【阿郎台語廣播劇】EP. 10 全員集合！目標南島，啟航！｜EP. 10 成員總到位！目標南島，出帆！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 瘦猴koh oat轉去交椅坐，kā 3人講：「真失禮，臨時有狀況，免掛意，咱tú-chiah講到tó位？」Chit-chūn A明ê嘴phóe tī瘦猴離開交椅ê時，已經hō͘ A鳳liàm kah紅kòng-kòng，知影bē-tàng koh ke講話，tiām-tiām lóng無出聲。A郎chiū kā beh去南島phah歹人ê tāi-chì詳細講hō͘瘦猴聽。瘦猴ná聽ná泡茶sio請，A郎mā kā chu̍t米丸á the̍h出來做tām-sám，瘦猴食tio̍h kài kah意，o-ló kah ē tak舌，食tio̍h好mi̍h心花開，tāi-chì to̍h好處理，koh問A郎 in ài去到tó位chiah有thang買。A鳳應講：「鳳凰酒樓已經有teh試做試賣，凡勢koh再來mā ē chhui-sak到港都chit pêng。」瘦猴真歡喜，講：「我感覺3位beh做ê tāi-chì kài有意義，船ê tāi-chì，我ē-tàng tàu sio-thīn，我mā有teh做進出口ê生理，南島chit條線nā phah ē通，凡勢mā有新ê買賣thang做。Chit-má mā beh暗á--ah，咱換所在，暗頓hō͘我請，咱koh繼續káng。」 就án-ne，4 ê人離開公司，瘦猴chhōa頭，無jōa久to̍h行到1間飯店，瘦猴直直行khì櫃台，掌櫃--ê看--tio̍h sûi來招呼，「瘦猴董--ê，歡迎歡迎，chhōa人客來食飯hōⁿ？」「Hèⁿ，goán先去包廂，酒菜hō͘你發落to̍h好。」應講：「無問題，sûi處理。」瘦猴to̍h直接chhōa A郎in 3 ê人去包廂坐，坐好勢了後無jōa久，2 ê走桌--ê to̍h入來包廂內款碗tī，倒燒茶伺候，脚手mé掠koh有禮數，khang-khòe做soah to̍h離開，koh過無jōa久，酒菜to̍h 1 chhut 1 chhut phâng chiūⁿ桌，服務kah真周至。瘦猴笑笑講：「我不時來交關，是in ê大主顧，in bē hō͘我làu-khùi--lah，來，ta̍k ê酒菜盡量ēng，mài細jī。」To̍h án-ne，4 ê人也講beh去南島ê tāi-chì，mā話旅途心適ê見聞，氣氛chiâⁿ好。瘦猴講beh出海ài等2 kang，船是有，m̄-koh beh出海有真chē li-lí-khok-khok ê tāi-chì ài準備，叫A郎3人先tī港都觀光chhit-thô。A鳳講：「既然ài tī港都ke tòa 2日，我tī路--ni̍h phah tio̍h 1隻鹿á，角chiâⁿ súi，m̄知瘦猴董--ê kám有se̍k-sāi ê sai-hū，我想beh刻1枝鹿角hun吹。」瘦猴應講：「Sió-khóa-á tāi-chì！明á日to̍h叫德--á chhōa lín去。M̄-koh講tio̍h hun吹，我少年時球隊ê教練mā不時kā 1枝hun吹，ah，真懷念neh。」A鳳--ā想tio̍h瘦猴公司khǹg kài chē bat-tah hâm手套，心內想講「Kám ē hiah拄好？」問瘦猴：「你khah早phah siáⁿ-mih球？」瘦猴應講：「野球ā，goán hit chūn比賽koh bat the̍h過頭名 leh。」A鳳應講：「Ăi！Koh有影hiah tú好，你kám是清華？」瘦猴chhoah 1 tiô：「你nah ē知？」A鳳應講：「我tú看tio̍h你to̍h感覺你se̍k-sāi-bīn se̍k-sāi-bīn，put-kò你ê穿插打扮lóng hâm少年時差siuⁿ chē--ā，頭mo͘變1款，面koh ke 1 khî，我一時mā無法度kā你kah清華tàu--起-來。你kám知影我是siáng？」瘦猴kā烏仁目鏡pak--落-來，lia̍h A鳳真真siòng，siòng 1 chām-á了，chiah開嘴問講：「Ĕ？你kám是雉雞？」A鳳應講：「Tio̍h，我to̍h是雉雞。Aih，hit年熱天，第九局我hit球hiah完美，你án-chóaⁿ有才調phah--tio̍h？你kám知影我為tio̍h hit球練jōa久？