【阿郎台語小詞典】EP. 12-Mé｜白話字(pe̍h-ōe-jī)字幕

【A郎台語小詞典】 EP. 12-Mé 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 咱今á日做夥來研究chit字mé，tī故事內底講--tio̍h-ê是「kha-chhiú mā ke真mé」，tī chit句內底to̍h是緊，快速ê意思。咱來講1 ê例：「日頭beh落山--a，咱動作to̍h khah mé-lia̍h--leh，chhun che 1-sut-á khang-khòe-á-kiáⁿ，koh ka chhui--1-ē，siōng好是mài拖kah隔kang koh來做！」脚手mé-lia̍h相對脚手慢鈍，1 ê真緊1 ê是慢吞吞。Mé醒kah mé-lia̍h意思差不多，不過mé醒koh ke 1 ê ài注意，ài細jī，tio̍h提高警覺ê意思，像講：「E暗你ka-tī顧工寮to̍h khah mé-chhéⁿ--leh，時機bái-bái--à，新聞報講連電線to有人beh偷the̍h去賣。」 Mé koh ē-tàng the̍h來形容火，火真mé，to̍h是火真iām，真旺，炒菜to̍h用mé火chiah炒ē青翠、青leng，nā無炒--出-來ē軟sìm-sìm，歹食。Mé mā ē-tàng the̍h來講日頭真iām，話ē-tàng án-ne講「日頭kài mé neh，咱的確to̍h chhōe 1 ê所在sió hioh--1-ē，等日頭khah軟lio̍h--leh chiah繼續行，無有影ē曝--死。」 -- Hosting provided by SoundOn