【阿郎台語廣播劇】EP. 11 虎豹兄弟！我看我們已經找到壞人了！｜EP. 11 虎豹兄弟！我看咱已經chhōe tio̍h歹人--ā！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 4 ê人chiūⁿ船了後，水泉伯--á kā人數siàu soah，大聲喝：「Tháu索！」碼頭邊ê工人sûi kā縛船ê大索tháu--開，2 ê水手脚手mé-lia̍h kā大索giú chiūⁿ船，款整齊了後sûi喝1聲「好！」水泉伯--á聽tio̍h聲koh喝：「起錠！」另外2 ê水手kāng款出力chhui，款好koh喝：「好！」Chit時船lê聲mā tòe leh響起。水泉伯--á koh喝：「Kò船。」Kúi-nā ê水手to̍h開始出力kò，船to̍h án-ne ta̍uh-ta̍uh-á離開碼頭，等到已經kò出港口，水泉伯--á koh喝：「起phâng！」負責ê水手sûi動作，siŭ--1-ē ê時間，phâng已經放好勢，kāng款喝1聲：「好！」今á日風透，phâng sûi食tio̍h風，船速jú chhui jú緊。水泉伯--á koh喝：「Tāi-kong，目標南島，出發！」喝了水泉伯--á to̍h開始唱歌：「八月十五hit 1 kang，船beh離開琉球港…。」歌聲滄桑實在kài好聽。瘦猴解說講，che是南洋ê流行歌，行船ê人講便nā beh出phâng，to̍h ài唱歌hō͘海神聽，海神nā心花開to̍h ē保庇行船平安，順風順phâng。Chit-lō tāi-chì，頭起先凡勢是teh講笑，久--來，jú來jú chē人beh出海mā lóng tòe leh唱，soah變慣勢，橫直歌好聽，加唱mā無敗害。A鳳kah A郎真有趣味，mā去請教水泉伯--á án-chóaⁿ唱，A明--leh，出海無jōa久to̍h hîn船hîn kah beh-sí-tōng-hāiⁿ，tó tī mn̂g床peh bē --起-來。 船beh駛到南島ài 3日ê久，A明一直hîn船，倒kui kang--ê，A郎kah A鳳是m̄-bat出過海，ta̍k hāng to hòⁿ玄，四界chhōe人問東問西，mā chhiāⁿ-chhiāⁿ去chhōe瘦猴開講，尤其是A鳳kah瘦猴in 2 ê kāng鄉，不時mā做夥teh話故鄉kah野球ê tāi-chì。瘦猴有chah bat-tah來，閒閒無tāi-chì to̍h teh練kòng球ê姿勢，講是船ē hián，對練腰kah脚腿真有幫贊。 Tī第4 kang chái起，水手喝講看tio̍h海鳥teh飛，南島beh到--ah，果然船koh行半晡，to̍h看tio̍h南島。進前tī船頂ê時，A郎in已經參詳好，A郎，A明，A鳳，瘦猴4 ê人做頭前落船，先去探聽，水手kah船長眾人留tī船頂顧船，萬不二phah輸beh走koh有退路。 A郎in 4 ê人落船，順路行無jōa久to̍h行到1 ê庄社，遠遠庄--ni̍h ê人to̍h看tio̍h A郎in，m̄-koh lóng sûi走轉去厝--ni̍h bih，門chhòaⁿ kah ân-ân。4 ê人心內奇怪，put-kò想beh問ho͘清楚mā chhōe無人。Chit-chūn A鳳講：「咱koh繼續行看māi--leh，凡勢chhōe有人thang問ho͘斟酌。」暫時mā無khah好ê法度，4 ê人to̍h繼續gōng-gōng-á行，koh行--1-tè-á，行到1塊khàng地á，看--起-來是chit庄teh集會ê所在，tú好有4 ê gín-á tī hia teh sńg。 瘦猴看tio̍h有人，趕緊走去beh問話，4 ê gín-á看tio̍h瘦猴行óa--過，lóng開始háu，beh走去bih，tú好1 ê gín-á poa̍h--倒，走bē赴，瘦猴行去hit ê gín-á邊--á，講：「Gín-á兄，你有要緊--無？A叔m̄是歹人。」Gín-á看tio̍h瘦猴ê面，tò目hia 1 khî長長到嘴角，頭毛khiû-khiû ná佛祖，笑--起-來比無笑koh khah恐怖，驚kah to強beh破膽，jú háu jú大聲。