【Zip噏劇場】Game of Eden 第二季 「小島篇」#101《蛇變（上）》

時間：180年9月23日 地點：封閉區域Area DB Island α島 旁白：（讀白）上回提要 - 阿達、盧綠、黑烏鴉盧天、白烏鴉盧地、擁有第一世盧如記憶嘅盧婷、擁有第一世盧零記憶嘅盧葦喺α島上面同今敏商討封閉區域Area DB Island未來之際，α島附近嘅海域出現湧浪，半人半魚怪物形態嘅凱安由海入面跳上α島，跟住一身太空衣裝束嘅裘雪連同K Area DB Island同時出現，眾人大感驚訝... Zip噏劇場 Game Of Eden 第二季 小島篇 第101回「蛇變」 旁白：時間回到180年9月22日，地點 - 封閉區域Area DB Island 百草園 裘雪：阿綠同玄武童子出海都一段時間...觀星閣修復嘅工作有仁叔睇住...所以我就出海到百草園...希望可以收集藥材，希望醫好凱安嘅怪病... 凱安自從喺村長選舉飲咗靈魂之水之後，身體開始出現奇怪嘅情況...佢不斷發燒...卧床不起...皮膚竟然生出魚嘅鱗片…我整走一塊佢就生返一塊…呢個情況真係從未見過…觀星閣嘅書籍都從來無提及過呢種皮膚疾病...所以我只好到百草園盲目咁尋找草藥... 當我採摘惡夢蘑菇，希望減輕凱安痛楚嘅時候... 我竟然聽到… *蛇叫聲效 裘雪：百草園只係得各類昆蟲…而蛇亦只會喺千獸島出現…點解呢度會有蛇呢？ 仲有…呢條蛇嘅頭上面有啲奇怪嘅符文…我從來無見過呢種蛇！ 不過唔緊要，蛇膽都係藥材嘅一種，所以我決定活捉佢！話唔定對凱安嘅病有幫助！ *拔出匕首聲效 *蛇快速移動叫聲效 裘雪：哎喲！我唔夠佢快！被佢咬到隻手！ *斬殺蛇聲效 裘雪：雖然我一刀解決咗佢，但佢對牙好有力...傷口好深...更呈瘀黑色…啲毒上得好快…我個腦…聽到好多怪聲啊！呢啲係咩聲嚟架？ *數據傳送聲效 裘雪：我...個頭好痛...我...頂唔順啦... *暈倒地上聲效 裘雪：（暈倒剛醒）太陽喺正頭頂...依家應該係1至2點嘅時間...即係我暈咗成2至3個鐘...？要快啲去搵草藥比凱安先得... 但係...點解...我眼前嘅景色變晒做一點點嘅？啲花草樹木全部都係墨綠色碼！而嗰條有奇怪符號嘅蛇就係墨綠色加灰色碼！而我對手仲有我嘅身體竟然有三隻色！唔通係中蛇毒嘅症狀？ *傳送門聲效 K Area DB Island：唔係中毒，而係改變緊你嘅身體結構啫 裘雪：（驚恐）你…係邊個！點解你得灰色碼架？點解你會無端端喺我眼前面出現架！ K Area DB Island：條蛇嘅頭上面有「ᚨ」（音：Ansuz）同「ᚲ」（音：Kenaz）嘅盧恩符文，分別代表知慧、知識同創造。裘雪你被佢咬到，應該會醒咗好多架？唔同程式出錯？ 裘雪：等等…只係我啱啱蘇醒，頭腦一時未運行得順暢啫。 K Area DB Island：裘雪你被呢條蛇咬中，真係最好嘅安排啊！ 裘雪：我嘅大腦雖然被激活咗好多...但有啲事件...我仲未好清楚... K Area DB Island：咁我將本身只得村長先可以得到嘅創世資料傳入你大腦，咁你就會知道呢度180年嚟發生嘅事。 *資料傳送聲效 裘雪：（苦笑）哈哈...哈哈...即係...我地裘氏一直以嚟無論點樣推算...玄武大帝都唔會出現...我地所做嘅一切，都只係徒勞無功... K Area DB Island：都唔係徒勞無功，至少你地裘氏比我睇到人類智慧同科技嘅成長。 裘雪：你依家嘅外貌，同我地裘氏第一代嘅廟祝好相似...