O Dúplex Cinema de Esteiro cumpre 30 anos como referente do cinema independente e de autor en Ferrol

O barrio ferrolán de Esteiro celebra os 30 anos do Dúplex Cinema, un espazo singular para os amantes do cine. Inaugurado o 19 de xaneiro de 1996 pola familia Álvarez Rodríguez, naceu coa intención de ofrecer unha alternativa ao circuito comercial, centrada no cine independente e de autor. Tras unha renovación en 2019 baixo a xestión de Ramiro Ledo Cordeiro, consolidouse como referente do cine en versión orixinal e dunha programación diversa e coidada. Dende a reapertura pasaron preto de 100.000 espectadores e proxectáronse máis de 1.200 títulos. Coincidindo co aniversario, o cine amplía horarios con dúas sesións máis diarias e ofrecerá todas as proxeccións do 19 de xaneiro a 3 euros, grazas á colaboración de varias distribuidoras, reafirmando a súa vocación cultural trinta anos despois.