30.11.2021, मॊंजहोर (मार्ग/मगर) गटॖ पछॖ (कृष्ण पक्ष) काह (एकादशी) बॊम्वार (मंगलवार) श्री सप्तर्षि सम

30.11.2021, मॊंजहोर (मार्ग/मगर) गटॖ पछॖ (कृष्ण पक्ष) काह (एकादशी) बॊम्वार (मंगलवार) श्री सप्तर्षि सम्वत 5097, नक्षत्र हस्त, राश कन्या (चलान) ऋतु हेमन्त (चलान) ************************* नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव ************************ महामऻरी नाश - मंत्र जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते ************************ बरादरस प्यव ज़न च़्यतस क्याहताम तॖ फ्यूर तीज़मालि कुन वनॖनि। मऻजी बॖहऻय छुस यॆलि आसान मच़ि न्यॆंदरि मंज़ कुनि सातन बॖ छुसख ज़न तिम यार कऺशीरि मंज़ॖक्य छ़ान्डान रोज़ान। कमन बा यारन छुख च़ॖ छ़ान्डान रोज़ान न्यॆन्दरि मंज़। तीज़मालि प्रुछ़नस। हतय क्याह वनय। म्यॆ छि प्यवान तिम यार याद यिमन मंज़ म्यॆ पनुन ल्वकॖचार छु कॊडमुत, यिमन यारन मंज़ म्यॆ वतॖ छम मंजिमच़ॖ। मस्लन गणपथयार, सूमयार, बटॖयार, खरॖयार, मलॖयार, सॖहयार, क्रालॖयार, मूत्ययार, प्वरुषॖयार, द्रऻब्ययार, डलहसनयार, बऺड्ययार, शऺश्ययार वगैरा वगैरा तॖ छम ॳछ खुलान तॖ छुस यकबयक वऺथित गछ़ान। तीज़मालि द्युत बरादरनि कथि छ़्यन तॖ दॊपनस हतबा च़्यॆ प्यॆयी यार याद तॖ बॖ वातनऻवथस तिमन मंदरन ताम यिम नॖ यॆति छि नज़रि गछ़ान। मस्लन गणपथयार। सुबहऻय ॴस्य गछ़ान तथ मंदरस तॖ ॴस्य शिवलिंगस पोन्य बावान तॖ मनस ॴस शऻन्ती मेलान। गऺणिश्यस ब्रोंहकनि ॴस्य सऻरी बऺख्त्य शुर्य बऺड्य मर्द ज़नानॖ सऺमिथ सुबहस शामस आरती करान रोज़ान तॖ गणपथयार ओस ग्रज़ान गन्टाय आवाज़ि तॖ श़खॖ नाद सॗत्य। कदमॖ कदमॖ पतॖ ॴस्य मंदर प्रथ तिमन यारन मंज़, मऺहल्लन मंज़, कोचि गल्यन मंज़ मगर तिम मंदर हबा दूरेयि असि निशि योर यिथ। दूर दूर ताम छुनॖ यपऻर्य मंदर नज़रि यिवान। यि कथ वऺनिथ च़्यॆ पऺज़ मऻजी। बरादरन वॊन तीज़मालि। यॆत्यन यॆत्यन बटॖ बऺसिथ छु अज़कल दिल्लि, मुम्बय, बंगलोर, पूने तस अंद्य पऺख्य छुनॖ कांह मंदर त्युथ यथ मंदरस मंज़ सु बटॖ तिथय पऻठ्य वातिहे आसऻनी सान यिथॖ पऻठ्य सु कऺशीरि मंज़ वातान ओस गाह सु गामॖ आसिहे या शहरॖ। आहनबा स्व व्यछ़य छि टाकारॖ बासान। जुम्लॖ कॊर पूरॖ तीज़मालि। यिति गव असि बॊड न्वक्सान। सोन मूल रोव, ज़मीन जादाद रोव, मंदर रऻव्य, तिम यार तॖ यारबल रऻव्य दफ यि दप्यज़ि ति ॳस्य रऻव्य पानॖ तॖ सॗत्य रऻवमॖच़ असि काहन गाव। कथ छि जऻरी ************************* कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव """""""""""""""""""""""""""""""""""""""" कऻशिर प्रऺच़ - अलॖ कुलिस तुलॖ कुल - माने:- ल्वकचि कथि बऺड कथ बनावॖन्य ************************* नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (यि सबक़ वुछिव podcast दऺस्य ति) https://anchor.fm/bldeep (यि सबक़ वुछिव koshursabak.blogspot.com प्यठॖ ति)