Pen yn y Gêm

Yn y bennod yma rwyf yn siarad gyda Tom Moore, sy'n paratoi i rhedeg 4 hanner marathon mewn 4 lleoliad gwahanol, mewn 4 diwrnod yn olynol. Mae Tom wedi gosod yr her yma i'w hun er mwyn codi arian ar gyfer Samariaid Cymru, a chodi ymwybyddiaeth am iechyd meddwl. I'w gefnogi, mae linc isod lle mae modd rhoi arian: https://www.justgiving.com/page/tom-moore-444?utm_medium=fundraising&utm_content=page%2Ftom-moore-444&utm_source=copyLink&utm_campaign=pfp-share Rydym yn trafod paratoadau Tom am y sialens, fel mae delio gyda heriau iechyd meddwl, a'r clwb pêl-droed mae e'n ei garu, Abertawe. Mwynhewch y bennod!

Yn y bennod hon rwyf yn siarad gyda Stephen Rule, neu Doctor Cymraeg.   Gyda bron i gan mil o ddilynwyr ar wefannau cymdeithasol, mae’r Doctor Cymraeg yn un o wynebau mwyaf adnabyddus y byd dysgu Cymraeg.   Dechreuodd Stephen ei gyfrif Trydar ‘Doctor Cymraeg’ yn 2020, ac erbyn hyn mae wedi helpu miloedd o bobl i ddysgu’r iaith mae e’n ei garu.   Daeth Stephen o deulu di-Gymraeg, ac ar ôl dysgu’r iaith, aeth ati i geisio helpu eraill ar y daith o ddysgu iaith newydd.   Mae Stephen hefyd yn gefnogwr enfawr o glwb pêl-droed Wrecsam, ac ar ôl i sêr Hollywood ddod yn berchnogion y clwb yn ddiweddar, mae Stephen yn rhannu rhai o’r uchafbwyntiau ac isafbwyntiau’r newid i gefnogwr ffyddlon fel ef.   Yn o gystal, rydym yn trafod y broses o ddysgu iaith newydd, yr effaith seicolegol mae diffyg hyder yn gallu cael, a’r daith anhygoel mae Stephen arni fel y Doctor Cymraeg.   Cofiwch ddilyn y podlediad os ydych yn mwynhau’r cynnwys!   Mwynhewch y bennod yma o Pen yn y Gêm!

Yn y bennod yma rwyf yn trafod gydag Owain Tudur Jones, cyn chwaraewr pêl-droed proffesiynol, cyflwynydd Heno ar S4C, a pundit pêl-droed ar raglen Sgorio S4C. Bu chwarae Owain i sawl tîm ledled Prydain, gan gynnwys cyfnodau yn chwarae yng Nghymru, Lloegr, ac yn yr Alban. Yn ogystal, bu chwarae dros ei wlad ar sawl adeg, yn ennill 7 cap dros Gymru. Yn anffodus, brwydrodd Owain gydag anafiadau trwy gydol ei yrfa, a bu anafiadau a gwendid i'w ben-glin yn ei orfodi i ymddeol yn 30 oed yn 2015. Ers hynny mae Owain wedi camu mewn i ddiwydiant y cyfryngau yn naturiol. Ers dechrau ei yrfa yn y cyfryngau mae Owain wedi cyflwyno podlediad The Long Man's Football World Podcast, a chyd-gyflwyno Y Coridor Ansicrwydd gyda Malcolm Allen. Mae hefyd yn gyflwynydd ar raglen S4C Heno, ac yn pundit ar raglen pêl-droed S4C, Sgorio. Rwyf yn siarad gydag Owain am ei brofiadau yn chwarae i'w glybiau a dros ei wlad, yr effaith corfforol a meddyliol cafodd anafiadau arno, ei ymddeoliad a'r symudiad i ddiwydiant y cyfryngau, a'r chwaraewyr gorau mae erioed wedi chwarae gyda. Cofiwch ddilyn y podlediad os ydych yn mwynhau'r cynnwys! Mwynhewch y bennod yma o Pen yn y Gêm!

Yn y bennod hon rwyf yn siarad gyda chyn-bêl-droediwr Manchester United, Rhodri Jones. Roedd Rhodri wedi ymuno gydag academi’r clwb yn 1996, ac yn rhan o gyfres S4C ‘Giggs, Rhodri a Beckham’ yn y flwyddyn 2000. Ar ôl sawl anaf, bu rhaid i Rhodri ymddeol o bêl-droed yn ifanc iawn, ac erbyn hyn mae’n hyfforddi meddyliau actorion, pobl busnes, a mwy! Dwi’n gofyn i Rhodri am ei amser yng nghwmni Syr Alex Ferguson yn Man U, serennu mewn rhaglen S4C, y broses o ymddeol, a’r hyn mae’n gwneud erbyn hyn ar ôl pêl-droed. Paratowch am raglen llawn straeon diddorol, chwerthin, emosiwn a chyngor ysbrydoledig. Cofiwch ddilyn y Pod, a mwynhewch y bennod yma o ‘Pen yn y Gêm’.

Helo, fy enw i yw Jack Thomas, a chroeso i bodlediad Pen yn y Gêm. Yn y podlediad yma byddaf yn siarad ag amryw o bobl o bob ban y wlad am eu profiadau gyda chwaraeon. O bêl-droedwyr y Premier League i Enillwyr aur yng ngemau’r Olympaidd, bydd rhywbeth i bawb ar y podlediad yma. Dwi am ddysgu am yr effaith mae chwaraeon yn cael ar iechyd meddwl, ac yn bwriadu dysgu o’r goreuon, fel mae cael eich pen yn y gêm! Os ydych chi yn edrych ‘mlaen i glywed mwy, dilynwch y pod ac ymunwch â’n tîm. Diolch i chi, mi welai chi cyn hir.