【阿郎台語廣播劇】EP. 13 精彩結局！我還想再來一趟精彩的旅行！｜EP.13 精彩結局！我想欲koh來1 chōa精彩ê旅行！｜白話字(pe̍h-ōe-jī)字幕

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 進--à燒酒ná sip，ná kā tāi-chì拆分明。當時á tāi-chì是án-ne，南島ê人生成kài善良，mā真熱情hòⁿ客，真好鬥陣。問題是南島附近有1 ê lah-sap國，hit國ê lah-sap人不時nā來到島--ni̍h，看南島ê人古意，to̍h beh kâng拐beh kâng騙，beh偷也beh搶，無所不至，lóng m̄ kah人講道理，項項beh phiⁿ，siáⁿ-mi̍h to̍h beh佔贏。到尾南島ê人擋bē-tiâu，無ài koh hō͘ hia ê lah-sap人來，nā是偷走--來to̍h phah kah in叫m̄敢。Lah-sap人m̄甘願，soah四界去放風聲，做賊--ê喝lia̍h賊，講南島出現大歹人，人人過kah真淒慘。註死koh去hō͘ A郎聽--tio̍h，少年lâng khah chhóng-pōng，聽tio̍h che不仁不義ê tāi-chì，人to̍h chih-chài bē tiâu，堅心beh離鄉phah歹人，解救南島。 誤會tháu--開了後，A郎面紅紅，有夠歹勢，當場to̍h kā在場所有ê人會失禮。進--à應講：「無要緊--lah！Koh看tio̍h你，我是真歡喜，hit時ê gín-á-phí，chit-má已經生kah chiah將才，你to̍h kā失敗當做是好經驗，以後凡事to̍h khah斟酌--leh。Ta̍k ê mā lóng是án-ne chiâⁿ人--ê。」A明講：「我nā無tn̄g tio̍h主公，凡勢早to̍h iau死tī路邊--a。」A鳳安慰講：「Hâm lín出來旅行，真心適，koh tn̄g tio̍h gín-á時phah球ê好對手，行chit chōa真ta̍t--lah！」瘦猴mā應講：「Hâm lín se̍k-sāi真歡喜，講話mā kài投機，chit chōa來南島凡勢koh有bē少生理thang講，A郎你mài想siuⁿ chē--lah！」紅mo͘ ê A豹puh 1句講：「我是phah kah真歡喜，等--leh食飽看koh有人beh kah我phah--1-tiûⁿ-無？」A虎應講：「好--ah-lah，你che sio-phah雞á無sio-phah是ē死hiⁿh？」A豹koh應講：「Nā無sio-phah，我ê靈魂ē一直tī我ê耳空邊nauh，nauh講靈魂ê溫度無夠燒，án-ne我to̍h bē青春lah！」A虎koh應講：「你講he siáng聽有lah！來來來，ta̍k-ke燒酒繼續thîn！」Hit暝，ta̍k-ke lim酒配話，講kah m̄知影thang soah，A郎mā kā所有庫存ê chu̍t米丸á lóng the̍h出來請，南島chit pêng ê朋友kāng款o-ló kah ē tak舌。尾手瘦猴ê定期船，開始載chu̍t米丸á來南島賣，差不多是1 tang後ê tāi-chì。 隔轉kang，A郎精神ê時，日頭已經pha̍k kha-chhng，頭殼mā疼kah kiông-beh死，to m̄-bat lim酒，醉過暝。進--à koh笑笑ka講，你nā酒量beh koh進步，chit-má燒酒koh繼續kiat--落-去siāng有效，A郎已經驚破膽，直直叫m̄敢。Hit時虎豹兄弟已經chhōa瘦猴去chhōe南島ê大行口chih-chiap生理ê tāi-chì，A明hâm A鳳轉去船頂，kā船長講ài tī南島ke chhiân--kúi-日-á，凡勢生理講有定，to̍h ài載貨轉去賣。