#040 - Baketen maisua (Javi Area)

urpekoBONBARDA #040Zuzeu Podcastek aurkezten du: Urpeko Bonbarda, Anartz Bilbao gidari duen musika saioa.Berrogeigarren saioan, Javi Area zenari gorazarre egin nahi izan diogu, joan den ekainaren 18an zendu baitzen, 53 urte zituela, minbiziak jota. Estudioko musikari, perkusio jole aparta zen Area, makina bat egitasmotan parte hartutakoa, orkestra handiekin zein kalean joz. Astigarragako Musika Eskolan irakasle ere bazen gizonak hutsune handia utzi du,  eta musikari bikaina izateaz gain oso jatorra baitzen Javi Area.Saioa MoMau talde berezia entzunez abiatu dugu, Les Mecaniciens desegin ostean bertako musikari batzuek sortutako taldea, funk erritmoan. Aspaldiko taldeak akorduan, Samar ere ekarri dugu gogora, Pascal Gaignek gidatu eta perkusioa ardatz zuen egitasmoa. Baita Furunda taldearen "Juanita" laneko kantu bat ere, 1998koa. Herri musikekin jarraituz baina nazioartera salto eginez, Faltriqueira taldearen "Palmira" entzun dugu, Javi Areak bertan egindako lana goraipatua izan baita sarri -ez zioten alferrik "gallego" deitzen-. Gainera, Javi Arearekin batera makina bat egitasmo eta bizipen izandako Aitor Furundarenak eta Maria Lopez galiziarrak hitz politak izan dituzte aspaldiko laguna zuten Javi Area gogoan hartuta.Perkusio joleak grabatutako diskoekin jarraituz, Mixel Ducau eta Caroline Phillips-ek sortutako Bidaia taldearen kantu bat entzun dugu, "Oihan" estreineko diskoan perkusio jole izan baitzuten Javi Area, baita Pier Paul Berzaitz zuberoarrak ere, "Baratze bat" lanean. Eta beste horrenbeste Amaia Zubiria kantariak, bere taldean ohiko bateria jolea zuen-eta.Maria Lopez eta Aitor Furundarena musikariengana jotzeaz gain, Astigarragako Musika Eskolara ere jo dugu, irakasle gisa nolakoa zen ezagutze aldera, eta Odei Astibia eta Alfred Pastain lankide eta ikaslearekin hitz egin dugu, errenteriarren hurbilekoak biak ala biak. Azken txanpan, Luis Mari Moreno "Pirata" lagunminarekin batera Javi Areak izan dituen egitasmoetako batzuk entzunez bukatu dugu saioa, LosDelGás eta Blues Thorpes "ganberroak" batetik, eta Zozongoren Euskorleans bestetik, euskal kantuak New Orleanseko jazz moldera ekartzen dituena.Bukatzeko, eta ezer baino gehiago kalean jotzea maite zuen Javi Area musikari baikor eta eskuzabalari agur esateko, berau zendu eta gutxira Iñaki Salvador piano joleak idatzi zion testu zoragarria euskaratu dugu.* Atal honen irudian ageri den Javi Arearen argazkia, Pastain Irudi Zerbitzuak-ena da. ★ Support this podcast on Patreon ★