OSD 1T3- Agüerro

Buen día, bienvenius a la mía paúl. Soi José Dragón y este va a estar lo primer programa d'a tercera temporada. Acaba lo verano y empecipia l'agüerro, u sammigalada, que nos marca ya l'inicio d'o cambio enta l'hibierno. Ye lo tiempo en que los arbols se van quedando sin fuellas, los días s'alcuerzan y las nueitz se fan mas largas, entre que lo fredo abanza lentament. Dende Radio La Granja, 102.1 d'a F.M., en o Vico de San José, de Zaragoza, ciudat prisión. Felices suenios, prencipiamos!!!! In Your Dreams Tonight/ En os tuyos suenios esta nueit----------------------Agent_Orange (5:04) Per unatro costau, comentar-te que la mosica que va a ir sonando de fondo, ye un disco que estió gravau en 1991, de nombre Quartet, a cargo d'o gran pianista Herbie Hancock. Per lo que fa a las cancions que van sonando sueltas, si quiers, puetz consultar tanto lo conteniu d'o programa como la mosica que voi metendo en a ficha que amaneixe en Ivoox de conchunta con o podcast. Asinas, lo puetz escuitar quan quieras y, mesmo, participar en o programa...Cómo? Pus las formas son las mesmas que entre las dos temporadas anteriors: A primera, clamando a o programa en directo a nueu siet seis trenta y seis uitanta y ueito novanta y quatro; nueu siet seis tres seis ueito ueito nueu quatro Tamién, ninviando un mensache a o guasap almadeta osdd seis ueito nueu novanta y ueito zero seis vinte y siet; almadeta seis ueito nueu nueu ueito zero seis dos siet. Y, mesmo, por correu electronico, osueniododragon roba gmail.com, tot chunto y en minusclas; u si lo prefieres, en a pachina d'o mesmo nombre de Radio Patio Facebook. Decir-te tamién que he creyau un blog con o mesmo nombre, pero ya t'iré contando perque, de momento, ye encara en vimbres. Agüerro (con a variant agorrada ta referir-se a la temporada d'agüerro) ye un vasquismo relacionau con l'actual vocable vasco agor. A santmigalada u santmiguelada ye una forma derivada de San Miguel, y se refiere a la fiesta cristiana de Sant Miguel, o día 29 de setiembre, que marca popularment a rancanza d'a estación. Per extensión, s'aplica ta tot lo periodo d'agüerro. Bi ha d'agüerro un periodo d'una semana en o que la temperatura puya dica ta pareixer un día de verano. Ixe curto periodo gosa de conoixer-se como «veranet de Sant Martín». L'atro día, pa celebrar lo ranque de l'agüerro, salié a dar una tornada per Ciudat Prisión, tranquilament dimpués de minchar. Per cierto, que entre Chuanet, la uembra de Peter Pan, y la mía uembra, preparoron un delicioso guiso a pur de sampinyons y atras setas , que pa esta epoca de l'anyo creixen con abundancia en qualques zonas d'a mía paúl.A lo prencipio, se me fació raro poder pasiar sin antifaz ni mascareta, y qué grata estió la mía sorpresa quan veyié que per fin heban tornau a ubrir los parques, y que estes se tornaban a emplir de ninos y ninas correndo, chilando y fendo... lo nino; tal estió lo mío asombro que no podié reprimir un bosqueyo de riseta y, decamín, en dar-me cuenta, intenté desimular-la con un badallo...masiau tarde. Quan me querié dar cuenta dos babuinos de paisano, d'os quals se dedican a resacar a los mocicos y mocicas aburrius en os parques publicos, pa pinyorar-los per intentar divertir-se y asinas engrosar las arcas municipals, me veyió fer riseta y, ni curto ni perezoso se vinió enta yo, chunto a unatro que caminaba per astí buscando puntas de fumarro y m’espetó en a cara: desincuse-me, ixo que he visto en a suya cara, yera una riseta? No sé qué mecanismo se trencó en o mío interior pero unas ganas locas de redir a carcalladas fueron puyando dende las mías tripas, dica la mía boca que luitaba per remanir zarrada. No sinyor babuino, yera un cenyo de dolor, lo caixal d'o chudicio me ye matando, le dicié mientres unas grarimetas s'eslizaban per la mía cara. Seguro?, perque vusté sabrá que las muestras de goyo en adultos son estrictament prohibidas per l'Honorable Babuino Cabeza de Can. Asinas, como i hai tanta chent que sufre de tristeza, no se sentirá ofendida per lo goyo alleno. Qui quiera pasar-lo bien, que lo faiga en a suya casa y en silencio. Seguro sinyor Babuino Municipal, seguro. Bien pase per esta vegada, pero no quiero veyer rodiando per lo parque, vaiga a lo dentista u a fer lo que quiera que sía que fan los dragons. Cercule, cercule. M'aluenyé d'o parque, pensando que no heba sentiu charrar nunca d'ixa norma y, en ixe momento paré cuenta de bella cosa: En serio lo Babuino Municipal m'ha charrau en Dragonés?. Y, lo que ye mas important, habrá visto las fadas de colors que revolian a la mía