Ныло-пиё

😵 Кӧня пол нуналаз тӥ косӥськоды нылпидэс бервылзэ утялтыны? Огпол но ке уд, тӥ - суперанай. А ми - ӧвӧл 😃. Но туж луэммы потэ. Соин 5-тӥ выпускамы вераськомы - кызьы дышетыны пиналъёсмес асьсэды чакланы. ❓Милемын ӵош та юанлы валэктон утчазы "Мынам Удмуртие" телерадиокомпанилэн эфирысьтыз кизили Вероника Ваулина но 255 номеро нылпи садысь психолог Зоя Кутявина. Вераським: - ку кутсконо дышетыны нылпиосты самообслуживанилы? - тыроно-а соослы ужамзы но дышетскемзы понна уксё? - мар кароно, коркан пазям носкиос но миськымтэ тусьты-пуньы медам луы шуыса? - люкето-а, юртто-а тусьты-пуньы миськон машинаос но робот-пылесосъёс нылпи педагогикаын?

💣 "Тырмоз мультик учкыны!", "Кӧня компьютер сьӧрын пукиськод ини?", "Пот со шудонысьтыд!". Ӝутэ кидэс, тӥ нылпиостылы та кылъёсты вералляськоды ке. Ми но. Нуналмысь. Соин ик вылез выпускмы анай-атайёс, нылпиос но гаджетъёс сярысь. 👍🏻 Туж тунсыко куноосын - Кун Кенешысь ялан ужась комиссилэн кивалтӥсеныз, Удмурт Кенеш огазеяськонлэн тӧроеныз, Татьяна Витальевна Ишматоваен но Удмурт кун университетысь дышетӥсен, психологен, Ольга Ильинична Смирноваен - ми кенешим: - кызьы валаны - ку гаджет мултэс ини; - кызьы куаретытэк нылпиослэсь экранэн ӵош ортчытэм дырзэс кулэстыны; - мар кароно, пиналъёслэсь интернетын пукемзэс пайдаё карон понна. 🎤 Котьку сямен вераським "покчи экспертъёсын", анайёсын, та рад юалляським атайёслэсь но. Кылзэ пумозяз - самой ческытэз - отын!

Выль куноосынымы - Кузебай Герд нимо гимназилэн кивалтӥсеныз, "Билингва" проектлэн автореныз, филология наукаосъя кандидатэн, Татьяна Генадьевна Волковаен но тодмо удмурт азьветлӥсен, журналистэн, Александр Бикузинэн ӵош билингвизм сярысь вераськом. Кенешом, кыӵе амалъёсын луэ нылпиосты огдыре кӧня ке кыллы дышетыны, мар кароно, пиналлэн огеныз кылын вераськыны мылкыдыз ӧвӧл ке. Вераськом билингвизм пумысен кылдэм «мифъёс» сярысь, кудӥз соос полысь – зэм, нош кудӥз – ӧвӧл. Асьсэлэсь визь-кенешъёссэс, дэмланъёссэс сётозы мукет анай-атайёс, кунгож сьӧрын билингв нылпиосын ужась дышетӥсьёс, удмурт кылэз дышетэмзы сярысь вералозы городын будэм удмурт нылпиос.

Подкастмылэн кыкетӥ выпусказ вераськом - ӵем-а ми шуиськом пиналъёсмылы "Уг яра!" но кылзӥсько-а соос милемыз. Куноосынымы - К. Герд нимо нылпи садысь воспитателен Анюта Калашниковаен но тодмо удмурт кырӟасен Наталья Ушаковаен ӵош кенешомы: мар карыны ми ум лэзиське нылпиосмес, мар каро нылпиосмы, куке соослы мар ке уг яра, но мар кароно, покчиосын огкыл шедьтон понна.

Нырысетӥ выпускамы ми вераськом - кызьы ганяк но капчи мылкыдо анай-атай луыны, куке нылпиослэн висъетазы нош ик ваньмыз пушкытэмын, ӝуклэн зыныз соослы уг кельшы, дорысь ужзэс лэсьтэмзы уг поты, ураме потамзы бере штанзы нош ик кускозязы дэри. Асьсэлэсь та пумысен мылкыдъёссэс вералозы куноосмы - дышетӥсь, кылысь кылэ берыктӥсь Наталья Дмитриева но тодмо удмурт кырӟась Светлана Ручкина.