Escoitamos teatro 2022

Dúas amigas quedan para verse despois de varios anos sen manter contacto. Pero una delas non acode á cita e a outra chámaa por teléfono para saber que acontece. Begoña García Ferreira (Santiago de Compostela, 1979) é licenciada en Historia pola Universidade de Santiago de Compostela. É coautora (con Eva Gontad) da comedia teatral Charlie’s Angels’ Sex, levada a escena con Silvia Cerneira e baixo a dirección de Carlos Losada. Outras obras súas foron galardoadas no Premio Diario Cultural de Teatro Radiofónico da Radio Galega. Carlos Losada dirixe a dramatización da obra, que conta coas locucións das actrices Silvia Cerneira e Eva Gontad.

Un home achégase á consulta dunha psiquiatra, non moi convencido, para curar un problema que padece. Pola dificultade do caso, a doutora decide iniciar un tratamento a través da hipnose. Así descobre os medos máis ocultos do doente. Como dramaturgo, Labraña deuse a coñecer pola súa celebrada produción teatral para público infantil e familiar. Logo, a súa inquedanza foi medrando cara o ámbito social e creou textos sobre os abusos a menores, os refuxiados, a crise económica ou a igualdade de xénero, abrazando a realidade máis actual. En tódolos campos, a súa obra acadou recoñecemento e premios. Zé Paredes dirixe a Mónica Caamaño e a Xosé Barato na dramatización de Fobias.

Ela e Ele dispóñense a facer unha primeira lectura dunha peza de teatro radiofónico sobre os diferentes xeitos que ten a xente de enfrontar o inevitable. Unha das historias que interpretan resúltalles estrañamente familiar. O autor, o cambadés Carlos Losada Galiñáns, foi cofundador da compañía caChuzo. Como dramaturgo atesoura varios premios e recoñecementos pola súa creación de textos de teatro infantil, de monicreques ou de radioteatro. A súa obra está publicada por varias editoriais. O propio Losada dirixe O inevitable, que conta coa participación de Sandra Lesta e Fernando Epelde.