Unger üs gseit

Nachem locker-flockige Ihstieg inklusive ere neue Rubrik wirds ganz schnäu ganz deep. Hüt rede mir über intrinsischi Glaubenssätz wo sech wohl jedi und jede drmit cha indentifizere. Es geit um töif ih üsem Bewusstsi verankeriti Überzügige, wo positiv, aber ou negativ chöi si. Bi wellne gsehsch du di wieder? Gueti Nachrichte oh hie: Gseht me sech bi somne Glaubenssatz, heisst das nid, dasme niemeh drvo weg chunnt. Mir heis zum Glück selber ir Hand, wie viel Macht mir dene schenke.

Mir rattere hie itz nid aui Tipps abe für guets Storytelling. Da drzue fingt me online gnueg. Mir bereite z Thema meh uf mit persönleche Gschichte und Erlebnis rundum Stories us üsem Alltag. Es git chuum ä Lebensbereich, wo Storytelling nid irgendwie relevant isch. Paar Gschichte si besser und paar schlechter. Die wahri Kunst isch Gschichte guet chönne z verzeue - egau was ihre Inhalt isch.Shownotes:Instagram vor Fotografin Sophie Wagner: https://www.instagram.com/_sophienina/?hl=deSie steit uf dr angere Site vor Kamera vo üsem Titelbild :) Link zu Julies Lieblingsstand-up-Clip vom Daniel Sloss über Religion: https://www.youtube.com/watch?v=PZ5aILCKz8Y

Mir starte „gstabig“ i di neui Foug und knacke när dr Mythos hinger Persönlichkeitstests. Werum sisi fasziniderend, obwou d Wüsseschaft mängisch o dr Kopf schüttlet?Di Foug isch zwüsche unterhautsamer Säubstanalyse und echtem Deep Dive. Wo öffne settigi Tests d Ouge? U sisi eventuell mängisch o gfährlich ischränkend?Wie versproche no dr Link zu de 16 Personality-Test: https://www.16personalities.com/de

Kennsches? Du wartisch ufne Bscheid ob die neui Stell becho hesch oder nid. Usem nüt bechunnsch ä mega härzigi Nachricht vo öbberem wod scho lang nüm gseh/ghört hesch. Es zeigt dir ah, dass dir öbber ä 3-minütigi Sprachnachricht gschickt het. Settigi Situatione chöi richtig toll si oder oh richtig müesam. Ghöre unerwarteti Ahrüef vo fremde Nummere für di oh zu de schlimmste Kommunikationsmomente? Obwous ke gnaui Wüsseschaft isch, gits wahrschinlech doch einigi Momente wo mir üs kollektiv einig si, wo bsungers schlimm si oder äbä oh nid.

Mir starte fasch scho chli bünzlig i die Foug: Nämlich mitem Mürggu. Ds Bärndütsche Wort vom Tag öffnet schomau ds eint oder angere Fass u när gumpä mir i zwöi klassischi Kommunikationsmodell: Ds Kommunikationsquadrat vo Schulz von Thun und d Axiom vo Watzlawick. Si die Modell no gültig im 2026? Spiele si ke Roue meh oder sisi aktueller den je? Finge mirs zämä use..

Mir rume uf. I dere Episode bespreche mir die bekanntischte Klischées zu Introversion und Extraversion. Wo mir üs selber uf dr Skala gseh erfahret dir oh. Spannend wirds, wenn mir versueche Bruefsgruppene uf dem Spektrum z platziere. Und obwohl me nie ganz z einte oder z andere isch, si oh Julie und Fabian nid ganz freigstellt vo de Stereotype, wo die Persönlechkeitsmerkmal begleite.

Wieso verliere mir so oft ds „grau“ und flüchte is schwarz-wiis-dänkä? Mir versueche usezfinde wele Ihfluss Algorithmä hei uf die omnipresänti Meinigsmachi.. Werum füehlt sich üses mitenang hüt so brüchig ah? Mir sueche i derä Wäut z verlornig gloubte „grau“.. Äs isch äs Plädoyer für meh Muet u meh wieder-ufenand-zuega, aus üs no meh la spaute. Echte Diskurs isch ke Sieg über di angeri Person, sondern ä gmeinsami Reis ids Unbekannte.

