16: Био бордооны тухай, зочин Б.Ууганбаяр

Өмнөх дугаарт бид байгальд ээлтэй тариалалтын тухай ярилцсан бол энэ удаад байгалийн гаралтай буюу био бордооны талаар биотехнологич Б.Ууганбаяртай ярилцлаа. Зочин маань Фулбрайтын тэтгэлэгт хөтөлбөрт хамрагдан АНУ-д биологийн шинжлэх ухаанаар магистрын зэргээ хамгаалсан, тахианы сангаснаас гаргаж авсан бионүүрс ашиглан хөрсний үржил шимийг сайжруулах, уул уурхайн нөхөн сэргээлтийг хийх сэдвээр судалгаа хийсэн, 2014 оноос гэрийн нөхцөлд хүнсний хаягдал, чийгийн улаан хорхой ашиглан бордоо хийх талаар бие даан туршиж, судалж байгаа арвин туршлагатай билээ. Энэ дугаарыг сонссоноор та химийн болон био бордоо нь орц найрлага, хөрсний үржил шимийг дэмжих арга зам, байгальд учруулах нөлөөллөөр хэрхэн ялгагддаг, байгалийн нөөц баялаг болон хүнс, ахуйн хог хаягдлыг ашиглан био бордоо хийх ямар боломж байдаг, гадаадад газар тариалан, хүнсний үйлдвэрлэлд био бордооны талаар ямар сайн туршлагууд байдаг, сонирхолтой ямар судалгаанууд хийгдэж байгаа талаар мэдэж авах болно.