錦荔枝的滋味

來聽學者與聲音演員們一起回顧參與廣播劇製作過程。

今仔日，是雅惠結婚了後，頭一擺轉去後頭厝的日子，昨暝春仔是歡喜甲規暝攏無睏…

良仔娶如仔的彼一日，會使講是俊生仔佇新草衙上奢颺的時陣，來食桌的人是插插插，南北二路，烏白兩道，只要佮俊生仔in翁仔某有小可仔交陪的，攏有收著俊生仔的帖仔…

毋但是按呢爾，全草衙的人攏有聽著風聲，講，這个看錢足重的俊生仔，竟然共義仔所欠的筊數全還清矣，這个消息，比如仔欲嫁予良仔閣較予人料想袂到，予春仔佮昆龍仔這對翁仔某按怎想都想無……

自從知影嘉雄佇臺北的住址，麗君逐禮拜攏會寫一張批予伊，只是講，嘉雄從來毋捌回批予伊，予麗君若犀牛望月，一月望月一月，猶是等無批…

拗鬱的黃昏時…耀賢來大埤湖參加同窗會，伊毋但阻擋麗君跳大埤湖，閣講願意聽伊的心事。 耀賢的話，就若親像一線光，共麗君暗毿的世界，炤出一條路。

對青春活潑的少年家仔來講，相招去大埤湖烘肉、划船仔，會當講是彼當陣上蓋時行的活動，有誠濟人的初戀，甚至是人生的另外一半，攏是佇這款聯誼的活動當中…

昆龍仔歡喜甲規暝攏睏袂去，春仔嘛是仝款，感覺過去的日子歹度是歹度，毋過有這款知影有孝的後生，未來的日子，總算有通好向望矣。

這一工，錦雀仔閣佮俊生仔為著選舉的代誌，又閣起冤家，伊共俊生仔對厝裡趕出去，姑不而將，俊生仔只好來新草衙的服務處先跍一暝。

原底全草衙的人攏咧想，親像俊生仔本落甲遮爾重，這改選里長，百面是穩牢的，煞想袂到，票聲一開出來，當選里長的，竟然是無聲無說的古物商「財仔」，予地方上的人攏誠意外，尤其是春仔佮昆龍仔這對翁仔某。

不時㴙㴙滴的雨水，嘛是仝款咧提醒草衙人，藏佇平靜生活內底的困難，這个時節過了後，連鞭就欲出來蟯蟯趖，就算你無想欲看，嘛無才調跳過、閬過……

佇二九暝的這工透早，天猶袂光，款欲過年的人就挨挨陣陣，共菜市仔kheh甲強欲出汁，每一擔攏誠搶市，跤手若傷慢，小頓蹬一下，較好的貨色，連鞭就予人搶了了

咱這齣｢錦荔枝的滋味｣，描寫的佇民國七八十年代，發生佇高雄新草衙這个所在故事，現在，請你共你的耳空借我，予咱綴咱新草衙的這幾个小人物，閣一擺，行轉去早前，彼段充滿鹹、酸、苦、澀各種滋味的日子