Sòa--落-來kúi日，講生理--ê講生理，觀光--ê四界chhit-thô參觀，船頂ê脚手nā有閒，mā輪流落船四界lau，A郎便有機會，to̍h kah進--à做夥研究刀法，sûi人無閒。 幾日後，瘦猴生理講soah，決定先beh買南島ê糖，米，bì-luh轉去看市草如何，nā物件銷路bē-bái，貨tháu tio̍h緊，to̍h koh轉來南島買貨，A鳳chit幾kang lóng teh觀光，mā建議瘦猴nā beh載貨tio̍h ài sūn-sòa載人客來chia觀光遊覽，應該ûn-ná是bē-bái ê生理。 Beh出海hit 1 kang，南島ê好朋友lóng來相送，kan-na A豹hâm人無kâng，kōaⁿ 1 kha大kha-báng，當時á是聽瘦猴講in hia工地，lóng ē有竹雞á來teh chhōe麻煩，講伊ê靈魂teh喊喝，一定ài去sio-phah，nā無，伊ê靈魂絕對bē放伊soah。A郎in 1 tīn人chit幾kang tī南島hông熱情招待，beh離開ê時，心內ûn-ná m̄-kam m̄-kam，m̄-koh人生to̍h是án-ne，有時鬥陣有時分開，講再會了後，sûi koh期待後páiⁿ再相會，分開了後顛倒jú相思。今á日猶原tī水泉伯á響亮ê歌聲--ni̍h，beh轉去故鄉ê船，lī岸jú來jú遠。 時間ná箭teh飛，半tang siŭ--1-ē to̍h過去--ah，A郎照hit chūn tī船頂ê約束，半年了後，beh tī港都瘦猴ê公司再相會，1 chōa路行--過-來，半tang前旅行種種ê記智，koh 1項1項浮在眼前。到瘦猴hia ê時，ta̍k ê lóng已經到位，1 tīn人，kāng款chio去瘦猴慣勢ê hit間餐廳食飯開講。A鳳kāng款teh做酒樓ê生理，m̄-koh múi 1 kùi lóng ē來港都，hâm瘦猴in phah 1場野球比賽，「鳳凰酒樓」對「猛猴聯合會」，投手kah打者ê車拼，iā tio̍h是青春ê美夢kah熱情，繼續進入延長賽。鳳凰酒樓chu̍t米丸á口味jú做jú chē，已經成立分店專工teh bē丸á，kok庄社mā開始開分店，koh to̍h ài應付賣去南島ê gia̍h，辛勞jú chhiàⁿ jú chē。A明kài khiáu，是讀冊讀kah頭殼khong-khong，瘦猴留伊tī港都tàu脚手，教伊án-chóaⁿ kā冊教ê學問應用tī實務，A明真好牽教，學真緊，chit-má已經kah德--à kāng款是公司第二khám ê人物，主要是負責生理經營hit方面，認真thàn錢beh救天下萬民。A豹mā是人才，到港都無jōa久，bat-tah gia̍h--leh，1 ê人去竹圍á，kā hia ê竹雞á phah kah叫m̄敢，koh翻頭來叫伊老大，聽講是去hō͘伊靈魂ê熱度影響--tio̍h，ta̍k ê你兄我弟sio稱呼，sòa--落-來koh beh tòe A豹轉去南島對抗lah-sap國ê人。 咱故事ê主角A郎leh？其實chit-má已經是真好過日--ah，A鳳賣ê ta̍k粒丸á，lóng有hō͘ A郎顧問費，丸á生理koh ka-ia̍h，A郎已經m̄免煩惱錢ê tāi-chì，厝--ni̍h mā chhiàⁿ 1 ê長工teh kā爸母tàu做khang-khòe，有閒to̍h sī大chhōa--leh四界去遊覽，nā看tio̍h不仁不義ê tāi-chì，to̍h去tàu解決，生活無siáⁿ負擔，消遙自在。你nā有機會去問A郎，問伊chit-má siāng想beh創siáⁿ，我teh想，凡勢伊ē kā你應講：「我想beh hâm我hia ê好朋友，koh來1遍精彩ê旅行！」 -- Hosting provided by SoundOn