Les Fartures

Comenzamos el programa falando con César Casado, cocineru del Married. Married foi una ayalga que taba va años n'Uviéu, ufiertando cocina distinta, mui creativa, a perbon preciu. Agora, n' Ḥontoria, Llanes; cocinando nun pequeñu y preciosu hotel, alloñáu de los focos mediáticos y cola tranquilidá del pueblu, pero con un Sol Repsol. Ún de los meyores cocineros d'Asturies. Acabamos el programa con Marcos Cienfuegos, que vien a la radiu con Julio Fernández, presidente de la IXP Miel d'Asturies. Vamos falar de tolos usos que tien el miel, amás de los llambiones, de dalguna creación que fizo Marcos pa llevar a congresos gastronómicos al rodiu'l miel.

Comenzamos el programa falando con Pedro Morán, 4ª xeneración de Casa Gerardo, ún de los restaurantes más afamaos d'Asturies, cola Estrella Michelín más vieya que tenemos, y que continua na so quinta xeneración col so fíu, Marcos. Vamos falar con él de la hestoria la so casa de comíes, de cómo llegó la cocina creativa a Asturies, y de cómo conformaron una xeneración que sentó los pegollos de la nueva cocina asturiana. Y de lo de siempre, a lo nuevo. Vamos falar tamién con Héctor Fandiño, premiu Talento by Abril 2026. Un concursu entamáu per una marca d'aceites gallega qu'acaba de ganar un cocineru mozu de la escuela d'hostelería de Morea.

Comenzamos el programa falando con Jon Tillman, que mudó cola so familia de los Apalaches norteamericanos a Asturies, y lleva escribiendo dende entós una wikipedia sobre la gastronomía asturiana. Vamos falar con él de cómo ve la nuesa, que ya ye suya, gastronomía; y tamién de les conexones entre la so fastera y la nuesa por cuenta la emigración de mineros asturianos a trabayar el cinc. Acabamos el programa con Guillermo, Paloma, Isabel y Elvira, de 1901 Cocina Gustosa, y Hotel Las Indianas. Un hotel indianu preciosu en Nueva de Llanes, onde Guillermo y Paloma, del Parador del Rey, mudaron la so cocina.

Comenzamos el programa falando con Enol, de Xagó Surf. Acaben d'empezar la so séptima temporada na sablera de Xagón, en Gozón, rescatando'l míticu Bar Quedevo y convirtiéndolo nun sitiu d'alcuentru pal pueblu, pa los turistes, pal mundu cerveceru y pal mundu del surf. Cerveces propies, pizzes de Zio Pig, surf y una montonera d'eventos y conciertos n'un de los sitios de moda d'Asturies. Acabamos el programa falando con Barbara y Yareah, d'El Trasgu la Fronda, una granxa escuela y muncho más en Llaviana. Sé granxeru per un día, o xúnete a les sos rutes teatralizaes de "L'Aldea Perdía". Pero tamién encarga ún de los sos menús, onde la estrella ye la so sidra y'l corderu a la estaca.

Comenzamos el programa falando con Edén Jimenez, del Grupu Divenire. Edén forma parte de La Esquina del Peso, L'Amasería, Las Terrazas de Sardalla y El Balcón de Bueño. Una charra sobre hostelería, gastronomía, cómo xestionar negocios, y la vida en xeneral, con una de les persones más inquietes nesti mundiu n'Asturies. Acabamos el programa con Xurde Morán, tamos ya saliendo d'A Fonsagrada, que ye un conceyu per grande, y tien munchos rincones ainda por descubrir.

Comenzamos el programa falando con Jose Álvarez, de la Taberna Narciso, Mónica Armantina, y Xuan F. Piloñeta, de la Fundación Belenos, que vienen a falanos de la Escuela de Teitáu, que van entamar esti branu pa Teberga. Una convivencia onde vas remocicar un teitu mientres unos díes arrodiáu n'andecha d'espertos na materia. Amás vienen a falanos qu'el próximu día 1 convoquen a tolos que se quieran apuntar na braña'l Rebe ḷ ḷón con folixa, charres y tamién gastronomía. Acabamos el programa con Javi Solís y Verónica García-Peña, que vienen a la radiu cola so Casa Gris a falar de lliteratura y gastronomía. Nesta ocasión, de Jane Eyre, de Charlotte Brontë.

