Zavala presenta “Corvo Negro”, o primeiro adianto do seu terceiro disco, máis cru e reivindicativo ca nunca

A banda Zavala vén de presentar “Corvo Negro”, o primeiro adianto do que será o seu terceiro longa duración, LUME, previsto para 2026 baixo o selo Ferror Records. Neste novo traballo, o grupo intensifica e potencia o seu son, afondando nunha paisaxe musical máis crúa, eléctrica e escura. O single chega cun ton directo e reivindicativo, cunha mensaxe clara contra os lumes forestais e a explotación eólica, sen concesións nin artificios. A nivel sonoro, “Corvo Negro” constrúese a base de guitarras potentes, electrónica cunha cadencia máis industrial e unha atmosfera opresiva que medra progresivamente ata estoupar. O tema funciona non só como carta de presentación do novo álbum, senón tamén como un aviso das intencións artísticas e discursivas dunha banda que aposta por un son máis contundente e comprometido.