【Zip噏劇場】Game of Eden 第二季 「小島篇」#103《蛇變（下）》

上回提要：被知慧、知識同創造嘅蛇咬到嘅裘雪，得知啞鈴洲創世資料之後，成為最強大腦，正當人工智能K Area DB Island想傳授所有科學知識比佢嘅時候，發現另一條蛇身處凱安家中。原來凱安被巨人、正義、新的開始嘅蛇咬到，基因被改造，加上村長選舉嘅時候飲咗靈魂之水，身體變成半人半魚嘅怪物。村民以為凱安受到玄武大帝懲罰，所以向佢攻擊...最後凱安選擇逃入深海...其後不見縱影... 時間：180年9月22日 地點：封閉區域Area DB Island東堤海岸沙灘 裘雪：人工智能...呢個好厚同好重嘅盔甲...係屬於咩時代嘅科技？ K Area DB Island：係現實世界最新嘅科技。海洋一直係人類好想探索嘅地方，不過因為水壓、氧氣、光度嘅問題，令人類無辦法潛入海底。而隨著科技嘅進步，人類創造潛水艇，希望深入海底世界。暫時載人潛水艇最深嘅嘅紀錄係接近11000米。 裘雪：咁點解你唔整艘可以潛入水底嘅船，而係比呢個盔甲我？ K Area DB Island：呢個潛水衣係由我封設計，可以抵受水深1000米嘅壓力，提供約1小時嘅氧氣，可以比你同我一齊去搵凱安。 裘雪：凱安徒手潛水最深都只係可以潛到120米 K Area DB Island：但佢魚人嘅狀態...可能真係可以去到啞鈴洲1000米嘅海底... 裘雪：啞鈴洲水深有1000米！？ K Area DB Island：如果按照現實世界，最深都可能只係100-120米，不過既然盧零同今敏無限制我，我就創造咗一個非常壯麗嘅水底世界！ 裘雪：（讀白）我按照人工智能嘅指示，著上呢一身雪白嘅潛水盔甲...盔甲嘅琉璃非常清澈，透光度極高，頭盔上鎖後以後會好焗...但清新嘅空間慢慢注滿整個密封嘅盔甲。 K Area DB Island：呼吸無問題？ 裘雪：（面罩內）好順暢 *全知狀態聲效 K Area DB Island：（全知狀態）你喺蛇變後嘅身體，可以直接用大腦訊息同我對話 裘雪：（全知狀態）呢個...又係咩科技？ K Area DB Island：（全知狀態）係腦部開發嘅技術，我地稱呼為全知狀態。不過我無時間解釋，要行啦！ 裘雪：（讀白）著咗盔甲嘅我...慢慢跟人工智能行入海度...再開啟埋盔甲外嘅推進器...就出發去搵凱安。阿安...你要等我啊... *踏步行入海水聲效 時間：同日 地點：啞鈴洲東面海域 凱安：（讀白）118…119…120…121…125…130！！！我...我又再破咗凱氏家族徒手潛水嘅記錄！！！可以去到130米！！！而最大唔同嘅係！我之前係閉氣潛水！依家我可以喺水底呼吸！仲有！唔駛戴阿雪整嘅潛水護目鏡，對眼都可以好清晰睇到水底嘅環境！！！ 我真係前所未有咁暢快！！！ 原本我呢段時間身患怪病...心情好差...被條怪蛇咬到之後仲變成半人半魚嘅怪物！被村民唾棄！我不斷係度諗...係咪玄武大帝懲罰我！所以先令我退化成為怪物盧亭呢！但我依家可以喺深海度生存！我反而覺得係得到玄武大帝嘅垂青！賜我呢種特別嘅力量！等我可以完成凱氏家族終生嘅任務 - 就係去搵九頭海蛇被封印嘅位置啦！！！ 大凶日嘅出現一定係同九頭海蛇有關！我唔等盧綠同玄武童子啦！我一個人解決九頭海蛇！！！ *水流聲效 170…180..190…200米！ 200米嘅水底，已經接近無陽光可以滲透落嚟，我眼前接近全黑... *全知狀態聲效 但當我深呼吸，集中精神喺對眼嘅時候，我嘅對眼嘅感光度又大大提高咗！同埋我好似可以感受到50米範圍內水流以及各式各樣生物嘅氣息同情況...