Comenzamos el programa con Borja Alcázar del Abrelatas, que vien a la radiu a falanos de les males crítiques que reciben los restaurantes nes redes sociales. Un tema polémicu nel que vas acabar llorando de risa por cuenta dalguna crítica qu'arrecibió Borja. Acabamos el programa con Sara Ceballos que vien colos sos Entremeses Repunantes. Falaremos d'OTEA, de llambionaes de Selmana Santa y de si somos más de bocartes o de sardines.

Comenzamos el programa falando con Bea y Dani, Umami. Dos hermanos que ya lleven 9 años al frente del únicu teppanyaky d'Asturies. Cocina xaponés, con toque de plancha, saliéndose de los tópicos del país y cola posibilidá d'acompañalo de bebíes sorprendentes, ya inclusive cócteles. Acabamos el programa con Marcos Cienfuegos, que vien acompañáu d'Elena Gómez, presidenta de la IXP Choscu de Tinéu. Vamos falar con ellos del choscu, al que-y lleven años dándo-y un bon emburrión, pero qu'aínda sigue siendo abondo desconocíu pa munchos y munches asturianes.

Güei vamos falar con 3 muyeres enllenes de talentu y remangu, con Luci de La Tabernilla de Oviedo, con Mirta de El Torneiro, y con Mariali, de El Verano. Centru, Occidente y Oriente nun mesmu programa, 3 guisanderes, amás de les más moces, que vienen con una nueva visión sobre la gastronomía. Vamos falar de guisar, de la muyer na gastronomía y va cuntanos dalguna sorpresina que tienen ente manes.

Comenzamos el programa falando con Ángel, del restaurante Arraigo, na Posada de Llanera. Un restaurante onde se guisa, onde nun hai atayos, onde los callos y les cebolles rellenes son d'otru mundiu, y onde la güerta propia (y dientro poco, dalgo de ganadería) tien muncha importancia. Acabamos el programa con Los Vicentos, dende Cabrales, un grupu musical que naz al rodiu la gastronomía. Muncha folixa, pero tamién muncha fartura.

Comenzamos el programa falando celebrando'l 40 Aniversariu de Casa Pedro, el gran restaurante asitiáu en San Xuán de Parres. Vamos cuntar cola presencia de Cristian y Aroa, y tamién de Yolanda, so ma, que xunto con Pedro, entamó esta guapa historia. Acabamos el programa falando del nuevu llibru d'Arantza Margolles, "Rutas con historia por Asturias", onde axunta rutes coles sos histories, munches d'elles desconocíes, detrás.

Comenzamos el programa falando con Adrián Fernández, propietariu de la bodega Señorío de Ibías, una de les más premiaes y reconocíes dientro la DOP Cangas. Allugada en Cecos, Ibias, lleva ellaborando vinos dende 2018. Amás tien nel mercáu’l primer rosáu ecolóxico dientro la DOP. Acabamos el programa con Jose González, del restaurante-hotel-spa el Tixileiro, cerca de la bodega de Señorío de Ibias, tamién dientro del conceyu d'Ibias. Va preparar mientres esti mes d'abril un menú "Ushido" con carne wagyu A5 y posibilidá d'agospiamientu. Pero amás falaremos de les dificultaes de tener un restaurante nuna fastera tan alloñada.

Especial de Les Fartures dende Gastroḷḷar. Parte 2 Comenzamos el programa falando con Jose Berasaluce, una de les mayores eminencies nel mundu gastronómicu español. Direutor d'artes y humanidaes de la UCA, la Universidá de Cádiz. Direutor del master d'innovación de la cultura gastronómica de la UCA, y autor de llibros tan afamaos como "El engaño de la gastronomía española". Acabamos el programa falando con Inés Butrón, una de les escritores y divulgadores más afamaes na gastronomía española. Profesora d'Historia de la gastronomía na Basque Culinary Center, Collaboradora de dellos medios y autora del afamáu blog "Hule y Mantel".

