Ufgläse

Wer kennt no d Katniss Everdeen us de Jugend? För eus händ sie und die ganzi Tribute von Panem Buech- und Filmreihe emel ganz en spezielle Platz im Gedächtnis iignooh. Aber au hött sind die Büecher no relevant, und mer händ jetzt s neuschte Prequel usenandgnooh: Sunrise on the Reaping, oder düütsch Der Tag bricht an, vode Suzanne Collins. De Protagonischt isch de Haymitch Abernathy, wo jo sicher einige vo eus scho bekannt esch. Göhnd mit eus mit i nostalgischi Abschweifige, philosophischi Überlegige und brandaktuelli Zämefassige rund um Panem. (Achtung, Spoilers!)

Mer verbreite die Folg grad mol echli Summer-Vibes, falls die be euch nonig aachoo sind. Das mol rede mer öber „Fast nichts all inclusive“, s Debüt vom Schwiizer Schriftsteller Sagal Maj Čomafai, wo das Joohr im Verlag die brotsuppe erschine esch. Euses erschte Mol diskutiere öber Schwiizer Debütliteratur, yay! Das Buech nimmt eus mit inen Existenz, wo schaffe chlii- und Ferie grossgschribe wärde, wo Gränze und soziali Konventione hinderfrogt wärde und wo Ässe ganz fescht gnosse wird, allerdings miteme liechte Biigschmack devoo, das das alles jederziit chönnt i sech iistürze.

„I‘m Glad My Mom Died“ (aso: Ich be froh, das miis Mami gstorbe esch) esch wahrschiinlech ned en Satz, womer hüüfig ghöört. D Jennette McCurdy hett ihrem Memoir/Autobiografie aber gliich de Titel geeh. Mer - und vellech au du - kenne sie us iCarly, wo sie ide 2000er uf Nickelodeon d Rolle vode Sam verkörperet hett. 2022 hett sie denn das Buech veröffentlicht, womer das mol dröber rede. Und doo chöme ganz vell Sache vor, womer sech dazumols gar ned hätt chönne vorstelle. Sie verzellt vo ihrere toxische Beziehig zu ihrere Muetter, devoo, das sie eigetlech gar nie hett welle schauspielere, und vo all dene psychische Folge, wo ihri Chindheit und Jugend spööter för sie gha händ. Es esch ned en eifachi Reis, womer doo met de Jennette macht, aber sie sött ghört wärde.

Was wär der wichtiger? Das diis Chind intelligänt isch, oder dases nätt esch? Das esch eini vode Frooge, wo eim im Myers-Briggs Persönlichkeitstescht gstellt wird. Und sie esch au relevant in Bezug uf de Roman, womer dasmol bespräche: „Flowers for Algernon“ vom US-amerikanische Schriftsteller Daniel Keyes. Das Buech hämmer im Änglisch ide Kanti damals gläse, und mer finde d Thematike bes hött relevant. Und ned nome mer, das Buech esch ned nome en Bestseller, sondern mittlerwiile au zumene moderne Klassiker worde. Es gooht um de Charlie, en Maa i siine 30er mit eme underdurchschnittleche IQ. En Operation am Hirni söll de IQ signifikant erhöche. Als Prototyp för das, wo sie met em Charlie vorhänd, bruuche die zueständige Wösseschaftler en Labormuus, de Algernon. Die beide wärde zu Frönde, Wäggfährte und irgendwenn Liidensgenosse. Und das Buech looht eim met ganz vell Frooge zrogg, womer schlussändlech cha draa ume studiere, zum Biischpel: Wie wichtig esch Intelligänz? Goohts eim wörklech besser, wenn mer alles weiss und verstooht? Wie wiit döff d Wösseschaft gooh?