就好似... *鯨魚聲效 有一條非常兇猛嘅殺人鯨魚喺我身後向我快速衝緊過嚟！！！以前我會靜止呼吸！扮死！希望逃過佢嘅攻擊！但依家嘅我或者有力同佢一戰！所以我擰轉身！瞪大雙眼望實佢！！！伸出右手！準備以寸刺向佢攻擊！ *鯨魚聲效 原本張開口露兇尖齒嘅殺人鯨喺我寸刺掂到佢前急停！最外層係綠色碼，中間係灰色碼，最內層係紅色碼嘅佢發出啲叫聲...佢好似傳遞緊一個訊息 - 就係對唔住...我錯啦... 我收返攻擊嘅右手，轉為輕撫佢...跟住腦入面幻想出捉住佢嘅魚鰭，等佢帶我潛入深海嘅畫面，點知佢又對我叫 *鯨魚聲效 「我可以捉住你，跟住你走？」 *鯨魚聲效 我感覺到佢答我可以，所以我就捉住佢嘅魚鰭，然後指示佢游去更深嘅位置！ *鯨魚聲效 *水流聲效 400…450…500！我捉住殺人鯨嘅魚鰭深潛到去500米嘅位置！而我無任何呼吸困難！正當我想同殺人鯨再潛深啲嘅時候，有一條長成10米嘅巨形白色物體係我地身邊經過！我再細心一睇！原來有一條好長好長嘅魚！佢全身白色，魚頭有6條絲狀嘅長鰭條，腹部都一樣！呢種魚我地叫做皇帶魚，但平時好少見到...而最長只係得3米...原來可以去到10米咁長！ *水流聲效 殺人鯨再帶我游落更深嘅位置！跟全前面有啲微光...原來係一隻有人頭咁大嘅魚，但佢魚頭前面吊住一個會發火嘅波子咁，十足十螢火蟲嘅尾部。我捉住呢一條發光魚做燈，照一照附近嘅水域，然後就發現水深700至800米嘅位置有好多巨型水母係度浮下浮下！而每一隻水母反射緊嘅光都唔一樣！紅、橙、黃、綠、青、藍、紫乜顏色都有！跟住亦有游得極慢嘅巨型墨魚，佢全身透明，對眼好似阿雪整嘅小型望遠鏡咁，對眼凸晒出嚟！ 然後...我同殺人鯨一同靜止唔郁...因為...有一條5米長嘅巨型鯊魚...喺嗰堆水母度游過...佢對眼比淺水區嘅鯊魚混濁...然後...佢嘅表皮竟然可以發出微微嘅藍光！佢喺發光水母群度慢慢游走，撞到水母之後，水母群帶住各式各樣嘅光芒喺碰撞嘅一瞬間散開，好似喺水底欣賞煙花咁！呢個奇景！好想阿雪同阿綠都睇到！ *鯨魚聲效 *水流聲效 殺人鯨再帶我潛入更深嘅地方...呢度至少有1000米！我腳踩住1000米海底地面，呢種腳踏海底嘅感覺...好神奇...多謝玄武大帝賜我呢個能力！ *鯨魚慘叫聲效 *咬肉聲效 *凱安痛叫 啊！！！有啲不明嘅生物喺海藏度走出嚟！佢地好似鰻魚咁！有長長嘅身體！魚身有七個腮！而最怪嘅係佢地嘅圓形嘅口一張開！有好多倒鈎嘅牙！十幾條七腮鰻魚咬實殺人鯨！佢不斷流血！而另外十幾條就咬實我啲手手腳腳！我好似被佢地吸緊我嘅血咁！ 我唔可以比殺人鯨有事！所以我用力扯走咬喺佢身上嘅七腮鰻魚！點知其中一條衝去我嗰口度！我感受到佢嘅速度同位置，所以側一側閃避！再一口咬實魚身！ *電流聲效 原來佢身體會發電！我但強忍！硬生生咬斷咗佢！ 而咬住殺人鯨嘅七腮海鰻聞到同類嘅血味，就一下子衝晒去我度！我被廿幾條咬實唔放！我曲一曲膝，跳起，再快速自轉！用呢一下旋轉嘅衝力揮走晒佢地！忍住被佢地放電嘅痛楚！逐一將佢地一分為二！ 解決晒佢地之後，我游返去殺人鯨度，但原來佢已經滿身傷痕...血流不止...已經感受唔到佢生命嘅跡象... 殺人鯨...多謝你帶我嚟到深海1000米嘅世界... *水流聲效 我剛才太肚餓...所以將嗰十幾條會發電嘅七腮海鰻吞咗落肚，然後貼住海床極速游走！希望可以搵到九頭海蛇封印嘅位置！ *水流聲效 但成個啞鈴洲海域咁大！觀星閣嘅文獻又無確實記載座標...我依家就好似一隻盲頭烏蠅咁，盲目去搵！ 我瘋狂咁游！將感知嘅狀態提升到極限！完全無放過海床上面任何異常嘅動靜，可惜！