Especial de Les Fartures dende Gastroḷḷar. Aprovechamos l'alcuentru de Gastro ḷ ḷar pa entrevistar a delles personalidaes nel mundu la gastronomia. Comenzamos con Yolanda León, el 50% de Cocinandos xunto con Juanjo. Estrella Michelín nel preciosu Palaciu San Marcos de Lleón, cola que vamos falar d'estrelles, productos llioneses, y cómo se siente ser de les poques muyeres cabezaleres na gastronomía española. Siguimos con Rubén Morán, qu'en Posada de Valdeón ta faciendo del so Desván Valdeón un destín onde axunta a la perfeición tradición y novedá, Vamos falar de turismu, d'andoyes (androjas como dicen p'allá) y de lo difícil que ye caltener un restaurán nun pueblu con per pocos habitantes. Y acabamos el programa con Juan Carlos García, del Estrella Michelín Vandelvira. "Ún de los restaurantes más guapos d'España", asitiáu en Baeza, Jaén. Vamos falar con él del peligru de la gastrificación y de cómo caltener ser un restaurante pal pueblu mientres l'alta cocina cada día ye namás pa les élites.

Comenzamos el programa falando con Lluis Nel Estrada de Gastro ḷ ḷar, el festival gastronómicu qu'entamó esti fin de selmana y tien les sos principales actividaes mientres el llunes ya'l martes. Va cuntanos tolo que van facer, pero tamién vamos falar de gastrificación y gastronomía asturiana.  Acabamos el programa viaxando pel mundu gracies a Natalia d'Animales Viajeros (.es). Nesti programa Natalia va llenanos a Viena, falaremos de los indispensables que tienes que visitar, de los recovecos prestosos que namás ella conoz, pero tamién de lo que ties que comer ellí. 

Comenzamos el programa falando con Álvaro y María, un madrilanu y una venezolana qu'atoparon l'amor n'Asturies y abrieron el so propiu restaurante tres, sobre manera Alvaro, tar cocinando en dellos restaurantes importantes. Agora en Cualloto, Anma ye un restaurante frescu, onde Álvaro asoleya la so creatividá y María alluma la sala. Acabamos el programa con Xuán F. Piloñeta, de la Fundación Belenos, que vien a falanos del Ciclu d'Iviernu n'Asturies. Equí nun valen les estaciones como los entendemos agora, equí ye la natura y la collecha la que marca'l ritmu añal y la que dicta'l trabayu ... Pero tamién les folixes.

Comenzamos el programa falando con Jose Antonio Campoviejo, El Corral del Indianu, que cumple esti xunu 30 años al frente del so restaurante. 27 d'ellos con Estrella Michelín de siguío. Vamos falar con él de cómo xestionar tantos años un restaurante con tanto ésitu, facelo rentable, y alloñáu de les zones más turístiques d'Asturies. Una conversación seliquina al rodiu la gastronomía asturiana con ún de los sos meyores cocineros. Acabamos el programa con Xurde Morán, col que siguimos percorriendo'l Camín de Santiagu. Tamos en Fonsagrada, onde atopamos tanta ufierta cultural y gastronómica, que Xurde sigue, un programa más, falándonos d'ella. Y sí, hai muncho más que pulpu ellí.

Comenzamos el programa falando con Susana García, que cumple 10 años col so blog de recetes de cocina "Piruletas de Jamón", espublizando'l so nuevu llibru "Asturias en el Plato", con 72 (+1) recetes de la gastronomía asturiana. Un llibru prestosu, didáuticu, perfácil d'usar, con, amás, una fotografía bien cuidada. Acabamos el programa con Mariana, de La Miga de Mariana. Vamos un pasín más allá, y dempués de falanos de les dificultaes téuniques entamando'l so nuevu obrador, tamién vamos falar del gastu personal y emocional que conlleva entamar nuevos proyeutos.

Comenzamos el programa repunando con Sara Ceballos y los sos Entremeses Repunantes. Güei va falar de Bud Bunny, de la nueva cafetería de moda con estética xaponesa de Xixón, de la polémica de l'angula y del nuevu centru comercial Cotsco en Sieru. Acabamos el programa con La Casa Gris, la sección onde Javi Solís y Verónica García-Peña axunten lliteratura y gastronomía. Güei vienen a falanos de "Leyendas" de Gustavo Adolfo Bécquer, un clásicu del que, de xuru, ainda nun lo sabes too.