Chit時3 ê bih--起-來ê gín-á koh走--出-來，khiā tī離瘦猴遠遠ê所在喝hiu：「Mài欺負goán朋友--lah！」「Kā goán朋友放--走-lah！」「伊lóng無洗seng-khu，chiok臭，無好食，你mài ka食！」瘦猴喝講：「我食飯，無食人，我m̄是歹人--lah！」Gín-á 聽tio̍h朋友講ka-tī chiok臭，koh哭kah jú慘。Chit 4 ê gín-á lóng無beh聽瘦猴解說，罵--ê繼續罵，háu--ê繼續háu。Chit時A明nauh講，「害--ā害--ā，lín看瘦猴ê表情，伊kám是kiōng beh哭--出-來-ah，目屎含目墘án-ne，無無無，斟酌ka看，伊目屎已經流--落-來-ah neh，咱kám beh緊去ka救？」A郎mā細細聲á講：「He gín-á有夠gâu罵，1人1句罵bē停，看--起-來瘦猴已經受tio̍h真大ê心理創傷，chit-má已經跪leh雙手thuh土脚，頭鉤鉤teh háu--ah。」 3 ê人tng teh為難ê時，hiông-hiông聽tio̍h「Pn̆g-ǹg，Pn̆g-ǹg，Pn̆g-ǹg」ê聲，poa̍h--倒ê gín-á聽--tio̍h，m̄知tó位來ê勇氣，peh起來走去in 3 ê gín-á伴hia，A郎in 3 ê人mā sûi óa過瘦猴邊--á。Chit時2台o͘-tó͘-bái「Pn̆g-ǹg，Pn̆g-ǹg，Pn̆g-ǹg」kā A郎in 4 ê人當做中心，直直se̍h圓kho͘-á，土粉hō͘車輪絞kah四界飛，真eng-ia，se̍h kài chē lìn了後chiah停--落-來。過1時á，eng-ia落地，A郎in chiah看ē清chit 2 ê人生做siáⁿ款。1 ê kā烏頭mo͘ loa̍h做o͘-lú-bak-kuh，1 ê kā紅頭mo͘留kah長lò-sò，放ho͘ sàm-iā-iā，2 ê lóng掛烏仁目鏡，穿烏色ê phah鐵á褲kah烏色ê皮kah-á，kah-á無紐，胸前kah腹肚lóng hiàn-hiàn。烏mo͘--ê kah-á後壁繡1隻虎，紅mo͘--ê繡1隻豹。 Chit時A明細聲á講：「看in án-ne兇kài-kài，我看咱已經chhōe tio̍h歹人--ā。」A郎應講：「是熊是虎咱koh m̄知影，先問看māi--leh chiah phah算。」A郎tú想beh開嘴問話，烏mo͘--ê先出聲：「Lín chia外地á koh來teh蹧躂gín-á大細，膏膏纏，亂bē soah！」瘦猴大聲應講：「我siáⁿ lóng無做neh！」紅mo͘--ê笑笑á講：「Kā in chia ê害á phah ho͘ m̄敢來chiah講，免hâm in囉嗦lah！」A郎講：「Goán是beh來phah歹人，解救南島--ê！」紅mo͘--ê kài-sêng jú聽jú愛笑án-ne，笑笑應講：「Tio̍h！Tio̍h！Tio̍h！Goán to̍h是歹人！話免ke講，beh phah緊來！」雙手互相去tēⁿ另外1手ê拳頭bú，tēⁿ kah khia̍k-khia̍k叫，人iân-lō͘ ta̍uh-ta̍uh-á行--過-來。烏mo͘--ê看紅mo͘--ê tín動，人mā落車，ām-kún-á雙pêng choāiⁿ-choāiⁿ--leh，「khiăk，khiăk」2聲，mā tòe leh行--過-來。瘦猴看tio̍h烏mo͘--ê行--來，滿腹委屈無tè tháu，mā bē-giàn koh思考，bat-tah gia̍h leh拖土mā對烏mo͘--ê行--去，不時bat-tah nā lòng tio̍h石頭to̍h「khong」1聲，he表情看--起-來已經怨恨kah失理智，kan-na想beh相phah tháu-khùi。A鳳看對方已經無beh參詳--ā，kā A郎kah A明講：「Lín先退後，看範勢siáⁿ款，紅mo͘--ê我來處理！」Hun吹poe̍h--出-來mā對紅mo͘--ê行--去。 -- Hosting provided by SoundOn