以我嘅估計，你以第一代廟祝嘅身份，教授我地裘氏各種基本嘅科學、天文、地理嘅知識... K Area DB Island：無錯，但你地嘅進步，尤其係你嘅成長，令我大為驚喜，所以我先會話你被知慧、知識同創造嘅蛇咬到，係最好嘅安排... 裘雪：我地裘氏一生就係求知...但原來知道真相之後....反而係咁失落... K Area DB Island：點會失落啊？你依家係全個封閉區域最強嘅大腦！你要肩付起推進呢度文明發展嘅責任啊！ 裘雪：有意思咩？ K Area DB Island：嚟！跟我嚟！ *步行聲效 裘雪：人工智能 K Area DB Island帶咗我去百草園中西邊嘅一個山洞嘅洞口...呢個係百草園最大最深嘅山洞...我稱呼佢做怪石洞... K Area DB Island：裘雪，我知你經常入去呢個山洞度探險，你有啲咩發現？ 裘雪：入面有好多各式各樣奇怪嘅石頭，我會帶返去觀星閣，用火燒佢地，跟住就發現唔同石頭會燒出唔同嘅顏色... K Area DB Island：除咗有各式各樣嘅石頭呢？ 裘雪：喺最深處嘅石面，會有啲黑色好濃稠嘅液體或者半固體...我叫佢地做瀝青。我曾經收集佢地，發現佢地除咗可以取代平時用開嘅鯨魚油或者動物油脂去做油燈之外，仲發現佢喺起石磚屋嘅時候，可以成為好好嘅粘合劑 K Area DB Island：咁你知唔知呢個山洞嘅地下，其實有好多寶藏呢？ 裘雪：人工智能一講完，佢就喺背後拎咗一個好尖啲鐵鋤頭，好大力咗向地面一鋤！跟住就有啲黑色嘅液體喺地底度噴出嚟！ *噴液體聲效 裘雪：喂！呢啲黑油好形易著火架！ K Area DB Island：就係因為佢易燃，所以先有用。而呢啲黑油叫做石油。喺現實世界嘅歷史，出現好多關於石油嘅爭奪及戰爭。不過，由於盧零創建呢個地方，只係想大家喺度舒舒服服同安穩咁過日子，文明設定定為農業社會、漁村嘅時代。 裘雪：你咁做係想證明啲咩呢？ K Area DB Island：想證明呢個地方嘅可能性！今敏佢係一位作家，所以佢嘅樂趣係編寫同觀察呢度每一個靈魂嘅決擇。不過，好在有盧零嘅一句 - 希望呢度同現實世界一樣！所以我就可以按現實世界有嘅天然資源放喺呢個封閉區域度啦！而我係一個以科學、創造為基調嘅人工智能！所以，我就放咗好多隱藏嘅心思喺唔同地方，希望村民，尤其係裘氏嘅後人可以察覺同感受到！ 裘雪：咁...點解你唔現身，去親自教導我地？ K Area DB Island：因為我只可以監察，並唔可以打擾你地嘅運作。今敏只準許我做第一代廟祝，簡略地傳授最基本嘅天文、地理、科學嘅智識比你地。我好想帶領你地由農業社會一步一步走去工業革命！但今敏話唔需要...否則...我嘅下場就會好似希臘神話嘅普羅米修斯一樣... 裘雪：但你依家現身，話比我知石油呢個燃料，唔怕今敏會責怪你？ K Area DB Island：因為「蛇變」計劃已經開始，我負責指導蛇變村民嘅角色，所以我終於可以喺你面前展示「電」啦！ 裘雪：電？天上嘅電？你可以將天上嘅電拎嚟用？ K Area DB Island：雖然你被知慧、知識同創造嘅蛇咬到，係最強大腦，不過未有豐富嘅知識，等我依家展示比你睇，現實世界人類文明向前一大步其中一樣不可或缺嘅物質 - 電！跟我過嚟啊！ 裘雪：（讀白）人工智能帶咗我去百草園最高嘅平原 K Area DB Island：裘雪，你會用指南針係咪？咁你知唔知當中原理？ 裘雪：就喺呢度嘅引力，引導特定嘅金屬永遠指去某一個方向。 