#128. Yazmesora Min - Selvi Boylum Al Yazmalım

Selvi Boylu Al Yazmalım, ku fîlmeka sala 1977an e, klasîkeka sînemaya Tirkan tê qebûlkirin. 

Fîlm di zarokîya min de car caran derdiket televîzyonê, bes ti carî fersend çênebû ku ez fîlmê ji sêrî heta talîyê tam sêr bikim. 

Ku ez bi edebîyatê ketim û elimîm fîlm ji esereka Cengiz Aytmatov e min nîyet kir ku ez orîjînala eserê bixwînim, lê ew jî wer nebû qismet. 

Çend ro berî payîza 2023yan biqulibe zivistanê min vekir ji MUBIyê Selvi Boylum Al Yazmalım, Yazmesora Min sêr kir. 

Tevî ku min fîlm berê çê-xerab zanibû jî fîlmê hêsir barandin ji çavên min û ez bi xeman ketim. 

Hezkirin eynî mîna meseleya Yazmesora Min tim trajedîyan çêdike, birîn û girîn dimîne ji dilê dil re. 

A rast di matematîka hezkirinê de matem heye, didî ser hev, ji hev derdixî, par vedikî, çi dikî çito dikî, di destê te de huzn dimîne ji dilê te. 

Însan her ku bihareka din zivistaneka din dibîne li vê heyatê hinekî din serwext dibe ku her tişt mimkun e, bi matematîka hezkirinê her tişt mimkun e. 

Mimkun e yek bêje hezkirin rindî ye, hezkirin dostanî ye, hezkirin ked û emeg e, mimkun e li kafeyên Diyarbekirê poster û replîkên Yazmesora Min dardakirî bin.Omer Faruk Baran