Das mol bespräche mer zum allererschte Mol in voller Längi es Graphic Novel, aso en Comicroman! Und zwar „The Magic Fish“ vo Trung Le Nguyen. Das esch s erschte Wärch vo Trung Le Nguyen, wo sech au „Trungles“ nennt, und es esch 2020 usechoo. Es sind mehreri Gschichte i einere, wel s Buech verwäbt d Haupthandlig met verschidene Märli, wo d Hauptfigur, de 13-jährig Tiên, zäme met siinere Muetter, de Helen, list. Usserdem hett d Helen Migrationserfahrig, sie esch vor es paar Joohr us Vietnam uusgwanderet, und au us dere Ziit chöme gwössi Elemänt im Buech vor. Zwösche em Tiên und siinere Muetter gitts en Sprachbarriere: Sie kommuniziert vor allem uf vietnamesisch, er vor allem uf englisch. So weiss er au ned rächt, wie er ihre söll mitteile, das er schwul esch. Das alles esch begleitet vo schöne, härzige, teils sehr detaillierte Bilder, wo de Comicroman zu dem mache, was er esch. Losed ine för meh Details und eusi Meinige zum Buech.

Wer isch A? Die wos au gluegt händ, wössed grad, um wases das mol gooht: Pretty Little Liars - en Serie, wo eusi Jugend massgeblich prägt hett. Die meischte kennes wahrschiinlech - wie au mer zersch - vor allem as Fernsehserie, aber es esch ebe au en Buechreihe. D Noelle hett sech die 18 Büecher vode Sara Shepard inezoge & verzellt jetzt de Jasmin und euch, was doo alles so für Sache passiere und wie sech das teilwiis sehr starch vo dene Handlige underscheidet, wo mer ide Serie kenne und liebe glehrt händ. Das ganze Pretty Little Liars Universum zeichnet sech dur Drama, Verbräche und teilwiis sehr unlogischi Handligssträng uus. Mol luege, öb ehr am Schluss no druus chömed. :)

D Isabel Allende esch die spanisch-sprochigi Autorin met de meischte verchaufte Büecher (jetztige Stand). Sie chonnt us Chile, wohnt mittlerwiile ide USA, hett ihre erschti Roman met 39i gschribe, hett de magischi Realismus mitprägt, und flächtet immer weder Feminismus i ihri Wärch ii. Usserdem isch ihri Familiegschicht äng mit de chilenische Nationalgschicht verbunde. Ihres Wärch isch resig - im Umfang, ide Popularität und au ide Theme wos behandlet. Mer händ eus jetzt zum erschte Mol drinine gwoogt: D Noelle hett „A Long Petal of the Sea“ gläse und d Jasmin „Violeta“. Beides sind neueri Roman vo ihre womer als historischi Fiktion chönnt iiordne. Vill Spass bim Lose.

Händ ehr au schomol eifach gaaanz lang welle schloofe, zum euch nömm müesse met euchne Problem beschäftige? Öppe so goohts de Protagonischtin im Roman „My Year of Rest and Relaxation“ vode Ottessa Moshfegh. Andersch as die meischte Lüüt, wo so en Gedanke vellech mol händ und denn weder verwärfe, zieht sies denn aber wörklech dore. Mit de Hilf vo immer stärchere Schloofmittel und eme halbwägs durchdachte Plan chonnt die namelosi Protagonischtin a ihres Ziil. Aber met was för Näbewörkige? Es verstörends, amüsants, einzigartigs Buech. Mer bringes der nöcher.

Mer begäbe eus mol wieder literarisch ines neus Land, das mol isches Südkorea. Mer bespräche nämmlech de Bildigsroman „Mandel“ vode Won-Pyung Sohn. De Protagonischt isch de Yunjae, en Teenager wo es ussergwöhnlechs Hirni hett: Siini Amygdala, wo förd Emotione zueständig sind, sind sehr vill chliiner as be andere Lüüt. Dorom füehlt er weniger Emotione und cha sie weniger zueordne. En Tragödie i siim Umfeld und zwöi Bekanntschafte ide Schuel füehre aber dezue, das er immer meh Interesse draa hett, Emotione vo andere z‘verstooh und sie vellech sogar sälber chli meh z‘gspüüre.

