[5].Minangkabau/-"Undangan untuk Mengenal Yesus Secara Pribadi"

[5]. Minangkabau- "Invitation to Know Jesus Personally".3gp // 1 Korintus 15 . -- 1. Kiniko sudaro-sudaro, ambo niyo supayo angku-angku mangana baliak tantang parkaro Injil nan dari ELOHIM, nan lah ambo baritokan dulu kabake angku-angku. Angku-angku layi manarimonyo, sarato picayo kapado Isa Almasih dek karano di Injil tu. 2. Jikok angku-angku layi bapacik taguah, kabake apo nan lah ambo baritokan tu, mako angku-angku ka disalamaikkan malalui Injil tu; antah kok sudaro hanyo picayo, tapi picayo nan indak baguno. 3. Apo nan lah ambo tarimo, itu pulolah nan lah ambo sampaikan kabake sudaro-sudaro. Nan paliang paralu lah ambo sampaikan, baraso Isa Almasih mati dek karano di doso-doso kito, samo jo bakcando apo nan lah tatulih di Alkitab; 4. Baliau dikubuakan, tapi kudian di ari nan katigo, Baliau di iduikkan baliak. Itupun tatulih pulo di Alkitab. 5. Ambo lah ma agiah tawu pulo kabake angku-angku, baraso Isa Almasih nan lah di iduikkan baliak tu, lah mampanampakkan diri-Nyo pulo kabake si Petrus, kudian kabake rasul nan duwo baleh. 6. Sasudah tu, Baliau mampanampakkan diri pulo, kabake limo ratuih urang labiah pangikuik-Nyo, sakali basuwo jo Baliau kasadonyo. Kabanyakkan dari urang-urang tu, ado juwo lai nan iduik sampai kiniko, tapi ado pulo babarapo urang nan lah bi mati. 7. Kudian Isa Almasih mampanampakkan diri pulo kabake si Yakobus, sarato jo kabake sadonyo rasul. 8. Nan pangabisan sakali, Baliau mampanampakkan diri pulo kabake ambo -- ambo nan ko, ibaraiknyo saroman jo paja nan layie alun diwaktunyo! 9. Ambo ko adolah rasul Tuhan nan paliang hino. Ambo indak patuik dinamokan rasul, dek karano dawulu ambo suko maniayo jamaat ELOHIM. 10. Tapi dek karano rahmaik ELOHIM, mako jadilah ambo bakcando ka adaan ambo nan kiniko. Tapi indak tabuwang siyo-siyo doh ELOHIM ma ampuni ambo. Malahan ambolah nan bakarajo labiah marasai, daripado kasadonyo rasul nan lain. Tapi, biyapun baitu, nan sabananyo indak kakuatan ambo doh tu nan bakarajo; tapi itu adolah kakuatan ELOHIM nan mangasiahi ambo, ELOHIM sandirilah nan bakarajo samo-samo jo ambo. 11. Jadi, kok dari siya-siyanyo pun angku-angku manarimo Injil tu -- apokoh itu dari ambo sandiri, atau dari rasul-rasul nan lain -- itu indak manjadi masalah. Nan paralu iyolah, kami bakarajo mambaritokan Injil, nan sudaro layi pulo bi picayo.