemaak op die etiek van gesondheid en biomediese kwessies, en hy het diepgaande bydraes gelewer oor die rol van moraliteit in die openbare sfeer. As skrywer en openbare intellektueel staan hy bekend vir sy genuanseerde beskouings en sy vermoë om komplekse temas op ’n toeganklike en relevante wyse te verwoord.