Wenn Ching mit sech selber rede, isch das z normalste vor Welt. Wenn ä erwachseni Person das macht, würde mir villech chli weniger entspannt druf reagiere. Das Stigma isch aber völlig nid berechtig. Wer mit sech selber redt, isch nid wirr im Chopf - im Gegeteil. Wo üs Selbstgspräch am meiste nütze und weli Personegruppe ihre Erfolg oh chli abhängig drvo macht, erfahret dir hie.

Isch Mitleid eigentlech nur ä Form vor herablassender Arroganz? Isch authentisch si eigentlech nur äs Schutzschild vo fulä und unhöfleche Lüüt? Und: Isch Bluet villech nid dicker als Wasser? Mir diskutiere die Thesene, wo üs KI het generiert. Die triggere üses Ego, Empathie und töifi soziali Wurzle..

D Fortsetzig vor Episode 12 mit de Warnehmigsverzerrer. Mir berede no die zwöi, wo scho letschdmau hätte söue dra cho und Julie het no eine zuesätzlech usgsuecht. Z Bärndütsche Wort vo dere Folg fingt dr Fabian wieder nid so toll und mir hei es luschdigs Missverständnis gad am Ahfang. Hoffentlech amüsieret dir euch so wie mir üs. Es geit dasmau um soziali Rollene, Heiligeschiin-Effekt, Negativität, Lüt ir Uniform, näb wellne Lüt mir im Zug würde hocke, Chüeh uf Milchpackige, Autoprüefig und Stress am Hochzitstag. Finget dir euch i eim vo dene Szenarie wieder? Mir si gspannt.

Wahrnehmigsverzerrer begleite üs, ob wir wei oder nid, jede Tag. I derä Foug erfahrsch 3 us üsere Sicht wichtigi Verzerrer, wo mir aui sötte kenne, um ä bewusstere Umgang mitenang chönne z läbä. Spoiler: Säubst we mir üs aus tiefgründig würdä betitlä, si mir leider z mindscht ide erste paar Sekunde sehr oberflächlech ungerwägs. Wasmer drgägä cha mache oder wie mir drmit umgö? Los dri, s blibt uf jede Fall spannend und wird persönlich i derä Foug.

Z Bärndütsche Wort löst bim Fabian unschöni Erinnerige usund oh Chätschgummi-Tattoos erlebe ih dere Episode es churzes revival. Drna rede mir drüber weli chline Veränderige ufemne sprachleche Level di chöi selbstbewussterlah würke. Z Wörtli «aber» bechunnt ziemlech viu Bühni dasmau. Mir decke paar Bescheideheit-Floskle uf und diskutiere drüber weli Wünsch bimne Genie ahbracht si und weli nid. Uf dummi Frage gits ja anschinend när aube dummi Antworte und wie müesam si bitte die Lüt wo berkomplizierti Sprach bruche, damit sie besser da stöh?

Mir schnappe üs dr Wäut-Bestseller «Der Alchemist» vom Paulo Coelho u disktutiere über: Werum ghöre mir nur das, was mir eigentlich o wöi ghöre? Werum isch z Handle am ändi vom Tag viu wichtiger aus die blanki Theorie? ⁠D Moderationserfahrig vo Julie isch dr best Bewis drfür, dases Muet brucht, öbbis Nöis uszprobiere. Genau i dene Momente aber, passiert d Magie. Dr wahr Schatz vo derä Folg: Du merksch ersch wed "ufem Weg" bisch, wos di häräzieht. Darum eifach mau mache..Shownotes zum Bärndütsche Wort vom Tag: ⁠https://www.sikypark.ch/

Wer het sech scho mau überleit, wie talentiert guetiSynchronsprecher:inne eigentlech müesse si? I dere Folg rede mir drüber, wo so Sprecher:inne ihgsezt werde und wie mir das villech gar nid so wahrnähme. Natürlech wird oh z Synchronschwümme churz thematisiert. Oh dr Donald Duck git ä churze Gastuftritt. Und wie absurd isches eigentlech, weme ire Serie äs Tier synchronisiert oder äsInsekt oder no besser: es Outo?I dere Episode heimer zerste Mau oh Fremdmaterial ihgsetzt,d Qualität chönnt aber chli besser si. Enjoy!