我都係搵唔到任何痕跡...直到...我想再向前游嘅時候... *撞牆聲效 *凱安痛叫 點解...我面前會有一度透明嘅牆擋住我嘅去路嘅！唔通...九頭海蛇就係封印咗喺入面？一諗到呢點，我就用力不斷打呢度透明嘅牆！！！ *用力打牆聲效 裘雪：（聲音由遠到近）阿安...阿安...阿安...你唔好再打啦...阿安！你唔好再打啦！ 凱安：阿雪！點解你可以喺水底度出現嘅！你著住呢件係咩衫嚟架！？ 裘雪：阿安，我地上水先再慢慢解釋你知啊！ 凱安：仲有，點解我地可以咁樣溝通到嘅？ K Area DB Island：除咗村長之外，被嗰兩條特別嘅蛇咬到嘅你地都可以擁有全知狀態，然後用心靈去溝通 凱安：你又係邊個？點解你身上嘅顏色比我地少？同埋你都可以喺水底呼吸嘅？ 裘雪：阿安，我呢件潛水衣嘅氧氣得返好少，不如我地上咗水再慢慢解釋你聽啊！ 凱安：雖然我唔知你地兩個點解可以喺度出現，但阿雪！你摸唔摸到呢度牆壁啊！我懷疑九頭海蛇就封印咗喺後面！你睇下，我受到玄武大帝嘅恩賜！得到呢個身體，可能就係想我親手解決九頭海蛇！咁樣就永遠唔會再有大凶日！我地個個都可以繼續安全生活啦！ 裘雪：阿安！跟本就無九頭海蛇，亦都無玄武大帝...我地...我地係... K Area DB Island：你地係被創造出嚟，喺呢個叫做Game of Eden遊戲入面嘅封閉區域所生活嘅數碼靈魂。 凱安：我都唔知你地講乜！我淨係知道我嚟呢度嘅目的得一個！就係殺咗九頭海蛇！ *用力打牆聲效 裘雪：阿安！你唔好再打啦！後面係乜野都無！因為呢度就係啞鈴洲嘅邊界位置啊！ *用力打牆聲效 凱安：我依家就證明比你睇！！！ *用力打牆聲效 *玻璃輕微破痕聲 K Area DB Island：防火牆竟然會出現裂痕...凱安！你停手！ 凱安：啊！！！ *用力打牆聲效 裘雪：（讀白）凱安無理到人工智能嘅勸喻，繼續用力打啞鈴洲嘅透明邊界！跟住人工智能憑空變出幾支三叉戟，輪流向凱安激射過去！ *飛戟聲效 裘雪：（讀白）凱安好似感應到人工智能嘅攻擊，一個轉身閃避兩支三叉戟，但第三支就插中佢嘅腹部 *插肉聲效 *凱安痛叫 裘雪：（讀白）凱安無理痛楚，一手將支三叉戟拔出嚟，再向我地掟過嚟！人工智能揮一揮手指，支三叉戟好似聽佢指揮咁，轉彎再射向凱安！呢個時候，凱安腹部嘅傷口竟然慢慢癒合，佢再一手捉住飛向佢度嘅三叉戟，不過今次無掟過嚟，而係拎住佢，好快咁衝向人工智能嗰度！ 人工智能呆咗一秒，跟住就再變出十幾支三叉戟，一次過向凱安射過去！ 凱安佢無閃避，用身體硬接！佢不斷咁流血...但佢無停止咁衝過嚟...因為佢嘅目的只有一個！就係想用佢手上嘅三叉戟插死人工智能！ 為咗阻止佢地兩個無謂嘅打鬥！我決定衝去佢地兩個中間！硬接阿安嘅攻擊！ *玻璃爆裂聲效 凱安：（虛弱）阿雪...你...做咩...啊... 裘雪：阿安！阿安！人工智能！阿安佢暈咗啊！ K Area DB Island：我地用傳送門去返千獸島先。 Zip噏劇場 Game of Eden 第二季 小島篇 第103回「蛇變（下）」 Harry 飾演 裘雪 Alton 飾演 人工智能 K Area DB Island Potter 飾演 凱安 編劇及製作 阿攝音樂 BEAT FRIDAY (Cross, Subtitle, Stuk, Daydream, HEJ, Phase, Minty, Nutty)封面設計 Followmelikeblack Leave a comment and share your thoughts: Powered by Firstory Hosting