【阿郎台語廣播劇】EP. 02 取名字這件事還真得要有點品味！｜EP. 02 號名ê siàn-suh kài要緊！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅】 時間將近beh日晝，老a公--a這時柴mā khioh好--ah，taⁿ 2大tàⁿ已經行beh到厝。「Heh-heh！Án-ne to̍h免煩惱煮飯hiâⁿ火無柴thang用--ā！」人seng行ùi後門去，kā火柴家私頭á收kui位，liâm-mi to̍h去看食飯桌有siáⁿ thang食。「Ĕ！Soah無chú？Nah ē án-ne？」人oa̍t去廳--ni̍h，to̍h看tio̍h a婆--ā the tī椅á頂teh喘氣，siān-tauh-tauh ê形，心內煩惱，隨時to̍h問：「Taⁿ是án-nóa--ah，你thài ē tī hia直直喘？」A婆應講：「To去mo͘h 1粒桃á --轉-來！」A公koh問：「Mo͘h 1粒桃á有才調喘kah án-ne？」A婆應：「Tī門口埕你ka-tī看。」A公--a行到門脚口，sûi to̍h看tio̍h hit粒桃á，chhoah 1 tiô倒退3步，險poa̍h--倒，嘴講「Nah…，nah ē hiah大…，taⁿ súi-bó͘--eh，che beh án-chóaⁿ khah好？」A婆ná行來門脚口ná應：「我to̍h知影你ē tio̍h驚，我mā是m̄知beh án-chóaⁿ處理，chiah teh等你轉來beh做夥參詳。」2 ê人sio-siòng，koh做夥看桃á，koh sio-siòng，koh看桃á，m̄知beh án-chóaⁿ。Hiông-hiông聽tio̍h 1聲腹肚kū-kū叫ê聲，a婆--ā笑笑á kā a公講：「Iau--a hōⁿ？」A公--a歹勢歹勢，手so腹肚，笑leh應講：「人sang--落-來，soah iau--起-來。」A婆講：「我thiám kah m̄知thang煮飯，無咱來kā chit粒桃á thâi-thâi--leh，seng止iau--1-ē好--無？來，你來kā我tàu lêng去食飯桌。」 2 ê人chiū án-ne 1人1 pêng，桃á lêng--leh，「heh-sio͘h heh-sio͘h」行kah灶脚，kā桃á chhāi tī桌頂，a-婆--ā the̍h 1枝刀beh hō͘ a公--a thâi，a公ka講：「Chit枝siuⁿ幼秀--lah！The̍h siāng大枝--ê hit枝來！」刀á the̍h--tio̍h，一刀to̍h phut--落-去，桃á肉正經有夠phang，tú破1 sûn niâ，已經鼻tio̍h桃á味，嘴內sûi生kah lóng chhùi-nōa，緊吞--落-去 ，刀kheng chhi̍h--leh，tng beh出力koh破--落-去ê時，hiông-hiông聽tio̍h細細聲á ê哭聲。 A婆--ā問：「你kám有聽--tio̍h？」應講：「有neh！Kài-sêng gín-á teh哭？！」2 ê人chit-chūn koh聽tio̍h「Thong，thong，thong」ê聲，聲kài-sêng是ùi桃á hia來--ê。哭聲jú聽jú明，「Thong，thong，thong」mā jú來jú大聲。A公--a心內憢疑，kā a婆--ā講「Kám講che桃á內底有gín-á？」A婆--ā應講：「無咱2 ê來kā桃á peh開看māi--leh。」刀á poe̍h--khài，2 ê人4 ki手無閒chhih-chhih做夥peh hit粒桃á，hiông-hiông phia̍k--1-ē，桃á li̍h做2 pêng，內底真正chhàng 1 ê紅嬰á，雙脚雙手liòng--leh liòng--leh，大聲teh háu，有生lān鳥á，是1 ê活跳跳ê cha-po͘ gín-á。