【阿郎台語廣播劇】EP. 07 雉雞姊，行李不要帶太多！｜EP. 072 雉雞姊，行李毋通chah siuⁿ濟！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 查某人行到桌á邊，手--ni̍h ê薰吹ùi桌頂輕輕á khà--1-ē，A郎in 2人chiah hiông-hiông回魂，知影ài注心聽人講話。Chit時查某人講：「聽講lín 2 ê無錢thang la̍p siàu？」Tang-sî-á chit ê查某人to̍h是雉雞姊，A郎in 2人趕緊khiā--起-來，A郎tāi先hōe失禮講：「雉雞姊，真失禮，goán食mi̍h-kiāⁿ進前無先探聽行情，食飽了後chiah知影goán錢無夠thang la̍p，a̍h是講，goán kha-báng內底koh有1 kóa ian魚kah chu̍t米丸á，kám ē-tàng the̍h來chhē-siàu？」應講：「Goán開店做生理to̍h是beh thàn錢，bē-tàng hō͘ lín the̍h mi̍h來tú siàu。」A明接落去講：「Kám ē-tàng拜托雉雞姊手紗giâ koân-koân，hō͘ gún機會，看有siáⁿ-mih辦法thang處理？Gún實在m̄知ē食kah hiah chē錢！」Che雉雞姊thó͘ 1口大khùi，薰吹the̍h起來pok--2-嘴，lia̍h A郎斟酌siòng--1-ē，koh lia̍h A明斟酌siòng--1-ē，想想--leh講：「Chit lō tāi-chì mā m̄是無thang參詳lah！Goán酒樓本底to̍h是庄á內siāng出名，用料實在，煮食ê手路mā kài要求，價siàu貴是應當。我看lín 2 ê是古意人，mā真誠意beh處理，無lín tī chia做工tú siàu，1 kang 1 ê人工錢10 kho͘，做5 kang tú好100，án-ne lín看好--無？」A郎in 2人mā無thang kéng，隨時to̍h應好。雉雞姊oa̍t頭叫走桌--ê來，吩咐講：「順祥--ā，Chit 2 ê人ùi今á日開始，ài tī咱chia做工tú siàu，你chhōa in去長工房kā行李hē--leh，有siáⁿ ē-tàng吩咐in做--ê，to̍h叫in去做，三頓kah咱ê脚手做夥食，其他ê tāi-chì交hō͘你phah派to̍h好。」自án-ne，A郎in 2人soah無張持變做做工á人。 酒樓生理ka-ia̍h，in 2人ài一直無閒到半暝chiah有thang歇睏，睏是tī長工房，土脚蓆á chhu--leh to̍h thèng-hó睏，2人準備beh睏ê時，A明講：「主公，m̄知tī chia做khang-khòe hiah thiám，外口人客歡喜teh用酒菜，咱tī內底piàⁿ kah汗流sám滴，chông起chông落，1時mā無thang停睏！」A郎應講：「有影，chín chiah知影外口ê人客ē-tàng hiah享受，lóng是ài有後場hiah chē人認真phah拚tàu支援，chiah有才調提供hiah好ê服務，in貴是貴tio̍h有道理，kan-na脚手to̍h chhiàⁿ kah hiah chē--ā，tio̍h--無？」A明koh應：「咱chiah phah拚，lóng是為tio̍h天下萬民lah！」「M̄是！咱是lak袋á袋磅子，去hông吊猴！」A郎無ka thuh臭心內實在bē爽快。 To̍h án-ne，in 2 ê人sòa--落-來ê 5 kang做人ê雜差á，破柴擔水，添柴顧火，洗菜切料，phâng菜款桌面，便nā順祥交帶，in to̍h做，脚手mé-lia̍h無拖砂，透早piàⁿ kah透暗。 第5 kang暗時，siōng尾1桌人客kiat-siàu了後，雉雞姊kā in 2 ê叫去伊ê辦公廳，好禮á請in坐--leh，泡茶請in lim，講：「Chit 5 kang，lín ê表現我lóng看在眼內，順祥mā o-ló lín真骨力，好chhe-kah，是好kha-siàu，我當初無看m̄ tio̍h，lín真正是古意人，我有leh想kóng beh留lín 2 ê落來做長工，khang-khòe ê內容咱ē-tàng ta̍uh-ta̍uh-á參詳，m̄知lín kám有意願留--落-來？」