37-古似鳥龍(Archaeornithomimus)

37-古似鳥龍(Archaeornithomimus)      Kóo-sū-tsiáu-liông，華語叫做「古似鳥龍」，號名的意思是「古早的鳥仔趁樣者」，意思是講in是似鳥龍的祖先。1923年，美國自然史博物館的團隊，佇內蒙古發現的，1933年有對in做一寡描述，1972年正式號名發表。In是生存佇9600萬年前的白堊紀尾期。      古似鳥龍身長3米4，體重佇45到91公斤之間，伊身軀的羽毛佮喙，參這馬的鴕鳥足仝形。頭細細粒、目睭大大蕊，生佇頭的兩爿，會使像現代鳥仔按呢觀察四箍輾轉的環境。無喙齒，頷仔頸誠幼，尾足長，真gâu走。      In分佈的範圍佇北美洲佮亞洲，彼陣遐的環境應該是有足濟彎彎斡斡的河，倚海的所在閣有闊莽莽的平洋，佇遐生存的生物有誠濟種，所擺古似鳥龍食食的選擇蓋濟，除了食細隻動物、蟲豸以外，嘛會食卵佮果子。      古似鳥龍佮鳥仔足仝形，若按呢古生物學者發現跤印的時，欲按怎斷定是鳥仔抑是恐龍咧？有一種講法是看跤指頭仔縫的角度，超過120度是鳥仔，無夠120度是恐龍。古似鳥龍的跤胴骨比大腿骨較長，骨骼親像鴕鳥，科學家認為古似鳥龍凡勢嘛像鴕鳥按呢走敢若飛例，是短途走標的冠軍喔！      今仔日的「古似鳥龍」就講到遮，感謝逐家的收聽。 - - - - - - - - - - - - - - -  趁樣 thàn-iūnn 闊莽莽 khuah-bóng-bóng 平洋 pênn-iûnnpînn-iûnn - - - - - - - - - - - - - - - FB迷眾頁：https://reurl.cc/adkoAl 留言告訴我你對這一集的想法： https://open.firstory.me/user/clohik9vc0vuq01s15xufcp5w/comments Powered by Firstory Hosting