A婆--ā歡喜kah beh tio̍h poa̍h，ná笑ná流目屎，講：「Che一定是天公伯--à疼惜--lán，beh賜咱chit ê hāu-seⁿ！」Mā m̄-koán gín-á kui seng-khu去hō͘桃á汁kō kah黏thi-thi，liâm-mi to̍h kā gín-á抱tī胸前ka tah。Gín-á去hō͘ a婆抱leh tah了後，凡勢是感覺tio̍h有人關心有人惜，mā無koh繼續哭--ah，目睭四界看，kài-sêng感覺桃á外口ê hoa-hoa世界kài心適án-ne。Chit chūn a婆--ā kā a公講：「Mài chhiūⁿ he柴頭尪á chhāi tī hia，你緊去thàng-suh hiaⁿh 1 niá大niá ê布巾á來，thang kā伊包--leh，我kiaⁿ伊寒--tio̍h，sòa--lòe to̍h去hiâⁿ kóa燒水，hiâⁿ好kā我叫，緊kā伊洗洗--leh伊ē khah爽快！」A公--a應1聲「Hiò͘」sûi to̍h tín動。Tāi-chì交帶soah，a婆--ā oa̍t頭目睭金金lia̍h eⁿ-á chîn，kā gín-á講：「你目睭大蕊圓kùn-kùn，鼻á生做lêng-lêng-lêng，嘴角翹翹ná菱角，大漢一定kài緣投！O͘h！嘴齒已經發2 ki--ah neh！」Jú看jú古錐，jú相jú可愛。過無jōa久，to̍h聽tio̍h牽手--ê teh hiu，iû-koh是chông來chông去，無閒chhih-chhih。 Chhiâu-chhe̍k 1-chām-á了後，tāi-chì總算是lóng款順sī，老公婆á iû-koh iau--起-來，2 ê人kā gín-á抱--leh，óa去飯桌á hia看hit 2 pêng桃á。講--起-來mā kài奇怪，桃á té 1 ê eⁿ-á，桃á肉soah kài正常，kah一般ê細粒桃á thâi--起-來kāng-khoán，to̍h是ke真phang。In ang-á-bó͘看he桃á肉黃gìm-gìm，水分飽tīⁿ kah ē sih金光，phang-khùi chhèng鼻khang，腹肚koh iau kah ē tân雷公，嘴nōa早to̍h m̄知影吞幾嘴lo̍h tō͘。老a公seng出聲：「無我先來試1嘴á看māi--leh…」湯匙á the̍h--leh，khat 1-sut-á-kiáⁿ，to̍h hē落去嘴--ni̍h，pō͘-pō͘--leh，吞--落-去。A婆--ā是一直真斟酌teh觀察a公--a試食，看a公--a kā桃á吞--落-去，ka-tī mā tòe leh吞1嘴嘴nōa。Koh來to̍h看tio̍h a公--a taⁿ頭ǹg天，目睭kheh-kheh，目屎soah直直流，hit-lō表情，幾十年前a婆--ā bat看過1遍。Hit時桃á林ê桃花開kah真chhiaⁿ-iāⁿ，花ia̍p lī花，hō͘春風吹kah滿天iāⁿ-iāⁿ飛，to̍h是hit tang-chūn，a婆--ā tī桃花樹脚答應beh hâm a公鬥陣1世人，a公--a ê面á to̍h是chit-lō表情。「是桃á…。」Tùn--1-ē了後a公--a kā目屎hôe掉繼續講：「是chok好食ê桃á…。」A婆應：「是jōa好食hō͘你感動kah án-ne？」A公應：「食看māi--leh你to̍h知！」A婆趕緊ó͘ 1湯匙khǹg落嘴，ta̍uh-ta̍uh-á pō͘。Chit時，A婆--ā ê表情mā變--ah。Nā準講kan-na用鼻--ê，he phang味親像坐tī門脚口nah涼ê時chhiu-chhìn ê風，pō͘--落-去ê時chūn，soah親像卷螺á風tī嘴內ká bē停，kā ka-tī對phang味ê認bat，ká-ká做1夥，lóng總ián了了，1世人m̄ bat食過hiah好食ê mi̍h。2 ê人chŏaⁿ 1嘴sòa 1嘴，直直食，一直食kah食bē --落-去。