A明sûi應講：「我kah主公是為tio̍h天下萬民teh phah拚，gún koh有要緊ê tāi-chì ài做，你kám知影nā beh hō͘ ta̍k人lóng好gia̍h，lóng有飯thang食，頭起先to̍h ài…」Chit時A郎知影A明ê症頭koh beh giâ--起-來，趕緊插話，kā beh去南島phah歹人ê tāi-chì詳細講hō͘雉雞姊聽，便nā tú-tio̍h聽無清楚ê所在，雉雞姊koh ē繼續問kah lóng-chóng了解，對A郎in ê故事真有趣味ê款。3 ê人講kah心花tng開ê時，A郎mā kā厝--ni̍h chah--來ê chu̍t米丸á the̍h出來請雉雞姊食，雉雞姊食--tio̍h，o-ló kah ē tak舌，講：「無食m̄知影，食--tio̍h chiah知chán，kám ē-tàng kā goán教beh án-chóaⁿ做，che絕對ē-tàng當做鳳凰酒樓ê特產來賣！」A郎應講：「有四種口味ŏ͘！」A郎mā知影雉雞姊對in bē-bái，無kā in送官府，koh hō͘ in有機會thang做工還siàu，人kah人lóng ài互相，好來好去，to̍h kā做法詳細講hō͘雉雞知，mā無藏步，鋩鋩角角lóng詳細交帶。雉雞mā kā做法1步1步詳細抄--落-來，聽無真--ê koh斟酌問，筆記做好，叫順祥來，吩咐chit 2 kang叫總舖師照筆記做看māi，nā順sī，to̍h當做新產品鼓舞人客來交關。Koh kā A郎講，nā新產品pháng ē行，顧問費絕對bē chhìn-chhái。Hit暝3 ê人káng kah真投機，一直到真òaⁿ chiah soah鼓歇睏。 隔轉kang，A郎in早頓食了tng leh款行李準備beh起行ê時，雉雞姊來chhōe--in，面á素素mā無點胭脂，穿--ê mā m̄是in慣勢看--tio̍h ê hit niá khóng色洋裝，換做穿1領白色ê kah-á kah笑青色ê長褲，A明感覺奇怪，問講：「雉雞姊，你nah ē穿án-ne？Kám是今á日歇睏無beh顧店？」雉雞姊應講：「Chăng hâm lín 2 ê講話講kah kài投機，mā感覺lín beh做ê tāi-chì kài有意義，我決定beh chham lín做夥去！」A郎問講：「Án-ne你店beh án-chóaⁿ？」應講：「順祥tī chia做kài久--ah，人頂真koh老實，店交hō͘伊hōaⁿ應當是無siáⁿ問題。」A郎滾sńg笑講：「Án-ne hit kóa為tio̍h beh來看--你，ta̍k遍 --入-來lóng kan-na叫1項菜ê老主顧一定ē kài失望。」雉雞姊應講：「In lóng是好人客--lah，lóng kài斯文kài紳士，而且goán chiah-nī用心煮食，款待人客，相信in ē繼續來捧場chiah tio̍h。行lah！咱做陣去灶脚款kóa食mi̍h，thang tī路--ni̍h食。」 3 ê人去到灶脚，雉雞姊吩咐東吩咐西，che a̍h beh the̍h，he a̍h to̍h chah，路尾3 ê人ê行李soah變kah kui大堆，A郎kah A明有建議講mài chah hiah chē，雉雞姊真堅持，講：「Goán查某--ê無chhiūⁿ lín查埔--ê hiah chhìn-chhái，goán做tāi-chì khah幼路，本底出門to̍h ài chhoân khah chē mi̍h-kiāⁿ。」Koh kā in 2 ê查埔--ê拜托kiam ko͘-chiâⁿ。2 ê少年家nah ē kham-tit美女án-ne拜托kiam sai-nai，尾--á 2 ê人lóng ke tàu phāiⁿ chin chē mi̍h-kiāⁿ，mā為tio̍h án-ne ke舞kui半po͘，一直到中晝食飽，3 ê人chiah出發，大包細包tùi大路繼續行--落-去。 -- Hosting provided by SoundOn