MT - Storja u Fatti

It-Trattat ta’ Maastricht, uffiċjalment magħruf bħala t-Trattat dwar l-Unjoni Ewropea, ġie ffirmat fis-7 ta’ Frar 1992, f’Maastricht, fin-Netherlands, mit-12-il Membru tal-Komunitajiet Ewropej ta’ dak iż-żmien. Daħal fis-seħħ fl-1 ta’ Novembru 1993, wara li ġie rratifikat mill-Membri kollha.It-Trattat ta’ Maastricht stabbilixxa formalment l-Unjoni Ewropea, u ttrasforma l-Komunità Ekonomika Ewropea f’unjoni aktar koeżiva u komprensiva. Introduċa wkoll iċ-ċittadinanza tal-Unjoni Ewropea.

Fil-11 ta’ Lulju 1995, il-forzi Serbi Bożnijaċi, immexxija mill-Ġeneral Ratko Mladić, ħadu taħt idejhom il-belt ta’ Srebrenica fil-Lvant tal-Bożnija, li kienet ġiet iddikjarata Żona Sikura tan-Nazzjonijiet Uniti. Fil-jiem ta’ wara, aktar minn 8,000 Musulman, l-aktar irġiel u subien, ġew sistematikament maqtula u midfuna f’oqbra tal-massa. Eluf ta’ nisa, tfal u anzjani ġew deportati bil-forza. Bejn 20,000 u 50,000 mara u tifla sofrew vjolenza sesswali. In-Nazzjonijiet Uniti ddeskrivew il-ġenoċidju fi Srebrenica bħala l-agħar reat fuq art Ewropea mit-Tieni Gwerra Dinjija ’l hawn.

F’dan l-episodju, se nidħlu fl-istorja Ewropea biex niċċelebraw avveniment ewlieni: l-20 anniversarju mill-akbar tkabbir tal-UE. Fl-1 ta’ Mejju 2004, għaxar pajjiżi fil-qalba tal-Ewropa ssieħbu fl-UE, u żiedu disa’ lingwi ta’ ħidma uffiċjali ġodda tal-UE. Dan kien mument ta’ ċelebrazzjoni, għaqda u opportunitajiet bla limitu.

Il-kummerċ transatlantiku tal-iskjavi jirrappreżenta kapitolu mudlam u ta’ uġigħ fl-istorja tal-bniedem li dam għaddej ’il fuq minn 400 sena u li laqat aktar minn 15-il miljun persuna. Minkejja li l-iskjavitù tneħħiet, l-ideoloġiji razzisti għadhom jippersistu u għadhom sal-lum il-ġurnata jkomplu jsawru attitudnijiet u mġiba diskriminatorji. Inizjattivi bħall-Jum Internazzjonali tan-Nazzjonijiet Uniti għat-Tifkira tal-Iskjavitù u tal-Kummerċ Transatlantiku tal-Iskjavi kif ukoll il-Ġimgħa tal-Unjoni Ewropea Kontra r-Razziżmu u favur id-Diversità għandhom l-għan li jqajmu kuxjenza, jippromwovu l-ugwaljanza u joħolqu soċjetà aktar inklużiva.

Iż-Żona Schengen tkopri t-territorji ta’ sebgħa u għoxrin pajjiż Ewropew. Dawn jinkludu tlieta u għoxrin Stat Membru tal-Unjoni Ewropea, flimkien mal-Iżlanda, il-Liechtenstein, in-Norveġja u l-Iżvizzera. F’din iż-żona, huwa possibbli li tivvjaġġa liberament minn stat għall-ieħor, mingħajr ma jsirlek ebda kontroll fil-fruntieri. Dan kollu beda fl-1985, meta ħames Stati Membri tal-Unjoni Ewropea ddeċidew li jabolixxu l-kontrolli fil-fruntieri interni.

Fl-2005, fis-60 anniversarju mil-liberazzjoni ta’ Auschwitz, riżoluzzjoni tan-Nazzjonijiet Uniti mmarkat is-27 ta’ Jannar bħala l-Jum Internazzjonali annwali ta’ Kommemorazzjoni b’tifkira tal-vittmi tal-Olokawst. Il-kelma “Olokawst” ġejja mill-Grieg u tfisser “sagrifiċċju bin-nar”. Din tintuża biex tiddeskrivi l-persekuzzjoni u l-qtil tal-massa sussegwenti ta’ 6 miljun Lhudi fl-Ewropa mir-reġim Nazista u l-kollaboraturi tiegħu. Bejn l-1933 u l-1945, gruppi oħra kienu wkoll fil-mira tar-reġim Nazista u l-alleati tiegħu, inklużi l-persuni Rom, il-persuni b’diżabilità, il-persuni Slavi, kif ukoll l-omosesswali, u l-membri ta’ ċerti gruppi reliġjużi u politiċi.

Dar ħelwa bis-saqaf tat-tiben u bil-purtelli ċelesti, imkennija f'park mimli siġar qrib Pariġi. Kif tista' timmaġina li f'din id-dar tal-familja tfasslu l-futur tal-Ewropa u postha fuq ix-xena internazzjonali? Madankollu, din id-dar kienet l-isfond tal-ħajja u l-ħidma ta' wieħed mill-arkitetti tal-Unjoni Ewropea tal-lum: Jean Monnet

Is-suq uniku huwa wieħed mill-aktar kisbiet importanti tal-integrazzjoni Ewropea u wieħed mill-muturi ewlenin tagħha. Is-suq uniku ġie stabbilit fl-1 ta’ Jannar 1993, u jippermetti li l-merkanzija, is-servizzi, in-nies u l-kapital jiċċaqilqu b’mod liberu fi ħdan l-Unjoni Ewropea. Mill-ħolqien tiegħu ’l hawn, is-suq uniku stimola l-kummerċ u żied l-importanza tal-Unjoni Ewropea bħala msieħeb kummerċjali fil-livell dinji. Jagħmel ħajjet iċ-ċittadini aktar faċli u jagħti spinta lit-tkabbir u l-kompetizzjoni billi joħloq opportunitajiet ġodda għan-negozji Ewropej.