arredol? Nota mental: Quan lo mío cuerpo astral torne a lo mío cuerpo fisico, he de preguntar-les a las uembras en qué parte concreta d'o pocino troboron las setas, y si quedaban muitas. La Sanmigalada-----------------------------------------------------------Grupo Val d’Echo (3:23) y hue, seguindo en a linia que levabanos en zagueras, te quereba charrar d'unatra luitadora per la libertat: Teresa Claramunt naixe en una familia de treballadors, en Sabadell, con un pai transuante que va tresladando a la familia conforme lo suyo treballo de mecanico amontador de filaduras le leva d'un costau a unatro. No va a la escuela, treballa dende muito nina y no recibe mas formación que la que los suyos uellos y una intelichencia preclara buscan. Aprende a leyer y escribir de mayor, compachinando la suya formación autodidacta con o treballo duro que desempenya pa poder vivir. Lo pai de Teresa estió alcalde de Balbastro, un d'os puestos an s’estió la familia; participó como coronel en as milicias d'a I Republica, la mai tiene un caracter fuerte y resolutivo. L'ambient familiar y la constatación d'o clima de sochuzgamiento d'a clase obrera d'a epoca, con a miseria que convive con un treballo sin tregua, mobilizan a Teresa en la luita obrera fendo d'a suya militancia causa de vida que no la abandonará nunca.Tasament complius los vinte anyos, se lanza a la primera escaramuzia. Estió una d'as liders d'a Huelga d'as Siet Semanas, reivindicando la chornada de diez horas, ya que s'abandonó la ideya de pedir las ueito horas per considerar-se utopica. Las condicions laborals yeran d'extrema penuria, coseta que fa entender la desasperación d'a clase treballadera. Facioron huelga once mil treballadors, i habió despidos masivos, detencions y estió lo Somatén qui acabó a sangre y fuego con l'aturo. S’apocó con un fracaso, pero la ratifica en o ideyario anarquista. Ixa huelga aconforma lo chenesi d'a suya luita posterior, creyando La Liga Anticlerical Montti Tognetti, con quantos companyers d'a mesma ideolochía. A partir d'astí, la vida de Teresa se desdobla en la luita sin quartel per aconseguir dreitos laborals, y la emancipación d'a muller. Funda la Sección Varia de Treballadoras Anarcolectivistas, mas tarde colabora con a primera asociación de feministas d'o estau, la Sociedat Autonoma de Mullers de Barcelona. Colabora con a publicación Humanidat Libre, an consona con Louise Michel, Emma Goldman, Rosa Lidón, y atras. En 1905 publicó un d'os primers folletos escritos per una obrera arredol d'a condición social femenina: La muller. Consideracions chenerals sobre lo suyo estau debant d'as prerrogativas de l'hombre, un texto de referencia d'o feminismo. Fuye a Portugal con o suyo hombre, an participa tamién de la luita anarquista, las continas detencions y la persecución d'o Somatén fan imposible la vida a la familia de Claramunt. A los dos anyos torna a Espanya, an succede l'atentau d'o Liceo, simbolo d'a burchesía catalana a la quala lo movimiento anarquista pretende escapezar. En dito atentau, l'anarquista Santiago Salvador arrulló dos bombas en a platea d'este teatro, causando vinte muertos y una gran cantidat de ferius. Se tractó d'una venganza per la execución de l'anarquista Paulino Pallás, que heba participau en l'atentau d'o cheneral Martínez Campos. Teresa fue immediatament detenida, pero no tardó en estar liberada perque no teneba cosa a veyer con l'atentau. En 1885 conoixe en Barcelona en un congreso a Juan Montseny (Federico Urales), pai de Federica, encetando una amistat con a familia que perduraría tota la vida. Dentra y sale d'a garchola de forma continada, dengún puede contrimostrar que participase en feitos violentos S’está en Barcelona y prencipia un tiempo d'actividat quasi clandestina de luita obrera con participación en mitines y conferencias, asinas como realizando articlos de prensa. La persecución a la quala ye sozmetida ye tremenda, a causa d'os tiempos convulsos que vive la Ciudat Condal, con os atentaus anarquistas, las condenas a muerte y la represión posterior. Dentra y sale d'a garchola de forma continada, dengún puede contrimostrar que participase en feitos violentos, pero la suya intelichencia y lo suyo discurso convincent le fan periglosa pa lo poder negro que campa en Catalunya en ixes anyos. Lucha, vive y sueña/ luita, vive y soneya--------------------------Ixuquera(3:08) Lo domingo siet de chunyo de 1896, se comete un atentau a lo paso d'a procesión d'o Corpus an mueren seis personas, Teresa no tiene cosa a veyer con l'atentau, manimenos ye aturada con o suyo hombre, Gurri, entre