Comenzamos el programa falando con Julín Menéndez, de La Raíz 15, qu'acaba de tornar de Madrid Fusión col premiu a la Segunda Meyor Croqueta nel concursu qu'elli entamen. Vamos falar con él del concursu, de tolo que vivió en Madrid Fusión, y tamién de tolo que fai na Raíz 15. Acabamos el programa con David Vilasboas, amigu asturianu que trabaya dende va años en Supervivientes, n'Honduras. Abrimos pa unos díes a los y les oyentes de Les Fartures la oportunidá d'unvia-y a David toles preguntes de tolo que queríen saber del programa y él va contestar ... Tolo que-y dexen les sos cláusules de confidencialidá.

Comenzamos el programa falando con Luis Menéndez, d'Alalunga, qu'acaba volver de Madrid col premio embaxo'l brazu de la Meyor Tapa d'España en Madrid Fusión 2026. Vamos falar con él d'"Andarrica", la tala con sabor a andarica cola que trunfó, pero tamién de cómo Luis ta axudando a camudar la cultura'l pinchu n'Asturies, ganando tolos concursos dientro y fuera d'Asturies. Acabamos el programa con Juanjo Cima, de Las Tablas del Campillín y La Taberna Asturiana, que vien a la radiu a falar de la 4ª Edición del PoteDay. El día qu'axunta influencers y demás gandaya al rodiu'l Pote. Un día festivu, pero qu'amás, vien siempre con unes xornaes del Pote nos sos restaurantes. Atentos, nesta edición, con Croqueta de Pote.

Comenzamos el programa falando con Cesar Antón, de Pastelería El Fontán. Pastelería de Tinéu que lleva abierta dende 1960 y de la que César ye ya la segunda xeneración. ¿Probablemente les meyores milfueyes del mundu? Si nun lo son, tan cerca. Pero ye qu'amás, fai una montonera de coses más de les que nos va falar. Acabamos el programa con María Arias Fotografía. Una cámara de TV que tamién ye fotógrafa y que lleva munchos años dedicada a la semeya gastronómica. Vamos falar con ella de la importancia d'una bona imaxe nun chigre, pero tamién del engañu de munches de les semeyes que vemos que nun correspuenden cola realidá.

Comenzamos el programa falando con Cerveza Scone, una de les cerveces más veteranes na escena asturiana. De Xixón, faciendo cerveza dende 2017. Tienen amás, na so fábrica, la opción de poder visitalos, con una preba de cerveces y quesos asturianos; y una zona de bar pa dir a tomar unes cerveces. Acabamos el programa con un poco de metal, Caballo Moldavo. Grupu que lleva dende 2019 dando caña n'Asturies, con un direutu prestosu onde vas acabar col cuellu rotu de tanto solmenar la melena ... Los que la tengan, claro.

Comenzamos el programa falando con Mario, de Cerveza Limbo. Una nueva cervecería qu'acaba d'abrir nel paséu la Playa San Llorienzu de Xixón, a pie de playa, y, qu'amás, tien la so propia fábrica de cerveza nel so llocal, lo que la convierte n'ún de los pocos brewpubs d'Asturies. Acabamos el programa con Xurde Morán, siguimos en Fonsagrada, conociendo tolos chigres, cafeteríes, confiteríes ... El conocimientu de Xurde nun tien fin.

Comenzamos el programa falando con Cristina y Calor, de Pantry By Eleonore, qu'acaben de ganar el concursu al meyor roscón 2026. Una pastelería qu'entamó a partir d'un restaurante gastronómicu en Salinas, y qu'agora ye uno de los referentes nel mundu la pastelería. Amás, con pizzes, brunch, eventos, parte salada, un proyeutu pa facer la so propia cerveza y la so propia soda; y la vuelta del restaurante pa esti branu. Acabamos el programa con Alba Abiega, qu'abandonó'l mundu les multinacionales pa entamar col so pa, Alba en Ribera, una bodega de vinos de Ribera de Duero mui asturiana. Un proyeutu preciosu qu'amás vien con premiu, el so primer vinu, Alba desde Cero, acaba de ser nomáu "Mejor Vino Tinto de España 2024" pa la Guía de Vinos Gourmet 2026, amás d'algamar 91 puntos Parket.