手kah嘴chiah停--落-來。到chit-chūn，chiah想tio̍h gín-á lóng無食，感覺chiâⁿ歹勢，趕緊用湯匙á khat桃á汁飼eⁿ-á，eⁿ-á mā無反抗，凡勢是一直tòa tī桃á內底，早to̍h慣勢chit-lō氣味，to̍h一直食kah飽chiah m̄食。 Gín-á食飽--ah，to̍h開始tuh-ku，a婆--ā to̍h ka抱去眠床頂ho͘倒--leh，gín-á睏神到，真緊to̍h睏kah chok落眠，到taⁿ，in ang-á-bó͘總算是無閒到1 ê khám-chām，有才調坐tī廳--ni̍h ha 2嘴á燒茶。 「有夠無閒，有夠無閒，m̄-koh mā有夠歡喜…。」A婆--ā先開嘴。A公應講：「Hèⁿ--à，今á日ke 1 ê kiáⁿ，咱有hāu-seⁿ--a。」A婆koh講：「咱beh ka號siáⁿ-mih名？」A公--a想想--leh講：「火旺好--無？Hō͘咱香火旺旺旺！」A婆--ā應講：「Taⁿ che siáⁿ-mih時代--ā，ka號1 ê khah雅氣ê名好--無？」A公--a想想--leh koh講：「無，進財--leh？Hō͘伊以後生活lóng免煩惱！」A婆--ā應：「咱mā無siáⁿ錢，日子m̄是過tio̍h消遙koh自在，koh想看māi--leh-lah。」Sòa--落-來ê天賜，文雄，金旺，金水，志明，a婆lóng無同意。A婆想講「嫁伊hiah久--ah，lóng m̄知影伊號名ê siàn-suh chiah-nī bái，我nā lóng無來thê意見，等--leh去號tio̍h我無kah意ê名，tāi-chì to̍h pháiⁿ收soah。」講：「既然gín-á是ùi桃á出世--ê，kah桃á hiah有緣，咱來紀念chit件tāi-chì，mā hō͘伊m̄-thang bē記得伊ê出身，咱ka號做桃thai…」Siáng知A婆--ā話kan-na講到1半，連tē 3調to̍h iáu-bē撇--落-去ê時，a公hiông-hiông真強勢插嘴：「好！咱to̍h ka號做A郎！To̍h án-ne！」A婆m̄知a公心內有siáⁿ-mih bē-tàng講明ê in-toaⁿ，hiông-hiông to̍h beh kā tāi-chì án-ne koat--落-來，m̄-koh chêng少年時，伊to̍h真kah意a公chit-lō氣魄，當初tī桃花樹脚，mā是saⁿh tio̍h伊chit-lō氣魄，chiah決定beh嫁--伊，koh再講，A郎chit ê名好叫，好聽，koh好記，mā無siáⁿ-mih理由thang koh反對，應講：「好--lah，lóng隨在--你。」講話ê聲tài淡薄á sai-nai。Chit時a公--a ùi椅á peh--起-來，chhun手kā a婆--ā ùi椅á頂giú--起-來，講：「行，咱來去看A郎睏tio̍h有sù-sī--無？」凡勢是想tio̍h少年時tng teh戀愛ê情境，a婆--ā hông giú--起-來了後，順勢to̍h nòa去a公--a ê seng-khu，面á sió-khóa-á紅紅，講話ê口氣koh jú sai-nai：「Che mā lóng隨在--你lah」，a公--a mā真自然kā a婆--ā ê腰攬--leh，2 ê人to̍h án-ne做tīn行去房內…。 Chit mê，in ang-á-bó͘ 1人睏1 pêng，A郎睏中央。2人平靜ê生活koh再來ke 1 ê gín-á一定ke真lāu-jia̍t，人生mā koh ke 1 ê ǹg望，2 ê老公婆手khan手，心內感激koh歡喜，微微á笑，無閒kui kang，已經kài thiám，無jōa久in 2 ê to̍h lóng睏--去-ah。Tāi-khài，che to̍h是幸福ê滋味。 -- Hosting provided by SoundOn