04.11.2021, कार्तिक (कतक) गटॖ पछॖ (कृष्ण पक्ष) मावस (अमावस) ब्रसवार (वीरवार/गुरुवार/ब्रहस्पतवार)श्री

04.11.2021, कार्तिक (कतक) गटॖ पछॖ (कृष्ण पक्ष) मावस (अमावस) ब्रसवार (वीरवार/गुरुवार/ब्रहस्पतवार)श्री सप्तर्षि सम्वत 5097, नक्षत्र चित्र, राश तुला (चलान) ऋतु हरुद (शरद) (चलान)..अज़ छि दीवऻली व्वत्सव **************************** नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव **************************** महामऻरी नाश - मंत्र जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते **************************** त्वहि सारिनी छु म्योन हथ हथ मुबारक अज़ दीवऻली दॊह। मुबारकॖच कथ छि यि ति ज़ि ॳस्य कऻशिर्य बटॖ छि यि दॊह बडॖ चमॖ खमॖ सान मनावान पऺत्यम्यव केंच़व वऺरियव प्यठॖ। कऺशीरि मंज़ ॴस्य नॖ दीवऻली यूत जोश खरोश सान मनावान शायद ॴस नॖ तिमन पताह ज़ि यिथॖ पऻठ्य ति छि दीवऻली मनावान। तति ॴस्य अनान हलवऻयिस निश या संतरामस निश मिठायि किलो ज़ॖ किलो सु ति रलॖ मिलॖ तॖ गरस मंज़ बऻगरावान। पटाखॖ या टास ॴस्य तिमय चलावान यिमन आंगन ॴस्य बऺड्य आसान या यिहॖन्द्य गरॖ बटॖ मऺहलस मंज़ॖय ॴस्य आसान। यारबलॖन प्यठ गऺछ़िथ ॴस्य बट टास वास चलावान सुति खूच़्य खूच़्य युथ नॖ टासुक रौख बहच़न कुन गछ़ि तॖ बवाल व्वॊथि। सत्य दीव ॴस्य गरन मंज़ बनावान तॖ शामस प्र्यैपुन हऻविथ नवीद ख्यवान। ऒत्तुय ताम ॴस कऻशिर्य बटॖसॖन्ज़ दीवऻली आसान महदूद मगर टनलि यपोर यिथ त्रोव बटन फ्रख ह्यु तॖ वाहराव्यन नरि ज़ंगॖ हिश तॖ ह्यॊतुन नच़ुन तॖ फेरुन, टास त्रावॖन्य, धन तेरस मनावॖन्य, गणेश जी तॖ लक्ष्मी जीयिन मूर्ति अनॖन्य, कांह नॊव बानॖ अनुन तॖ नॊव लछ़ुल मऺल्य अनुन। यॊत यिथ तॊर बटस फिकिरी ज़ि दीवऻली ब्रोंठ छि ल्वकॖट दीवऻली ति आसान। दय दय करान आसि नॖ वारिहान कऻशर्यन यि ति पताह ज़ि अथ क्याज़ि छि वनान ल्वकॖट्य दीवऻली या नरकॖ च़्वदह युस अम्युक दॊयिम नाव ति छु यिवान ह्यनॖ। सऻन्य दीवऻली ॴस कऺशीरि मंज़ कमॖय शोर शराबॖ सान यिवान मनावनॖ मगर यॊत यिथ द्युत असि अथ त्योहारस व्यस्तार। यि ति गव जान ज़ि असि तॊर फिकिरी ज़ि दीवऻली छ्यॆ नॖ अकि दुहॖच बऺल्कि पान्च़न दोहन हॖन्ज़ आसान। कथ छि जऻरी ***************************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव ***************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)