atros. Prencipia lo temiu proceso Monjuich, que zarra locals, engarchola a liders obrers y diezma lo movimiento anarquista. No i hai garra preba que apunte a lo matrimonio, pero les mantienen en prisión. Soledad Gustavo reconta: "lo que Teresa sufrió en aquell cativerio ye imposible d'imachinar. Endizcada y acazada per las monchas que interiorment cudiaban d'aquell establimiento, pasó muitos reconcomes y gracias a la suya enerchía podió salir lo millor posible d'assuyas mans... dentro d'a fortaleza y atrancada en un caixot pleno de miserias, sentindo los lamentos d'os quals en atras gayolas yeran sozmetius a torturas y con a horrible malsuenio d'o que sería pa ella lo manyana". Ixas terribles torturas le deixan racadas de per vida, fendo que la suya salut se resienta. En un tiempo se le produz una paralisi que le aparta de l'actividat politica, encara que siempre que puede y la suya salut le permite sigue de forma incansable la luita. Las presions internacionals fan que sía liberada pero le castigan a un distierro que cumple en París y Londres dende an contina l'actividat politica y periodistica. Torna a Espanya en 1889; funda un periodico poco mas tarde. La suya luita sigue decantando-se, tamién enta un feminismo militant. Deixo que sían las suyas parolas qui expresen la ideolochía que la moveba alavez: "En l'orden moral, la fuerza se mide per lo desembolique intelectual, no per la fuerza d'os punyos. Estando asinas, per qué s'ha de continar clamando-nos sexo feble? (...) Lo qualificativo pareixe que inspira disprecio; lo mas, compasión. No, no queremos inspirar tant despreciativos sentimientos; la nuestra dignidat como sers pensantz, como meya humanidat que constituyimos, nos exiche que nos intresemos mas y mas per la nuestra condición en a sociedat. En o taller se nos esclata mas que a l'hombre, en o fogar domestico hemos de vivir sozmetidas a concieto d'o tiraniello hombre, lo qual, per lo solo feito de perteneixer a lo sexo fuerte, se creye con dreito de convertir-se en reyezuelo d'a familia (como en a epoca d'o barbarismo) (...) Hombres que s’apellidan liberals los i hai sin conto. Partius, lo mas abanzau en politica, no faltan; pero ni los hombres per ell, ni los partius politicos abanzaus se preocupan lo mas minimo per la dignidat d'a muller". Ye conscient que nomás la educación liberará y equiparará a la muller en a sociedat. Lo suyo carisma y la suya analisi de l'actualidat van fendo la suya figura mas gran, ganando lo prestichio internacional a preto. Torno a deixar las suyas parolas que expresen las ideyas que le adornaban en aquells momentos: "Ixes anarquistas que deixoron d'estar-lo per tal u qual causa y ixes atros que han forchau un molde pa que d'ell salgan los anarquistas dreitistas y perfectos, me fan muita gracia. Yo deixé d'estar catolica, no per las barrabasadas de qualques capellans u chent catolica, sino perque en tener uso de razón comprendié que lo catecismo catolico yera muito inferior a la mía moral y a las mías aspiracions y encara que totz los catolicos isen buenos yo sería atea. Soi anarquista perque no podría estar d'unatra coseta, mientres lo mío organismo funcione con a regularidat que ha funcionau dica hue. Siento amor sin limites, y la infame sociedat actual mete debant d'o mío noble deseyo una cleta. Anhelo lo goyo, y solo dolor me rodeya. Deseyo la vida, y la muerte con a suya cara freda se presienta a la mía vista. Lo bello, lo gran, me fascina, y la muerte con la suya cara freda se presienta a la mía vista. Lo bello, lo gran, me fascina, y per tot arreu veigo fieruras, chiquezas y miseria. Amo lo treballo per estar fuent de vida, y a los quals treballamos nos rosiga l’anemia, las escaseces nos agobian, lo hespital ye nuestra recompensa. Creigo posible una sociedat mas chusta, mas bella, mas humana, que hemos dau per clamar la sociedat anarquista, acrata u libertaria, perque estes nombres significan no autoridat, base primordial de tota tirania; per ixo soi anarquista, acrata u libertaria". Teresa sigue la suya luita encara que la suya mermada salut le impide fer tot lo que anglucia, la suya figura tiene prochección internacional estando consultada per personaches importants del'anarquismo mundial, como Emma Goldman que viene a veyer-la a Barcelona. La suya luita contina pero la suya fuerza s'amorta, morindo lo día once d'abril de 1931. Lo suyo funeral se realiza en día catorce d'abril, chusto quan s'anuncia la II Republica. A lo paso d'a chent d’o intierro, totas las banderas s'inclinan debant d'o atabul de Teresa Claramunt, se da la zifra de 50.000 