Yay, die erschti Ufgläse-Folg im 2025! Mer rede passend zum Johresaafang über uufregendi Ziite, nämmlech öber s Buech „Exciting Times“ vode Naoise Dolan. Sie isch en irischi Autorin und de Roman isch ihres literarische Debüt. Die 22-jöhrigi Ava us Dublin gooht uf Hong Kong, zum det änglisch underrichte. Einersiits, wel das no cool tönt, anderersiits aber au, wel sie eifach nüüt bessers ztue hett. Sie lehrt de Julian kenne, sie lehrt d Edith kenne, und am Schluss ergitts au Sinn, werom das ufem Buechcover drüü Zahbürschte z gseeh sind. Losed ine zum erfahre, wie das Ganze siin Lauf nimmt und wie mer s Buech wörde bewärte.

Ho, ho, ho! Hoffentlech sind ehr scho voll ide Wiehnachtsstimmig und händ Luscht uf en Gschicht, wo super zu dere Johresziit passt! Mer händ "Hercule Poirot's Christmas" vode Agatha Christie gläse, behandle aso das mol ganz en ikonischi Autorin und au eini vo dene ikonische Figure wo sie erschaffe hett, de Detektiv Hercule Poirot. Er wird au a Wiehnachte ned vo Verbräche verschont, sondern wird ines englisches Landhuus grüeft zum en Mord goh ermittle. Wenn ihr aso ned so Fans sind vo kitschige Wiehnachtsgschichte, denn isch de typischi Agatha Christie Krimi wahrschiinlech die besseri Wahl för euch. Vell Spass, ehr ghöred eus weder im neue Joohr!

Hallo ehr schnügis! Euses Podcast-Baby, aso Ufgläse, hett jetzt siin erschte Geburtstag gha. Dorom reflektiere mer doo chli öber die tolli Ziit womer bis jetzt scho met dem Podcast gha händ & wases no tolls ide Zuekunft wird geeh. Aber mer tüend ned nome öber euse Podcast rede, sondern natürlech au direkt öber Literatur. Mer stelle enand je es Buech vor, wo die ander Person noni gläse hett, aber no läse sött. Be de Noelle esch das „The Simple Wild“ vode K.A. Tucker, und bede Jasmin „Displacement“ vode Kiku Hughes (öbrigens s erschte Mol, dasmer doo öber es Graphic Novel rede). Danke euch, wie immer, förs Zuelose, und hoffemer dases no ganz vell wiiteri Joohr Ufgläse wird geeh!

2/2 vo eusere chliine „Dark Academia“ Reihe: Hmmm… komische Titel das mol, oder? Passe irgendwie ned zäme, die Wörter? Momol, passe alli perfekt zu de Mona Awad ihrem Roman „Bunny“. Das Buech esch ned ganz so typisch för Dark Academia wie s letschte womer doo besproche händ, aber es spilt ufeme Campus vonere elitäre Uni und es gooht teilwiis um dunkli Thematike… das sind scho gnueg Kriterie för eus. In „Bunny“ goohts ums Schriibe, um Fantasie wo sech is ächte Läbe iischliicht, um Verbräche, um Unmöglechs und Übernatürlechs. Es esch alles met Bluet und Zuckerguss verziert. Es gitt Horror-Elemänt i dere Gschicht, aber noni grad so dasmer nochhär nömm cha schloofe. Glaub eus, so es Buech hesch noni gläse. Mer verroote einigi Sache öber de Plot, aber s Ändi spoilere mer ned, kei Angscht.

