O Ateneo Ferrolán celebra o Ano Castelao cunha ponencia sobre a amizade entre Otero Pedrayo e Castelao

O Ateneo Ferrolán acolle hoxe ás 19.00 horas unha nova cita no marco do Ano Castelao, cunha ponencia titulada “Dous irmáns: Otero Pedrayo e Castelao”, a cargo da profesora e filóloga Patricia Arias Chachero, especialista na obra de Otero Pedrayo. O acto contará tamén coa participación das ferrolás Ánxeles Seoane, docente e coordinadora do Clube de Lectura do Ateneo, e Sonia Mauriz Pereira, colaboradora cultural e feminista. A sesión ofrecerá un achegamento á relación entre dúas figuras centrais do galeguismo, unidas pola amizade, a lingua e o compromiso coa cultura. O título da ponencia fai referencia ao vínculo fraterno que ambos compartiron, expresado en cartas e encontros, como o seu reencontro en Bos Aires en 1947. Esta actividade pon o broche de ouro a un ano de homenaxe a Castelao, que serviu para reivindicar o seu legado e o papel da xeración Nós na construción da identidade cultural galega.