#21 Skoðanabræður snúa aftur

Landvarðarbrundið! Það er hinn heiðni helgi safi sem grundvallaði þessa þjóð í öndverðu – og heldur áfram að gera það á kojufylleríum í hinum ýmsu þjóðgörðum landsins. Þetta er fólkið sem er ekki á Instagram, en tryggir í gegnum aðrar göfugri boðleiðir framgöngu kynstofns okkar. Að vera ekki á Instagram er svo sem eitthvað fyrir aðra en bara skinhelgar síðhærðar skeggjaðar lopapeysur: Skoðanabræður hoppa um borð í þann vagn, alltént Bergþór. Hann ætlar að hætta á Instagram í febrúar, bylting, segir hann, febrúarbylting, bætir Snorri um betur, orðhagur og sagnfræðilega meðvitaður höfundur þessa texta hér. Verið velkomin í aðra seríu af Skoðanabræðrum, helsta hlaðvarpi landsins, sem smeygir sér nú inn í eyru ykkar í fullkomlega tærri og óbreyttri mynd, að breyttu reyndar breytanda, sem var fjárhagsmódelið og fáein önnur atriði. Héðan í frá er þetta gersamlega ókeypis fyrir ykkur hlustendur, og á sama tíma erum við farnir í farsælt samstarf við framúrskarandi fyrirtæki: Forlagið, AUR og 101 Sambandið. Kóðinn til þess að kaupa Við erum ekki morðingjar eftir Dag Hjartarson sem hljóðbók á afsláttarkjörum (ný skáldsaga á 990kr) á forlagid.is er SKODUN. Kóðinn til þess að fá 60 GB frí þegar þú gengur í Sambandið á sambandid.is er SKODUN. Í þessum fyrsta þætti er allur andskotinn ræddur, eins og einmitt verðmætir kynstofnar, eins og þeir sem koma við sögu fyrr í þessari lýsingu. Snorri er staddur í Berlín þar sem hann rannsakar ásamt kraftmiklum krökkum yfirburði og eiginleika norræna kynstofnsins, á vegum félags sem heitir því viðeigandi nafni Norðurvígi. Hann segir okkur frá ýmsu spennandi af þeim frjóa vettvangi. Bergþór lýsir síðan áhyggjum sínum af Instagram, samfélagsmiðlum, en trúir að Skoðanabræður geti komið góðu til leiðar með því að halda áfram að bera út boðskapinn. Femínískan boðskap segir hann, enda hans hagsmunir, kvenkyns sjálfur. Og þetta grín er smellibeita og aðeins skrifað svo að þú sperrir eyrun og setjir Skoðanabræður í gang. Hér er ráða auðvitað jafnréttisviðhorf ríkjum. Karlmaður vikunnar að þessu sinni er ekki neinn, heldur er baneitruð karlmennska Snorra látin tala sínu máli. Á næstu vikum verða þó gestir í þáttunum, og þar er hvaðeina spennandi framundan. Það breytir því ekki að smávægileg stefnubreyting hefur orðið, sem felst í að þættirnir bera ekki nafn viðmælanda, heldur njóta efnislega sannmælis útaf fyrir sig, enda annað andrósentrismi, sem Skoðanabræður láta seint kenna sig við. Þið fáið sem sé fyrirsagnir, bitastærð við ykkar hæfi, smánautnaseggir. Skoðanabræður eru eins og ævinlega afurð Útvarps 101. Þeir eru framleiddir í samstarfi við Forlagið, AUR og 101 Sambandið.