asistents a l'enrueno. Tenió, amás cinco fillos, que murioron totz. Fació d'a suya vida una entrega chenerosa a lo ideyario anarcosindicalista y la liberación d'a muller. Luchar/ Luitar---------------------------------------------------------Accidente (1:57) Este poema fue escrito en diciembre de 1911, por James Oppenheim, un poeta y activista afiliado al sindicato combativo IWW (Industrial Workers of the World). Hay muchas historias sobre el poema de James Oppenheim. Muchas versiones apuntan a un discurso pronunciado por la sufragista y activistas por los derechos de las trabajadoras, Helen Todd, que habló por primera del pan y las rosas: "Pan para todas, y rosas también". El poema, recitado y transformado en canción, se transformó en el símbolo de la huelga de Lawrence de 1912, conocida como la huelga de Pan y Rosas. PAN Y ROSAS Pan y Rosas Entre que imos marchando, marchando a traviés d'o fermoso día Un millón de cocinas foscas y milars de grisos filanderías Son tocaus per un radiant sol que acucuta de rapiconté Ya que lo Pueblo nos siente cantar: Pan y rosas! Pan y rosas! Mientres imos marchando, marchando, luitamos tamién per los hombres Ya que ells son fillos de mullers, y los protechemos maternalment unatra vegada Las nuestras vidas no serán esclatadas dende la naixencia dica la muerte Los corazons padeixen fambre, igual que los cuerpos nos den pan, pero tamién nos den rosas! Mientres imos marchando, marchando, innombrables mullers muertas Van chilando a traviés de nuestro canto lo suyo antigo reclamo de pan Los suyos espritos fatigaus conoixioron lo chicot arte y l'amor y la belleza Sí, ye per lo pan que peliamos, pero tamién peliamos per rosas! A medida que imos marchando, marchando, trayemos con nusatras días millors Lo devantamiento d'as mullers significalo devantamiento d'a humanidat Ya pro de l'angunia d'o treballo y d'o chandro: diez que treballan pa que un repose Queremos compartir las glorias d'a vida: pan y rosas, pan y rosas! Las nuestras vidas no serán esclatadas dende la naixencia dica la muerte Los corazons padeixen fambre, igual que los cuerpos pan y rosas, pan y rosas! James Oppenheimer, 1911 Bread and Roses-----------------------------------------------------------------Judy Collins (3:05) Bread and Roses------------------------------------------------------The Radcliffe Pitches (4:17) Y, pa ir acabando lo programa, imos a veyer bella mica d'o vocabulario que ha amaneixiu en o programa de hue, y la suya traducción a lo castellán. Astí va Paúl/ pocino/chamarcal/entibo/ parata/paranza----------------------------pantano. Vimbres/ verducos-------------------------------------------------------------mimbres. rancanza/ ranque---------------------------------------------------------------Inicio, arranque. apocar-se------------------------------------------------------------------------Saldarse. consonar-------------------------------------------------------------------------Coincidir. caixot/gayola/garchola---------------------------------------------------------Calabozo. racadas----------------------------------------------------------------------------Secuelas. fiero/a---------------------------------------------------------------------------Fea/o. anglucia--------------------------------------------------------------------------Ansia. chent d’o intierro---------------------------------------------------------------Cortejo fúnebre. acucutar-se-----------------------------------------------------------------------Asomarse rapiconté-------------------------------------------------------------------------Deprisa y corriendo. chandro---------------------------------------------------------------------------Holgazán. galbana---------------------------------------------------------------------------Pereza. badallo----------------------------------------------------------------------------Bostezo. resacar/enrestir/encorrer/engalzar/ atosegar/atabulxar/arrunzar-----------Acosar fer riseta---------------------------------------------------------------------------Sonreír cenyo-------------------------------------------------------------------------------Mueca. rodiar-------------------------------------------------------------------------------Merodear. Y, por agora, iste ha estau o suenio de hue. Ya sabes que, si t'ha feito goyo, t'aspero o proximo mierques en Radio La Granja, en o 102.1 d'a FM. Entremistanto, nos veyemos en os suenios, nos ascuitamos en la Radio. Salut y emparo mutuo!!!! Seek and Destroy/ Buscar y destruyir-----------------------------------Agent Orange (4:26)