【阿郎台語小詞典】EP. 10-So｜白話字(pe̍h-ōe-jī)字幕

【A郎台語小詞典】 EP. 10-So 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh研究ê詞是so，chit ê so，是用手tê-á輕輕á摸--leh摸--leh ê意思，像講「Goán kiáⁿ ùi學校轉來厝ê時，講伊今á日hō͘先生o-ló，我mā tòe leh真歡喜，頭殼ka so-so--leh，o-ló伊gâu。」So頭殼是2 ê人真tah-lia̍p chiah ē有ê動作，m̄是凊彩人ê頭殼lóng beh hō͘你so，m̄-thang烏白來。 Koh 1種so，是ài雙手配合做夥so，像講「so索á」、「so圓á」、「so藥丸á」chit款--ê。So圓á hō͘我想tio̍h 1句：「在人so圓tēⁿ扁。」Chit句ê意思to̍h是隨在別人去chhiâu-chhe̍k、安排、處置án-ne。「So圓á」koh有做公親ê意思，2 pêng ê利益leh chhiâu bē pêⁿ ê時，叫第3者去調解，1 pêng退1步，hō͘ tāi-chì ē圓滿，to̍h ē-tàng講是叫第3者去「so圓á」，beh講khah簡省--ê，講叫人去「so」 mā ē-sái。 另外1款是，手面有mi̍h-kiāⁿ，beh抹去另外1 ê mi̍h-kiāⁿ頂頭，像講魚á so鹽，to̍h是手hē寡鹽，平均抹tī魚身，thang看koh來beh煎a̍h beh炒，nā有關節痠痛a̍h是肢體痛疼，mā thèng好the̍h藥洗so-so thui-thui--leh，ûn-ná加減á有應效。 -- Hosting provided by SoundOn