Niemer chunnt drum ume irgendwenn es kritischs Gspräch zfüehre. Nid glösti Konflikte göh uf Chöschte vo üsere innere Rueh, vo Beziehige und Qualität vom schaffe. Es hiuft ä Konflikt möglichst direkt und gli mau z löse und so Sache nid mit sech umezträge. Und wer vo euch kennts, dass eim diebeschte Argument immer lang nachdem z Gspräch düre isch ih Sinn chöme? Spannend isch, dases verschiedeni «Biases» git, wo bi Stritgspräch nid gad häufe. Und loset ine, we dir wöit wüsse, was dr Zämähang vor Fuesstellig und settnigeGspräch söu si.

Ersts Date, Bewerbigsgspräch, Gschäfts-Apéro, Meetings,Familieträff – das aues si Situatione, wome Smalltalk muess füehre. Es git ganz viu Aleitige, wieme Smalltalks cha meistere. Aber Julie und Fabian finge es chunnt immer mega druf ah wo dasd bisch, mit welne Lüt ids Gspräch chunnsch und was für Theme sech abiete. Was Ford mit Smalltalk z düe het und Tipps wiemer us unahgähme Situatione cha flüchte, erfahret dir ih dere Episode.

Mitemne länge Ihstig übere Früehligsbringer d «Söiblueme»göh mir när über ines Gspräch wos drum geit das Früecher aues besser isch gsi. Mir empfinges tatsächlech scho nid so, aber mir steue fest, dass mir beidi viu Vergliche zu Früecher mache was Sache wie Musig lose, Erreichbarkeit ufem Handy,zämä game und abmache mit de Kollege oder Kolleginne betrifft. Und wie sech d Kommunikation rundum dene Sache ständig veränderet.

Das schöne Wort im Titel bedütet: Redeangst. Viel Lüt bechöme schwitzigi Händ bir Vorstellig vor angerne Lüt z rede. Dr Atem geit flach, me verredt sech schnäu und d Nervosität isch höch. Aber werum isch das eigentlech so? Woher chunnt die Angst und was chöimer drgägä mache? Die guete Nöigkeite si: guet Rede chame lerne. Fabian und ig rede über Methode und Tipps, wo chöi häufe d Glossophobie z mindere.

Wieso triggere üs die chlinste Sache? Wenn söttme übere Konflikt rede und wenn isch Schwiege die besseri Option? Das si Frage, wo dr Fabian i dere Episode mitbracht het. Und wieso sis usgrechnet die Persone, wo üs amnöchste stöh, wo üs am meiste ufd Palme chöi bringe? Je meh Erwartige ume si, desto schwieriger gstaltet sech hüüfig d Kommunikation, steue mir fest.

Emojis si us dr hütige Zit und Kommunikation nümme wäg z dänke. Sie werde als Werbemittel brucht, uf Täsche, Pullis oder Bettwösch druckt und het sogar mau ä Film über se gäh. Wie bruchemer se und was nütze sie üs? Über das rede Julie und Fabian ih dere Episode.

Z Thema i dere Folg isch Emotionali Intelligenz. Respektiv zFehle drvo. Es geit um Persone, wo kes Gspüri für verschiedeni Situatione hei. Mir erkläre am Daniel Colemans Theorie zu de 5 Ebenine vor Emotionale Intelligenz. Da drus use entstöh vieli Theme, wie z «Rad der Emotionen» und wie chli üse Wortschatz zu Gfüehl eigentlech isch, Lüt wome fasch nid ines Gspräch cha verwickle und Introversion versus Extroversion. Üses Fazit vo dere Folg? Schnägge si Fätze.

Chli unbeholfe, aber doch ganz glunge füehre mir euch dür die ersti Folg. Mir steue üs vor, diskutiere über ussterbendi Berndütschi Usdrück und rede über Stimmnützig und Stimmentwicklig. Julie verzeut es Anekdötli vore Präsentationsvorlesig us ihrem Studium.