De Herbscht esch doo! Eusi liebschti Johresziit. Dorom hämmer gfonde, tauche mer grad voll id Herbscht-Stimmig ine. Nämmlech met ere chliine Reihe zu „Dark Academia“. Dark Academia isch en Ästhetik und es Büecher-Genre, wo sech vor allem dur Tiktok manifestiert hett. Es isch mysteriös, dunkel (natürlech) und zieht eim voll ine. Meischtens spilts a Universitäte und es gooht um Studis wo öppis studiere wo sie Füür und Flamme deföör sind. Und hüüfig gitts en Kriminalfall, wo i die Gschichte verwobe wird. Genau so es Buech esch „If We Were Villains“ vode M.L. Rio. Es gooht um siebe Theater-Studis anere Elite-Uni in Illinois. Wie sie immer meh zu dene Figure wärde wo sie spile und wie sie irgendwenn nömme siebe, sondern nome no sächs sind… Los ine! Es gitt es bitzeli Spoiler, aber mer verroote be wiitem noni alles. Sött also au okay sii, wennd s Buech noni gläse hesch. Das isch Teil 1/2 vo eusere Reihe zu Dark Academia.

Das esch 2/2 vo eusere chliine Japan-Serie. Es gooht das mol um „Kitchen“ vode Banana Yoshimoto (und nei, sie heisst ned bürgerlech „Banana“ zum Vorname). D‘Jasmin hett das Buech gläse, während sie in Tokio gsii esch, wo s Buech au spilt. D‘Noelle hett i dere Ziit ide Schwiiz uusgharrt. Jetzt sind beidi weder vereint zum öber das churzwiilige, bittersüesse und faszinierende Buech z rede. In „Kitchen“ goohts natürlech sehr vell um deliziöses Ässe und über d Chochi as Ort vode Begägnig und em Zämesii, es gooht aber au immer weder um Schicksalsschläg wo ide Protagonistin ihrem Läbe und i ihrem Umfeld passiere. Nimm der öppis feins z‘ässe und los ine!

Wel d‘Jasmin im August/September in Japan isch, hämmer gfonde, mer mache en chliini Japan-Reihe. S erschte Buech wo doo dezue ghört esch „No Longer Human“ vom Osamu Dazai. I dem churze Roman goohts ums Läbe vomene japanische Maa - vo siinere Chindheit bis is junge Erwachsenealter. Das Buech zeigt die herti Realität vom Läbe uf en rächt extremi Art. Vellech esch das keis Buech för dech wenn Theme wie psychischi Chrankheite, Missbruch vo Substanze, Suizid oder allgemein Gwalt schwerig för dech zum läse sind. Eus esch uf jede Fall ufgfalle, das das Buech sehr vill Diskussionsstoff härgitt, au wenns rächt chorz isch. Es isch sicher us eme Grund en japanische Klassiker, es cha eim aber au wörkli rächt abezieh - dorom los die Folg, zum usefinde, öbs öppis för dech esch!

„We Were Liars“ vode E. Lockhart. Es Buech, wo eus scho sit eusere Kanti-Ziit begleitet und s zwöite Stück zu eusere chliine Sommer-Serie im Auguscht bildet. Es gooht um d Sinclair-Familie, sie send riich, privilegiert, wiss. Jede Sommer verbringe sie uf ihrere Privatinsle namens Beachwood. Wie die Sommer so usgsehnd wird in „We Were Liars“ vode Cadence Sinclair verzellt. Sie, ihre Cousin Johnny, ihri Cousine Mirren und de Gat, sind d „Liars“ wo im Titel vorchöme. Wieso sie so heisse? Los doch grad d Folg. Förd Noelle und d Jasmin esch das es Buech zum gnüsse, es super Sommerbuech met meh as gnueg Drama.

Ehr händs wahrschiinlech au scho gmerkt: Es esch Sommer! Mer händ gfonde, mer nämme das zum Aalass, Büecher z diskutiere wo sehr guet zu dere Johresziit & de dezueghörige Stimmig passe. S erschte esch jetzt das mol „Malibu Rising“ vode Taylor Jenkins Reid. Joo, i dem Buech getts einersiits - wie be eus im Titel stooht - Sommer, Surfe und Strand, aber au Familiedrama, Celebrity-Intrige und eifach ganz vell Underhaltig. Inelose und ineläse loohnt sech also.