你實在有夠gâu！」瘦猴應講：「Ioh--tio̍h。」「Hăⁿ？」瘦猴繼續koh講：「To̍h是你投球siuⁿ完美，球teh走ê球路lóng sio-siâng，最後hit球beh決輸贏，我ioh你ē投你siāng有把握ê球路，bat-tah to̍h tùi球ē經過ê所在大力but--出-去，無疑悟去hō͘我chhàu--tio̍h，che完全是運氣，m̄是我ê實力，hit球ê速度siuⁿ緊，我根本to看bē清楚！」A鳳聽--tio̍h了後，無奈bún笑：「Siuⁿ完美soah顛倒敗害…，命--lah！」M̄-koh A鳳心內粒積真久ê m̄甘願，tī chit時soah親像杯á內ê冰角kāng款，iûⁿ kah無影無jiah。A鳳kah瘦猴in 2 ê kāng故鄉，koh lóng有phah野球ê經驗，2人sio認了後，講話koh jú投機，4 ê人chiū án-ne一直開講到飯店beh收--a koh講無siáⁿ ē夠khùi，put-kò時間chn̂g-jiân to̍h已經真òaⁿ，4 ê人chiah無kài情願án-ne轉去歇睏。 隔轉kang，德--á真早to̍h來客店等A郎in，等kah A郎in 3人款好勢，to̍h chhōa in四界去。好sńg--ê，好食--ê，趣味--ê ta̍k項to有，行到tó位to有1 pha故事thang聽，koh講kah真心適，根本to親像phuh-lo͘h ê導遊。A郎o-ló德--á gâu講話，嘴súi真好。德--á應講：「自細漢to̍h tī街--ni̍h討食，嘴súi nā bái，khah歹過日。」Leh講ê時笑笑--ah，kán-ná teh講別人ê tāi-chì kāng款。A郎hiông-hiông soah m̄知ài án-chóaⁿ應，chŏaⁿ頭lê-lê繼續行，iáu koh好，過無jōa久4 ê人iû-koh行到beh停脚ê所在，德--á to̍h繼續紹介chit jiah ê故事。Chit kang一直到A郎in 3人sńg kah thiám--ah，chiah轉去客店歇睏。Koh隔轉kang mā kāng款是德--á來chhōa路招待，hit日觀光beh結束ê時，德--á吩咐3 ê人明á-chái早起食飽to̍h beh出海，行李to̍h先款ho͘好勢，伊早早to̍h ē來客店chhōa in去坐船。 隔轉kang A郎in 3人真早to̍h精神，行李款便便，早頓mā食--ah，坐tī客店大廳teh等德--á來chhōa路。無jōa久，德--á mā到位，4 ê人to̍h án-ne tùi港口行--去。行到港邊，瘦猴kah水泉伯--á已經tī船邊teh等，船á是木造phâng船，中範中範m̄是kài大隻，有1 kóa水手kah碼頭工人行出行入teh款beh chiūⁿ船ê chia̍h-mi̍h，用品，貨mi̍h等等ê物件，無閒chhì-chhà。A郎in 4 ê人mā行去kah瘦猴khiā做tīn開講。相借問了後，瘦猴講：「Chit位是水泉伯--á，lín進前bat見過面--ā，伊是船長，lín有siáⁿ m̄-bat--ê ē-tàng請教--伊。」。A郎in 3人驚1 tiô，本底lóng lia̍h-chún水泉伯--á是1 ê好心ê老大人niâ，無想tio̍h講伊竟然是船長chiah厲害ê脚siàu。水泉伯--á開嘴講：「A鳳，你hō͘--我ê hun絲bē-bái食，內行--ê，我khah等--leh nā有閒，mā the̍h kóa我ka-tī teh用--ê分你食看māi--leh。」講soah，to̍h先chiūⁿ船監督。A郎in 1 tīn人koh káng無jōa久，工人已經無閒soah。水泉伯--á tī船頂喝講：「董--ê，款好勢--ah。」Chit時瘦猴講：「德--á，我出海ê時，公司ê tāi-chì to̍h hō͘你發落phah派，凡事to̍h細jī。」德--á應好。瘦猴koh講：「Án-ne各位，請chiūⁿ船，咱beh出海--ah。」講soah ka-tī mā chiūⁿ船，Chit時A郎3人kāng聲講：「Ĕ，你mā beh去！？」。瘦猴大聲笑，講：「Chiah趣味ê tāi-chì，我nah ē-tàng tòe無tio̍h tīn？何hóng beh開發新市場，我ka-tī去siōng放心lah！」 -- Hosting provided by SoundOn