K Area DB Island：嗰種引力就係磁力。 裘雪：人工智能講完之後，就憑空變咗一個有手臂咁長嘅鐵棒 K Area DB Island：裘雪，唔好意思，因為時間關係，我只好用我嘅能力憑空去變需要嘅用具出嚟...呢個係純鐵嘅鐵棒。 裘雪：純鐵？ K Area DB Island：即係你搵到嘅奇特礦石，用高溫加熱，去除所有雜質而得到嘅純鐵。跟住呢度有銅線，你幫我將啲銅線圍住鐵棒綁實！ 裘雪：哦...知道... *大風吹聲效 *醞釀行雷聲效 裘雪：我按人工智能指示做去做嘅時候，佢就不斷向天空指劃咗幾下... K Area DB Island：古人以為天神發嬲，所以會有狂風雷暴，但當人類越嚟越了解大自然，就會知道一切都係自然現像。但喺呢個封閉區域，我同今敏就有能力去控制一切。而我今次就為你而緊急整一道雷電出嚟！好似之前村長選舉，盧綠叫我幫佢用雷擊向嗰棵樹！ *行雷聲效 裘雪：人工智能一講完！就開始風雲變色！天空開始行雷同閃電！ K Area DB Island：嚟！裘雪，將枝繞咗銅線嘅鐵棒插喺呢度！你知閃電會比較易閃中較高嘅物件架啦，係咪？ 裘雪：係... *行雷聲效 裘雪：人工智能一講完，天上嘅閃電就一下打中咗嗰個鐵棒！ K Area DB Island：你喺附近搵到可以做指南針嗰枝針嘅礦石，都因為天上嘅閃電擊中石頭，令佢地產生磁力。而我啱啱嘅做法，就係一種利用自然力量而得到嘅人工磁石。之後就... 裘雪：人工智能又拎咗一個放風箏嘅線碌。 K Area DB Island：呢個線碌繞住嘅都係銅線。 裘雪：咁銅線延伸按駁住嘅呢一個透明圓形係咩物件？入面好似有鐵線？ K Area DB Island：係燈泡。現實世界1801年，英國化學家漢弗里·戴維將鉑絲通電發光，之然展開咗電燈嘅競賽。裘雪，你將人工磁石係線碌中間不斷快速穿插啊。 裘雪：係嘅... K Area DB Island：呢家嘅烏雲未散，啱晒做呢個實驗。 *燈通電聲效 裘雪：（讀白）當我不斷將人工磁石喺線碌中左右穿插...嗰個叫做燈泡嘅物體竟然發光！ K Area DB Island：人類多年以嚟發現生物電、靜電、磁力到電力用咗咁超過5千年嘅時間。裘雪，你覺得你地喺呢個封閉區域Area DB Island，要用幾多年先可以發電，推進文明呢？ 裘雪：我...唔識答... K Area DB Island：你依家已經係呢度嘅最強大腦，我會指導你，等你喺度享受科學嘅樂趣！ *提示聲效 裘雪：（讀白）人工智能喺空中投射出啞鈴洲嘅地圖，而其中一點發光。 K Area DB Island：追縱到另一條蛇嘅座標...裘雪，我處理埋呢個事件，跟住再搵你。 裘雪：等等啊人工智能...地圖上發光嘅地點...係凱安嘅屋企！ K Area DB Island：兩位蛇變嘅村民分別係凱氏同裘氏嘅後人，唔通呢個就係今敏成日講嘅命運！ Zip噏劇場 Game of Eden 第二季 小島篇 第101回「蛇變（上）」 Harry 飾演 裘雪 Alton 飾演 人工智能 K Area DB Island 編劇及製作 阿攝音樂 BEAT FRIDAY (Nutty, Fairness, Minty, Somewhere, Round and Round)封面設計 Followmelikeblack Leave a comment and share your thoughts: Powered by Firstory Hosting