Mer läse grad chli Büecher wo uf Booktok ghypet wärde. Dorom getts jetzt en Besprächig zu „Yellowface“ vode Rebecca F. Kuang. Es gooht um zwöi Schriftstellerinne, um d Verlagsinduschtrie, um Rassismus, um toxischi Internetkultur, um Diebstahl i mehrere Forme… und ganz vell meh. Das alles verzellt us de Sicht vode June Hayward, wo gliichziitig d Protagonischtin vo dem Buech und en unglaublech unzueverlässigi Erzählerin isch. Ide Buechrezensione wird au gseit „June is a character you‘ll love to hate.“ So händ mer das au empfunde. „Yellowface“ isch es Buech i eifacher, moderner Sprooch met teilwiis rächt wilde Handligssträng. Es underhaltet, regt aber au extrem zum nochedänke und diskutiere aa. Lieben wir!

De Friedrich Dürrenmatt: Es richtigs Urgestei vode Schwiizer Literaturszene. Wahrschiinlech kenne ihn fasch alli usem Düütschunderricht, womer siini Krimis und/oder Theaterstück gläse hett. Dorom send natürlech au mer ned dromome choo, mol öber ihn z rede. Mer diskutiere siini Krimis „Der Richter und sein Henker“ und siis Theaterstück „Die Physiker“. Usserdem rede mer nochli dröber, wie er so as Mönsch gsii esch.

Mer stiige ine Wält ii, womer definitiv schlächter draa wäre as doo… emel mindeschtens as Frau. Die dystopischi Wält isch die vo „The Handmaid‘s Tale“ vode Margaret Atwood. En Klassiker, wo sehr vell gsellschaftsrelevanti Theme uufbringt. Mer händ s Buech beidi gläse und sind fasziniert devoo, wie d Margaret Atwood s schafft, i relativ wenige Siite so vell komplexi Theme und en spannende Plot under ei Huet z bringe. Aber was macht die Wält in „The Handmaid‘s Tale“ (dt. „Der Report der Magd“) dystopisch? Was isch überhaupt en Dystopie? Und werom wämmer ganz wiit wäg devoo bliibe? Los ine. Achtung: Spoilers.

Das mol beschäftige mer eus met Internetkultur. Und zwar Internetkultur rund um Büecher (logischerwiis). Es gitt mittlerwiile uf allne soziale Medie Beriich, wo sech Lüüt uusschliesslech met Büecher beschäftige. Mer rede öber die Siite vo Tiktok und Youtube, und was fören Iifluss sie ufd Buechindustrie und d Läser*inne händ. Debii gäbemer natürlech au euse persönlechi Sänf dezue und analysiere, was de Literatur-Hype uf de soziale Medie för Pros und Contras hett.

Das mol goohts um en Autor, wo d Noelle und d Jasmin beidi sehr gärn läse und sogar zude Lieblingsautor*inne vo beidne ghört: De Khaled Hosseini. Er hett bisher 4 Büecher gschribe. I dere Folg goohts um 3 devoo: The Kite Runner, A Thousand Splendid Suns und And The Mountains Echoed. Alles Gschichte met sehr vill Plot, dorom wämmer ned zvell vorwägneeh und gähnd au i de ganze Folg so wenig Spoiler wie möglech. Mer wännd euch nämmlech dezue motiviere, d Büecher sälber z läse. Vor allem s erschte Buech vom Khaled Hosseini, the Kite Runner (Der Drachenläufer) isch lang uf de Bestsellerlischte vo änglischsproochige Büecher gsii und alli vo siine Büecher händ mehreri Millione Kopie verchauft. Theme wo bi ihm immer weder uufchöme sind s Uufwachse in Afghanistan, Beziehige zwösche Familiemitglieder und de Umgang mitem Chrieg. Aber Achtung: Die Büecher bringe wahrschiinlech be allne Lüüt ganz vell Emotione ufe.

