Jachen Prevost: «Jau hai lavurà clandestinamain»

43 onns ha Jachen Prevost lavurà en differentas funcziuns per RTR. El ha inscuntrà tranter auter Roland Kaiser ed è be per il nair da l’ungla mitschà da la mort. L’emissiun «Battaporta» da radio RTR era ils onns 1980 in labor. «Nus pudevan empruvar ora chaussas, nus eran fitg independents», di Jachen Prevost che ha cumenzà a lavurar tar RTR il 1983 en la redacziun da novitads. Ma ses grond giavisch era da far «Battaporta» – quai ch’el ha cumenzà a far clandestinamain, senza ch’ils superiurs savevan. Attentat da bumba Suenter la midada uffiziala tar la redacziun dal «Battaporta» saja el stà cuntentischem. Ma er Jachen Prevost ha adina lavurà per pliras emissiuns u redacziuns. Sper «Battaporta» e novitads è quai era stada la redacziun da sport. En quest connex è el stà il 1996 als gieus olimpics ad Atlanta ed è mitschà be per pauc da la mort. Sin in banc han el e collega Tona Poltera vis in satgados ed els èn chaminads vinavant. Forsa 200 meters pli tard hai dà in sfratg ed els han sentì l’unda da pressiun en il dies. Diagnosa Il 2017 è Jachen Prevost vegnì confruntà cun ina diagnosa ch’è stada in grond schoc: in tumor en il torax. In tumor betg uschè privlus, dentant in che pasava 3,8 kilos e che ha stuì vegnir operà. Il tumor vegn ad accumpagnar Jachen Prevost per vita duranta. Quel crescha adina puspè e cunquai dovra el er adina puspè terapias.