【阿郎台語小詞典】EP. 13-在｜Chāi｜白話字(pe̍h-ōe-jī)字幕

【A郎台語小詞典】 EP. 13-在/Chāi 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 樹頭nā有顧ho͘在，m̄驚樹尾做風颱。Chit句俗語ta̍k ê應該lóng kài熟sāi。有在to̍h ē穩，só͘-pái咱mā有1塊詞叫做在穩，穩tak-tak--ê。今á日to̍h是beh來研究chit字在。Tī chia，在，to̍h是穩ê意思，像咱節目內底主持人所講--ê，「Kā in母語ê基礎顧ho͘在。」To̍h是beh kò͘ ho͘好，顧ho͘ ē釘根，根釘有深，樹á自然生了ē súi，大kah有khoàiⁿ。 在，koh有1種用法，是根據某人ê看法、立場來表示意見，咱用1 ê例來說明ē khah清楚：「在你看，伊chit遍成大ê台語檢定kám考ē過 ？」「我看伊平素時mā無siáⁿ leh講台語，冊買--來mā無leh hian，在我ê經驗，伊koh chiâⁿ拚--leh-lah！」 Koh 1 ê是據在、隨在ê意思，像講「在你去」、「在人想」、「在我歡喜」。 Siōng尾to̍h是hâm tī 1 ê所在ê tī kāng意思，像講人生在世，to̍h是leh講人活tī chit ê世間。「身在江湖」、「在野」、「在早」、「在地」ê在，lóng是chit ê意思，chit類ê詞講bē了，簡單講kúi-ê-á hō͘ ta̍k-ê體會--1-ē to̍h好。 -- Hosting provided by SoundOn