Mer alli händ wahrschiinlech Sache a eus, womer ned schön, oder vellech sogar „hässlech“ finde. Förd Moshtari Hilal esch ganz klar: „hässlech“ heisst eigetlech so vell wie „hassenswert“. Und „Hässlichkeit“ (so heisst au ihres Buech) chonnt eigetlech vom Hass. Was händ eusi Schönheitsideal met Rassismus und andere Problematike ztue? Wer profitiert vo Schönheitsideal und wer liidet drunder? Und: wie chöne mer en Versöhnig finde zwösche dem, wie mer ebe sind und dem, wo mer vellech s Gfühl händ, mer söttes sii? D Jasmin hett „Hässlichkeit“ vode Moshtari Hilal gläse und redet met de Noelle über Theme usem Buech, wo sie wichtig findet.

De Ocean Vuong esch en junge amerikanisch-vietnamesische Autor wo ide USA wohnt. Er verarbeitet i siine Wärch s Trauma vo sech und siine Familiemitglieder. Er hett bisher de Gedichtband „Night Sky with Exit Wounds“, de Roman „On Earth We‘re Briefly Gorgeous“ und de Gedichtband „Time is a Mother“ veröffentlicht. Bald chonnt aber wahrschiinlech no en wiitere Roman, mer send gspannt. Mer händ beidi alles gläse, wo bes jetzt vo ihm veröffentlecht worde isch und gähnd euch Iiblick drii, wie er schriibt. Mer rede usserdem öber de Jasmin ihri Reis nach Vietnam, de Eurovision Song Contest und d Beyoncé. Vill Vergnüege!

Wer wird Millionärin? Aso mer emel ganz sicher ned. Mer händ eus för die Folg öppis chli anders öberleit: Mer wooge eus a zwöi verschedeni Quiz und am Schluss rede mer no öber es paar Büecher, womer no wännd läse. Mer send bem erschte Quiz sälber öberrascht worde, wel mer imene gwösse Fandom doch ned so drinne sind, wie mer immer dänkt händ…. Öberlegged euch doch be de Frooge amigs, was ehr wörded antworte, zum luege, öb ehr meh wössed as mer. Ond kei Angscht, mer wärde ned plötzlech zonere Quizshow. Nöchscht mol getts weder e typischi Ufgläse-Folg.

Die meischte vo euch händ wahrschiinlech schomol öppis vom James Baldwin ghört ond velli händ secher au scho öppis vo ehm gläse. Er ghört nämmlech (zo rächt) zo de berüemtischte amerikanische Autore. Mer händ vo ehm „Giovanni‘s Room“ gläse, e verzwickti Liebesgschicht zwösche zwöi junge Männer im Paris vode 1950er-Joohr. Falls ehr euch froge, was so guet isch ade Büecher vom James Baldwin, gett euch die Folg sicher mol en Idee. Osserdem ghöred ehr eus doo zum allererschte Mol i gueter Qualität, wel mer im Studio uufgnooh händ. Ellei scho för das lohnt sechs, inezlose. Öbrigens hämmer au probiert, so wenig Spoiler wie möglech iizboue, ehr chöned d Folg aso au lose, wenner s Buech nonig gläse händ ond s uf euchere TBR/uf euchem SUB händ.