Comenzamos el programa falando con Mario y María, de Casa Mario, sidrería que lleva unos aniños en La Felguera dándonos munches allegríes. Lo de siempre, pero más nuevo y bien fecho, col puntu amás que Mario ye cortador de xamón y fai una amiestu de Sidra y Xamón única n'Asturies. Acabamos el programa falando de les Xornaes de Caza de Redes que van celebrase esti fin de selmana que vien nos conceyos de Sobrescobiu y Casu. Vienen a venos Néstor, del Restaurante Los Cabornos, de Sobrescobiu; y Diego, del Restaurante Arniciu, de Casu.

Comenzamos el programa falando con Bibiana y Julieta, madre y fía, d'el restaurante El Cencerro. Uno de los restaurantes más míticos y queríos de Xixón. Lleven 18 años abiertes y van cuntanos el secretu pa la so llonxevidá calteniendo la calidá. Carne de la buena, pero muncho más, nun sitiu afayadizu y prestosu a dos pasos del centru la ciudá. Acabamos el programa con Natalia, d'Animales Viajeros (.com), que vien a falanos d'estaciones de sky, de les de casa y les d'acullá. Va cuntate les más prestoses, les meyores pa esquiar, les que tienen más folixa y tamién va repunar de dalguna.

Comenzamos el programa falando con Aitor Luis Vega y Patricia y Borja del Nieto's. Acaben d'axuntase pa crear L'Asturiana, la nueva hamburguesa qu'el Nieto's va presentar al Campeonatu d'España d'hamburgueses. Caúna lleva un cachín de quesu azul de Los Caserinos, marcáu a soplete. Acabamos el programa con Xuán Fernández Piloñeta, que vien a presentanos l’últimu númberu de Belenos, la revista qu'asoleya la Fundación Belenos. Bichos, historia, arqueoloxía, etnografía ... n'una de les revistes con mayor calidá que vas atopar nel mercáu.

Comenzamos el programa con Fernando Farpón, de Speltastur. Empresa familiar dedicada a la recuperación y comercialización de la espelta, la escanda, el nuesu cereal asturianu. Cuando ya taba a piques d'espaecer ellos entamaron esta xera, amás de por romanticismu, pa dignificalu. Amás llevaron el procesu más allá y faen ellos mesmos la tresformación del cereal col so propiu obrador. Acabamos esti programa con Mariana, de La Miga de Mariana, que vuelve a la radiu dempués d'un duru procesu de treslláu d'obrador pa medrar. Y va cuntanos cómo foi, tanto profesional como personalmente. Un programa de Les Fartures al rodiu'l pan n'Asturies.

Comenzamos el programa con Engel y Deva, que garren el relevu nel míticu restaurante La Panoya, en Cenera (Mieres). Engel llevaba años aprendiendo a cocinar dende fregeplatos hasta xefe de cocina, en dellos restaurantes per España, hasta qu'atopó a Deva, de Cenera, y l'amor fizo'l restu. Agora, tres años cocinando con Pedro Martino, entama'l so propiu camín continuando nuna de les cases de comíes más queríes d'Asturies. Amás, con apartamentos y hotel rural. Acabamos el programa cola Casa Gris de Javi Solís y Verónica García-Peña, que vienen cola novela Norte y Sur, d’Elizabeth Gaskell, de 1855. Historia d'amor, los anicios de la industrialización colos conflictos por ameyorar les condiciones llaborales, sindicalismu, y gastronomía, tamién muncha gastronomía.

Comenzamos el programa falando Paula Sopeña, de Casa Eladia. Uno de lo meyores sitios d'Asturies onde comer fabada. Casa Eladia, ye amás un chigre-tienda que lleva abiertu dende finales del SXIX, y que caltién esi aire de chigre, con sidra, con muebles de vieyo y onde pues comprar champu, unes madreñes mientres esfrutes d'una de les meyores cocines del país. Acabamos el programa falando con Aitor Luis Vega, el nuesu queseru, que vien al programa a presentar la so nueva marca de quesos. Aitor va un pasu más allá, y tres muncho tiempu vendiendo quesos y sabiendo qué demanden los veceros, añade a la so ufierta los quesos onde acompañó a queseros y queseres asturianes y van cubrir los furacos qu'él veía nel so mercáu. Vien amás de ser nomáu Miembru de la Gulde Internacionale des Fromagers en Francia.

