#7 Санаа зовнил дундах амар тайван

Үнэхээр энэхүү аймшигт цар тахлын нөлөө зөвхөн Хятадаар зогсохгүй дэлхийн өнцөг булан бүрт хүчтэй мэдрэгдсээр байна. Гэхдээ коронавирусаас гадна бидний амьдралыг сэгсэрч чадах өөр олон асуудлууд бий гэдгийг бид мартах учиргүй. Мэдээж коронавирусийн вакцин хурдан гарч цар тахлын давлагааг хазаарлах нь чухал байна. Энэ өвчнийг эдгээх эм тариа, эмчилгээний арга барилыг аль болох хурдан олох ёстой болоод байна. Гэхдээ ингэлээ гээд бидний амьдралын асуудлууд өргөс авчихсан юм шиг алга болно гэж найдах нь гэнэн хэрэг болно. Тиймээс амьдралын маань нөхцөл байдал ямар байхаас үл шалтгаалаад бидний зүрх сэтгэлийг эзэмдэж чадах Бурханы амар тайван бидэнд юу юунаас илүү хэрэгтэй байна.