Wenn ehr a "It Girls" dänked, wer chonnt euch i Sinn? Vellech d'Taylor Swift oder d'Miley Cyrus? Mer dänked natürlech au doo a Autorinne, und zwar send das d'Joan Didion und d'Eve Babitz. Mer rede i dere Folg echli über d'Biografie vo dene zwöi Schriftstellerinne, wo d'USA vode 1960er und 70er Joor massiv prägt und immer weder portraitiert händ und au nochher no as zwöi vode wichtigschte amerikanische Prosa-Stimme aagluegt worde send. Mer händ je eis Buech vo ihne gläse und stelles de andere Person und euch vor: D'Noelle hett "Slow Days, Fast Company" vode Eve Babitz gläse und d'Jasmin "Slouching Towards Bethlehem" vode Joan Didion. I beidne Büecher lehred ehr e Siite vo Kalifornie kenne, woner bes jetzt vellech noni vell devoo ghört händ.

Privet - hött machemer en Reis is Russland vom spötere 19. Jahrhundert. D'Jasmin gett de Noelle und euch en Iiblick i ihres Slavistik-Studium und verzellt vo drüü russische Klassiker: "Väter und Söhne" vom Ivan Turgenev, "Verbrechen und Strafe" vom Fëdor Dostoevskij und "Anna Karenina" vom Lev Tolstoj. Wichtig: Es gitt i dere Folg kei grossi Spoiler, ehr chöned sie also au lose, wenn ehr die Büecher noni kenned und vellecht mol no wännd läse. Mer freue eus wie immer über Feedback - z.B. über Instagram oder über en Sterne-Bewärtig doo uf Spotify.

Das mol werds sehr explizit (wie au scho im Titel stooht). Es gooht um d Colleen Hoover, vor allem um ihres Buech "Verity", und doo gitts rächt vell "spicy" Passage. Das Buech wiicht es bitzeli vo dem ab, was d Colleen Hoover sosch so schriibt. Das sind nämmlech grösschteteils Romanze (vor allem "Dark Romance"), "Verity" ghört aber vor allem zum Genre Thriller. D Noelle hett scho mehreri vo de anderne Büecher vode Colleen Hoover gläse und isch ned wörklech begeischteret gsii, dorom hett sie jetzt de Autorin nomol welle e Chance geeh, wenn sie mol imene andere Genre schriibt. Leider hett sech au doo weder zeigt, werom sie ned wörklech zu eusne Lieblingsautor*inne ghört. D Noelle verzellt was im Buech passiert und d Jasmin esch schockiert und probiert z erroote, was as nöchschts chonnt. Vell Spass bem inelose!

Sayaka Murata 101: Achtung, es wird gruusig! Mer verzelle euch vo de Sayaka Murata, einere vode erfolgriichschte ziitgenössische japanische Autorinne. Mer rede öber die drüü Büecher vo ihre wo bisher uf Englisch/Düütsch übersetzt erschine sind: "Convenience Store Woman" (Die Ladenhüterin), "Earthlings" (Das Seidenraupenzimmer) und "Life Ceremony" (Zeremonie des Lebens). Mer säge euch au, was d Theme sind, wo be ihre immer weder vorchöme und werom mer finde, das die för eus relevant sind. D Noelle erklärt, werom d Sayaka Murata eini vo ihrne Lieblingsautorinne esch und d Jasmin teilt, was ihre erscht iidrock gsii esch.

Was isch de underschiid zwösche enere Autobiographie und eme "Memoir"? Was isch öberhaupt es Memoir? Das beantworte mer euch under anderem i dere Folg. Es gooht um zwöi spannendi und sehr bewegendi büecher: "Know My Name" vo de Chanel Miller und "Just Kids" vo de Patti Smith. I beidne Büecher händ d Autorinne über ihres eignige Läbe respektiv öber bestimmti Erfahrige i ihrem Läbe gschribe. Mer verzelle euch was mer a dem Genre generell und a dene Büecher spezifisch spannend finde, rede über d Rolle vo Würklechkeit und Fiktion ide Literatur und verzelle euch, was mer (vor allem d Noelle) sosch no so för Memoirs gläse händ und öb mer sie wörde empfähle. Vell Spass!