Comenzamos el programa falando del 38 Festival de los Nabos y del Quesu la Fuente de Proaza, que va celebrase esti fin de selmana. Pa ello, cuntamos cola presencia de Cristina Fidalgo, conceyala en Proaza; Rosa Vázquez, propietaria y cocinera del Restaurante El Acebo, ya peslláu, pero que foi una institución n'Uviéu, y amás, única muyer fundadora de la Cofradía del Desarme; y Cundi Vázquez, hermana de Rosa, y ellaboradora del quesu la Fuente. Vamos falar con elles d'estes xornaes, de la importancia del pote los nabos, y, sobre manera, d'esa ayalga que tuvo a piques d'esapaecer que ye'l Quesu La Fuente. Acabamos el programa colos Entremeses Repunantes de Sara Ceballos, Sweetllaceria. Que vien cargada de delles repunancies dempués de pasar les feches navidiegues. Analizaremos amás les "tendencies gastronómiques de moda" pa esti 2026 cola so visión repunante.

Comenzamos el programa falando con Marcos Serén, ChefMSPin, una de les cuentes nes redes sociales con más siguidores n'Asturies. Cocineru profesional, que fai nel so canal de Youtube recetes tradicionales cencielles y tien abondo éxitu con ello. Acabamos el programa falando con Olaya y Mario, d'Olaya Miel. Dos hermanos, que ya son tercera xeneración ellaborando miel. En Cuevas, conceyu d'Ayer, y, qu'amás, tienen la particularidá de facer treshumancia coles más de quinientes colmenes que tienen. Una forma distinta de facer miel buscando delles floraciones n'Asturies.

Comenzamos el programa falando con Alicia Villanueva, que con solo 25 años acaba de quedar Campeona d'Asturies de Tonada. Ye permoza, pero lleva dende va munchos años cantando tonada. Vamos falar con ella d'esti estilu musical, de la so modernización y tamién va echanos un cantarín en direutu. Acabamos el programa falando con Juanjo Cima, que presenta dos eventos nos sos restaurantes. En Xixón, en La Taberna Asturiana, entama unes xornaes onde vas probar carnes del mundu. Y n'Uviéu, en Las Tablas del Campillín, un cachopu especial Stranger Things.

Comenzamos el programa con Diego García, cocineru y dueñu xunto a Zoraida, d'El Pintu. Ún de los referentes gastronómicos de Llaviana y la cuenca minera, que ta consiguiendo que miremos un pocoñín más p'aquella fastera, siempre escaecía. Diego cocina sele, ensin atayos, y ye un guisanderu de primera, con ún de los meyores menús del día que tenemos n'Asturies. Y una vez por mes, axúntase con dalgún otru cocineru nel so famosu El Pintu & Collacios. Foi de los primeros en venir a Les Fartures, y quería que repitiera entrevista. Acabamos el programa con Xuán F. Piloñeta, presidente de la Fundación Belenos. La cabeza vegada falemos de la Cultura del Pan n'Asturies, y quedóse'l programa curtiu, asina que nesti afondaremos aínda más nuna de les industries más escaecíes pero con más posu n'Asturies.

Comenzamos el programa falando con Javier Salor, de Café Parador, en Turón. Un chigrín onde vas comer los meyores pinchos de tortiella y carne guisao del mundu. Y onde amás, Javi, tien una bodega bien curiosa pa tomar un bon vinu. Acabamos percorriendo'l Camín de Santiagu con Xurde Morán. Tamos ya en Fonsagrada, que merez un programa enteru falando d'uno de los sitios más famosos onde comer pulpu. Pero tien muncho más ... Secretinos que namás Xurde sabe.

Comenzamos el programa falando con Iñaki y Lola, del Restaurante Alenda. En Seloriu, bien cerca de la Villa, un restaurán distinto, que mira a so güerta, pero tamién a tolo que tien alredor. Un restorán de dos persones, una forma de vida, pero tamién una llucha continua por facer rentable lo caltenible. Acabamos el programa con Borja Alcázar, el nuesu collaborador de Palabres Vieyes, que vien en calidá d'entrevistáu. Acaba ganar el concursu del Meyor Pote Asturianu d'España y acaba entamar el primer Concursu Nacional de Llicor de Guindes. Amás, vamos acabar el programa dando-y una sorpresina.

