Argoment

La gjornaliste Anna Piuzzi e je rivade in finâl al Premi Luchetta te sezion Rote Balcaniche, in gracie di un reportage che e à scrit dopo di un viaç in Bosgne fat tal Mai dal 2025.In cheste pontade dal Argoment Piuzzi nus conte cemût che chest viaç al è nassût e si è davuelzût, e di cemût che lis storiis dai migrants di cumò no son cussì diferentis di chês des vitimis de vuere dai Balcans dai agns Novante.

Cheste pontade e je dedicade a RispettAMI, un progjet che l'istitût Zanon di Udin al à metût sù dopo dal feminicidi di Nadia Orlando. Il progjet al ten dentri une serie di ativitâts di educazion ai sintiments e su la paritât tra om e femine par cirî di prevignî la violence di gjenar, che a vegnin proponudis a students e studentis sedi dentri che fûr de scuele.A contâ cheste esperience devant dai microfons di Onde Furlane a son vignûts trê students - Tommaso, Christian e Vanessa, compagnâts de professore Tiziana Tibalt. 

Cheste pontade e je stade dedicade al caporalât. Ai microfons di Onde Furlane a son intervignûts l'agricultôr Zubair Sharif e la sindicaliste de Flai Cgil di Pordenon Pashmin Kaur. Zubair Sharif al è une des personis che, dopo di jessi stadis sfrutadis intai vignâi dal Friûl ocidentâl, a àn decidût di domandâ jutori al sindicât e di denunziâ i caporâi. La pontade e partìs de storie personâl di Zubair Sharif par resonâ di sfrutament, di ignorance ma ancje di fiducie. 

La pontade e je dedicade al teme de citadinanze. Ospite de prime part de trasmission e je Federica Micoli, avocade e socie di ASGI (associazion studis juridics su la imigrazion), che e spieghe cemût che un citadin forest in italie al pues acedi ae citadinanze, cun ce timps e cun ce proceduris. Te seconde part invezit a intervegnin Eduardo Baschera e Noemi Salva, citadins argjentins fîs di talians che a àn di pôc cjapade la citadinance. A fevelin de lôr esperience, comentant ancje lis normis relativis aes personis che a àn vons (ancje ae lontane) di chenti. 

Cjapant spont de serie tv "Adolescence", in cheste pontade si fevele dai efiets des rêts sociâls su lis personis, de salût mentâl dai zovins, ma ancje dai istitûts di pene par minôrs. Ospits: il prof. Luca Chittaro, co-autôr di "Le illusioni dei social media" e il referent regjonâl de associazion Antigone Francesco Santin. 

Ta cheste pontade o metin in onde la regjistrazion dal intervent che la prof. Antonella Astori e à fat ae cunvigne "Facciamo il punto sul Tagliamento" che si è tignude ai 4 di Zenâr 2025 a Enemonç. La prof.sse Astori, gjeolighe, e spieghe cuai che a son i fatôrs che a puartin ae esondazion dal Tiliment te Basse furlane, cuntune voglade al progjet de travierse di fâ sul Tiliment a nivel di Dignan. 

Il prof. Andrea Goltara,diretôr dal CIRF, al presente la petizion firmade di cetancj esperts internazionâi pe tutele de naturalitât dal Tiliment. Al spieghe ancje parcè che fâ sù une travierse sul Tiliment a nivel di Dignan no je une buine idee. 

Te pontade si presente il podcast "Il cuore scoperto", che al è il risultât di une iniziative cjapade di un grup di zovinis di plui parts de Italie par voltâ par talian il podcast francês "Le coeur sur la table". I temis a son lis relazions di amôr e di afiet, lis disuvualiancis, il ses, e ancje i prejudizis che (voiis o no) a stan ae fonde dal nestri rapuartâsi cun chei altris.