Guets Nöis! Ehr händ euch sicher scho gfrogt, was mer im 2023 alles so gläse händ, wos ned (oder no ned) inen Podcast-Folg gschafft hett. Die Folg werd jetzt all euchi Frooge beantworte. Es esch Spotify Wrapped - aber im Ufgläse-Style. Es gooht um eusi lieblingsbüecher das joohr, büecher wo eus eher enttüüscht händ und settigi wo eus nömm losglooh händ und mer gähnd euch en chliine iiblick i eusi läseziil im neue joohr, alles begleitet vo es paar App-generierte statistike zu eusem läseverhalte. Feedback oder Wünsch chönder eus wie immer gern uf Instagram oder TikTok geeh, beides @ufglaese.

Frohi Wiehnachte! Mer maches eus gmüetlech und rede passend zo de Feschttäg öber "Loveligt Farms" vo de B.K. Borison und generell öber romanze und euse bezug dezue. Vell spass bem zuelose.

I dere folg simmer z dritte met de Livia, wo met eus d' Kantiziit bestritte hett (und eus au scho sit em Chindsgi begleitet). Es gooht um die Büecher, wo mer im Düütschunderricht ade Kantonsschuel gläse händ. Under dene sind büecher wo überraschend guet gsii send, settigi womer gar ned gärn gläse händ & settigi wo eus d'Handlig ned wörklech iilüüchtend erschine isch. Vellech chöned ehr jo relate, wel ehr es paar vo dene au gläse händ. Am Ändi rede mer auno dröber, was mer eus stattdesse oder ergänzend so as Schuellektüre gwünscht hätte, aso bliibed uf jede fall draa, wenn ehr anere Kanti underrichted und eusi Tipps für de Schuelstoff wännd ghöre (das esch eher as Witz gmeint, wär aber umso cooler, wenn öpper wörklech uf eus lose wörd). Mer wönsche euch allne wie immer vell vergnüege bem inelose und freue eus natürlech öber Feedback - zB mit ere Sternebewertig doo uf Spotify oder mit ere Nochricht uf Instagram (@ufglaese)

I dere folg chehre mer zrogg i eusi früehe teenager-joohr und rede met euch öber "Twilight" vo de Stephenie Meyer - sowohl öbers buech als au öber de film und alles drumume. Chömed met eus met uf Forks, Washington und lached met eus öber komischi näme, handlige und figure. Mer wörde eus übrigens mega freue wenner eus feedback uf instagram schriibed (@ufglaese) und eus doo uf Spotify en sterne-bewertig doo löhnd. Dankeee schnügis!

Mini liebe - gruseligi grüess göhnd das mol a euch use! I eusere erschte "richtige" folg goohts um zwöi vode berüemtischte und ältischte horrorgschichte: "Dracula" vom Bram Stoker und "Frankenstein" vode Mary Shelley. Mer erkläre de plot, säge eusi menige zude büecher und göhnd dene gschichte uf de grund. Au bruuchts weder en disclaimer: d audioquali isch zwar das mol besser, aber es isch en sehr langi folg (mer lade euch do demit au dezue ii, d folg i 2 oder 3 oder 4 teili z lose). Vell vergnüege und hoffentlech chömed ehr ned z fescht angscht öber. Gähnd eus gern feedback, zb öber Instagram: @ufglaese Mer händ usserdem jetzt en playlist namens "Ufghört", wo zum podcast dezueghört: https://open.spotify.com/playlist/6TM93AVe1aVswAyLmZAIKj?si=51e619b2e6494e04

Willkomme (zum allererschte mool) be Ufgläse! I eusere erschte folg machemer en "Book Tag", das heisst mer beantworte ganz vell frooge, das ehr eus dur euse büechergschmack es bitzli (besser) chöned kennelehre. Und ja: mer wüssed, das d audio-quali das mol ned so de hit isch, aber mer wärded aus stetig verbessere. :) mer freue eus usserdem über feedback, zb uf eusem insta: @ufglaese Danke vellmol förs zuelose, ehr schnügis