Comenzamos el programa falando con Iván Suárez, d'Embutíos Alto Urbiés. Reabrió la fábrica va unos años n'Urbiés, ensin llegar a los 30 años. Con bon productu, y adulces, foi vendiendo pela redolada y ampliando mercáu gracies tamién a la gran comunicación que tien nes redes sociales. Mocedá, muncho trabayu y gran productu. Acabamos el programa con Vick Blanch, realizadora audiovisual, tamién pedagoga y creadora de conteníu. Lleva unos meses faciendo conteníos en delles redes sociales cola cultura asturiana como protagonista, enganchando perbién col públicu más mozu. Vamos charrar con ella de mocedá, de les nueves formes de comunicación y de cómo crean bon conteníu nun mundu del click fácil.

Comenzamos el programa falando con Eva Fresneda, una de les cares más queríes y conocíes de la TPA. Lleva dende cuantayá enseñándonos Asturies dende Conexión Asturies, y agora, tamién, ta al cargu d'Asturias Repor, una visión más fonda de l'Asturies d'anguaño. Vamos falar con ella de la so trayectoria, pero tamién de la so celiaquía, y les abondes torgues qu'aínda atopa pa poner dir a dellos restaurantes. Acabamos el programa con Miguel Fernandi, Burilo, cantante de Skama La Rede, qu'asoleya'l so nuevu discu "20 Años" por mor del so 20 aniversariu. Vamos falar con él de Skama, de música, del Oviedo, y tamién, cómo non, de Fartures.

Comenzamos el programa falando con Pablo García, de Cerveza Grisú. Pablo lleva dende cuantayá faciendo cerveza, primero na so casa, y dempués como cerveceru nómada alquilando les instalaciones d'otros, hasta que nesti 2025 dio'l saltu y abrió la so propia fábrica de cerveza en L'Entregu. Algo únicu porque ye la cuarta fábrica de cerveza artesano qu'abre na cuenca minera del Nalón, dalgo que casique nun pasa nin nes fasteres más cerveceres d'Europa. Acabamos el programa con Natalia, d'Animales Viajeros, que vuelvi a la radiu pa falanos de Matarraña, una zona abondo desconocía y con unos pueblinos medievales preciosos.

Comenzamos el programa falando con Xermán y Jaime, Ca'l Xabú, ún de los meyores restaurantes n'Asturies, en Cuergo (Ayer). Acaben d'abrir la so propia chanicería onde vienden los sos embutíos, d'ellaboración propia, amás d'una montonera de productos asturianos, que, de xuru, munchos d'ellos nun conocéis. Ún de los tándem más prestosos de la gastronomía asturiana. Acabamos el programa con La Casa Gris, de Javi Solís y Verónica García-Peña, güei, nesta xuntanza tan prestosa que faen ente lliteratura y gastronomía, vienen con una novela de mieu, "La Maldición de Hill House".

Comenzamos el programa falando con Dani y Karen, qu'abrieron va unos meses el so propiu restauran en Lluanco, tres pasar deprendiendo con grandes cocineros como Quique Dacosta y Nacho Manzano. Vamos falar con ellos de lo que faen y lo que ye entamar un restaurante a pesar de la so mocedá. Acabamos el programa con Xurde Morán. Entramos en territoriu gallegu, y na parte final del Camín de Santiagu. Güei llegaremos, o non, a Fonsagrada.

Comenzamos el programa falando con Bárbara y Adrián, de La Gloria. Relevu nuna de les pasteleríes más famoses d'Asturies con una de les tartes más conocíes, la Tarta Turonesa. Vamos falar de la ilusión de Bárbara por garrar el proyeutu, y de los planes que tienen pal so futuru. Acabamos el programa con Victoria Maseda, gallega que reabrió esti branu La Cofradía de Puerto de Vega, maraviyosu restorán con vistes al puertu de Veiga. Victoria cocina gallego y cocina mar, a les mil maraviyes, pero tamién va faciendo guiños asturianos. Vamos falar con ella cómo atopó'l so sitiu nel occidente asturianu.

