21.10.2021, कार्तिक (कतक) गटॖ पछॖ (कृष्ण पक्ष) ऒक्दॊह (प्रथमा) ब्रसवार (गरूवार/वीरवार/ब्रहस्पतवार),

21.10.2021, कार्तिक (कतक) गटॖ पछॖ (कृष्ण पक्ष) ऒक्दॊह (प्रथमा) ब्रसवार (गरूवार/वीरवार/ब्रहस्पतवार), श्रीं सप्तर्षि सम्वत 5097, नक्षत्र आश्विन, राश मेष (चलान) ऋतु हरुद (शरद) (चलान) *************************** नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव *************************** महामऻरी नाश - मंत्र जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते **************************** कऻशिर्य बटस म्यूल नॖ स्वख ज़ांह ति कऺशीरि मंज़ ख़ास कऺरिथ 1967 प्यठॖ। तीज़मालि वॊन बरादरस। बरादरन प्रुछ़ तीज़मालि ज़ि 1967-स मंज़ क्याह गऺयो सना। परमेश्वरी कान्ड। तीज़मालि द्युतनस जवाब। सऻन्य अख बटॖ कूर यस नाव दपान ओस परमेश्वरी च़जेये ॳकिस मुस्लमान कऺटिस सॗत्य। यि बूज़िथ गऺयि सऻरी बटॖ परेशान तॖ हऻरान तॖ मील्य इकॖवटॖ तॖ कऺरॖख अजिटेशन। सत्याग्रह कॊरुख, जॊलूसन प्यठ जॊलूस कऺडिख, पान पनुन यि दऺप्यज़ि ति लिथॖनोवुख, मार ख्योख, गोलि ख्यॆयख, न रूदुख गरॖ याद तॖ न गरॖबार या गरॖ परिवार। तलातुम तुलुख कऺशीरि मंज़। बटन हुन्द सु समुत वुछिथ तॖ सु जोश वुछिथ फऺट तॗर तति मुस्लमानन। मगर स्व अजिटेशन फॖटरऻव पनॖन्यव लीडरव ती बूज़ पतॗ। अदॖ तमि अजिटेशनॖ पतॖ ति आयि नॖ बटॖ ज़ांह ठऺठ्य तॖ न रूद सु विश्वास बटस बटस प्यठ तॖ न रूद सु यकुत तनॖ प्यठॖ ब्यॆयि ज़ांह। तीज़मालि वॊन बरादरस ज़ि असि हबा द्रायि पनॖनी लीडर मकॗर्य तॖ बासान छुम ज़ि अंसि छु नॖ वुनि ति कांह च़ुक्यदार लीडर। दपान कऺॳम्यू फुटरोवनख दॊपनस पनॖन्य प्वन्य। यूत तक्लीफ तुलिथ ति छिनॖ ॳस्य वुनि ति पायस प्यवान। अदॖ शालॖ टूंगा टूंगा दिवान छि सऻरी पनॖन्यन पनॖन्यन कोचन मंज़। तालवस लोरि काह, जंगॖ विज़ि नॖ अख ति। बोज़नऻहाना कऺर बरादरन तॖ रूद मुदय गऺन्ठिथ वुछिनि तीज़मालि कुन। क्याहबा अपुज़ मा वॊनुम। तीज़मालि कॊर बरादरस सवाल। बरादरस गऺयि ज़्यव कऺज्य हिश। वनिहे तॖ वनिहे क्याह। नामावार तॖ कदावार बटॖ लीडरन हॖन्द्य नाव छि बूज़्यमॖत्य। मस्लन केशव बनधु, गुलशन कौल, गॊपी नाथ धर, गोपी कृष्ण, डाक्टर शॊम्बू नाथ पॆशॖन, सुदर्शन धर्मऻर्थी, शाम लाल सराफ, डी पी धर, शिवा नारायण फोतेदार, प्रेम नाथ गऻस्य, मखन लाल फोतेदार, टिकॖ लाल टऺप्यलू, अमर नाथ वष्णवी, बाल कुष्ण हॊन्डू वगैरा वगैरा मगर यॊदवय यिमव पनॖनि पनॖनि वख्तॖ ज़ुव जान च़ॊट मगर तिहन्ज़न काम्यन न आव कुनि हॊट लब्नॖ तॖ न आव लॊट लबनॖ। सियासती तनावॖ मूजूब या बदकॖस्मती मूजूब या ब्यॆयि केंच़व हालातव मूजूब। बोज़ान छि ज़ि यिमव मंज़ॖ छि केंच़व जान जान कामि ति करिमच़ॖ मगर बटॖस रूज़ सऺही लीडरन हॖन्ज़ व्यछ़य प्रथ विज़ि। कथ छि जऻरी। *************************** कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव **************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)