14.11.2021 कार्तिक (कतक) ज़ूनॖ पछॖ (शुक्ल पक्ष) काह (एकादशी) आथवा (रविवार/एतवार) श्री सप्तर्षि सम्वत

14.11.2021 कार्तिक (कतक) ज़ूनॖ पछॖ (शुक्ल पक्ष) काह (एकादशी) आथवा (रविवार/एतवार) श्री सप्तर्षि सम्वत 5097, नक्षत्र पू.भा, राश मीन (दुहचि 10.11 बजि प्यठॖ) ऋतु हरुद (शरद) (चलान)...द्रठॖपऻन्च़ुक (पंचक) (चलान) ************************ नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ************************* महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ************************ दपान माजि ज़्यव यॊदवय रावि तॆलि छि तथ सॗत्य स्व ज़ाथ ति रावान यॆमि ज़ऻच़ हॖन्द्य तिम शख़स आसन। बरादरन वॊन तीज़मालि कुन।आहनबा तथ मंज़ क्याह शक छु। असि छि गऻमॖच़ यीरॖवॖन्य नाव। ॳस्य लऺग्य नॖ यथ गाठस तॖ न हुथ। सानि समुदायक लुख छि शायद सोंचान ज़ि सॊन शुर क्याज़ि ह्यॆछि कऻशिर्य ज़्यॆवि मंज़ लेखुन तॖ परुन यॆलि नॖ यि ज़्यव कुनि कारस मंज़ कारामद छययी। तीज़मालि वॊन बरादरस। मगर मऻजी यिम लुख यि सोंचान छि म्यॆ छु बासान तिम छि ग़लत सोंचान। तिमन पज़ि ज़ानुन ज़ि माजि ज़्यव छि ज़ऻच़ हॖन्ज़ प्रज़नथ दफ अख पहचान। अगर नॖ असि कऻशुर वनुन तगि, परुन तगि, लेखुन तगि तॆलि कथ आधारस प्यठ, कमि हकॖ ह्यकव ॳस्य पानस कऻशिर्य वऺनिथ। सऻन्य लिखऻर्य कऺहन्दि बापथि लेखन यॆलि नॖ तथ साहित्यस कांह प्रछ़न वोल आसि या परनवोल आसि। यिम शऻयर छि, कथाकार छि, बऻथ लेखनवऻल्य छि, नाटक लेखनवऻल्य छि, अफसानॖ निगार छि यिहुन्द ल्यूखमुत कुस परि तॖ ज़ानि अगर ॳस्य माजि ज़्यव पानस सॗत्य थवव नॖ। च्योन वनुन हाबा छु पॊज़ तॖ पॊज़ छु हमेश ट्यॊठ लगान। वॊन तीज़मालि बरादरस कुन। यिहे छु मऻजी बडॖ संजीदॖ मस्लॖ अथ प्यठ गोर करुन छु स्यठाह ज़रूरी। आहनबा मगर करि कुस। कथ छि जऻरी ************************* कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """"""""""""""""""""""""""""""" कऻशिर ग्रन्द - गिनती कश्मीरी में - शतवुह (छब्बीस) सतोवुह (सत्ताईस) अठोवुह (अठाईस) कुनत्रॖह (अन्नतीस) त्रॖह (तीस) *********************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot प्यठॖ ति)