Comenzamos el programa falando con Jesús Martínez Valdéz, xerente de Diego Verdú. Quinta xeneración repartiendo felicidá en forma de turrones, xelaos y muncho más na ciudá d'Uviéu. Vamos falar con Jesús de la historia la empresa, y de cómo ye dirixir una maquinaria tan grande que sigue calteniendo los mesmos sabores tradicionales y estándares de calidá cimera. Acabamos el programa falando con Daniel Díez y Blanca Mendoza, matrimoniu, amás encargáu de la parte llambiona nel restorán Tella, nel hotel 5 estrelles del Palacio de Lluces. Un madrilanu y una vallisoletana con una historia perguapa ente bombones.

Comenzamos el programa falando con Rocío Fernández, segunda xeneración de Ganadería Casa Ramón, y premiu accésit al Relevu Xeneracional pela Asociación de Jóvenes Empresarios. Ganaderia amás siempre venceyada al míticu Restaurante d'Uviéu Casa Ramón. Vamos falar con Rocío de la historia de la ganadería, tamién de la del restaurante, y de cómo encara ella'l futuru del negociu. Acabamos el programa con Sara Sweetllaceria, que vien a la radiu colos sos Entremeses Repunantes. Nesta ocasión, vamos repunar de les barbacoes coreanes, del pieslles de pequeños locales en Cimavilla y de los milenta concursos gastronómicos qu'abonden acaldía.

Comenzamos el programa falando con Diego Fernández, del Restaurante Regueiro, qu'acaben de da-y una Estrella Michelín pa esti 2026. Un mediu deseáu, pero que va años dexó de ser una obsesión. Y asina presta muncho más esfrutala. Una charra tranquila, prestosa con uno de los meyores cocineros que tenemos n'Asturies. Acabamos el programa con Yoni Martínez, de la Pimpana. Chigre-tienda en Las Agüeras, Quirós, onde vas comer perbién. Un sitiu preciosu, qu'amás vive por y pal pueblu onde ta. Una charra falando de cómo modernizar los chigres-tienda, de la so llexislación, de la semeya onde ta parada la cocina tradicional asturiana, y una montonera coses más, con ún de los cocineros que más claro lo tien.

Comenzamos el programa falando con Pablo Fernández, de La Botella, una de les sidreríes más antigües d'Avilés. Un chigre de tola vida, onde vas comer lo de siempre, pero con un productu de primera. Segunda xeneración al cargu del chigre. Acabamos el programa coles Palabres Vieyes de Borja Alcázar, que vien acompangáu de Jose Llera, campeón de sidra casero 2024 d'Asturies. Jose ye un namoráu de les mazanes y la sidra, tien les sos propies pumaraes, y fai una producción curiosa de sidra casero como hobbie. Amás, sidra ancestral, sidra de xelu, aguadiente de sidra, vinagre ...

Comenzamos el programa falando d'aceite con Jesús Morata. Productor d'AOVE Morata, vien a falanos del aceite de collecha temprano, y les diferencies pa colos demás. Amás falaremos de precios, de cómo ta la collecha y, amás, de cómo va Cova Sacra dende que se fizo cargu de la so cocina. Acabamos el programa falando con Javi Solís y Verónica García-Peña, que vuelve a la so Casa Gris con 'Carmilla', la novela de Sheridan Le Fanu qu’abrió’l camín a los vampiros que vendríen después.

Comenzamos el programa con Raquel Bayón, Rapacina Repostera, una de les cuentes de repostería con más éxitu con más de 140mil siguidores n'Instagram. Vamos falar con Raquel de repostería, de cómo algamó esi éxitu y de les redes sociales. Acabamos el programa con Cruz Maestre, de Finca Maeza, que vien xunto a Borja Alcázar a falar de la Yeguada que tien en Sariego. Ellí, ufierta un domingu al mes un menú degustación temáticu que cocina Borja.

Comenzamos el programa con Mariano, de Yanik; Luis, d'Alalunga y Mario, del TC28, acaben de ganar Miniature, ún de los concursos de pinchos más prestixosos de la península ibérica. Ellí, compitiendo escontra los reis de los pinchos, l'equipu los tres asturianos salió victoriosu. Acabamos el programa con Enar y Xicu, Puru Remangu, la marca de ropa que ta revolucionando Asturies. Vienen a presentanos el so primer festival "Artístiques", onde axunten artistes femenines d'artes plástiques, música y artes escéniques, el primer festival d'estes caurauterístiques n'Asturies.