Hirðfíflið - samtal

Anna Ragna Fossberg og Anna Kristín Hannesdóttir spjalla um nýútkomna bók hinnar fyrrnefndu, Hirðfíflið. Í tal berst bakgrunnur og tilurð bókarinnar, sjálfsútgáfa og hliðstæðar bókmenntir. Anna Ragna les jafnframt þrjá stutta kafla.Inga Stella elst upp á þriggja kynslóða heimili. Þegar mamma verður veik eða skrítin töltir hún niður stigann til ömmu og frænku. Þannig varðveitir hún sakleysið þangað til pabbi fer líka að verða skrítinn — og alltaf skrítnari og skrítnari.Þó að amma og frænka hafi endalausan tíma fyrir lítið barn þarf Inga Stella líka að passa að pabbi verði góður við mömmu og mamma góð við hann. Þetta er flókið hlutverk fyrir litla stúlku en hún heldur í þá bjargföstu trú að ef hún standi sig vel þá verði allt gott.Þegar pabbi og amma deyja taka unglingsárin við — og fullorðinsárin eftir andlát mömmu. Smám saman rennur upp fyrir Ingu Stellu að lífið hefði getað orðið svo miklu betra ef mamma hefði haft kjark til að flýja pabba og taka hana með sér.Í þessari bók ávarpar hún foreldra sína til skiptis, rifjar upp og leitar svara við spurningunum sem brenna á henni.Bókin tekur á hugrakkan og áhrifamikinn hátt á fíkn og andlegum veikindum foreldra.Hirðfíflið er þriðja bók Önnu Rögnu Fossberg. Hún sigraði handritakeppni Sparibollans með skáldsögunni Hugfanginn árið 2021. Fyrsta bók hennar Auðna kom út 2018 og hlaut afar góðar viðtökur.