【阿郎台語小詞典】EP. 14-脚手｜Kha-chhiú｜白話字(pe̍h-ōe-jī)字幕

【A郎台語小詞典】 EP. 14-脚手/Kha-chhiú 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh做夥來研究--ê是「脚手」，chit ê脚手siāng基本ê意思to̍h是脚kah手，像講：「久無作穡--ah，bē慣勢，做無jōa久，脚手to̍h痠kah beh害--去。」M̄-koh一般來講，咱teh講脚手lóng是leh講伊thòaⁿ--出-來ê意思khah chē，像脚手有tàu-tīn做khang-khòe ê人ê意思，mā ē the̍h來形容做tāi-chì ê速度。 咱seng來解說人chit ê部分，脚手有可能是來做幫贊--ê，錢chhiàⁿ--ê、屬下、員工、厝邊隔壁來tàu做khang-khòe--ê，lóng總ē-tàng叫做脚手。像咱故事內底有講tio̍h「三頓kah咱ê脚手做夥食」，tī chia，脚手to̍h是leh講辛勞。 另外1種，咱ē講「脚手mé」、「好脚手」，to̍h是leh講chit ê人做tāi-chì 動作粒捷、快速，nā倒péng--ê，咱ē-tàng講伊是 「脚手慢鈍」、「脚手sô」。 脚手koh有teh講手段，步數，像講：「伊ê心機真重，m̄-koh頭殼無好，ta̍k遍beh挖窟á hông跳，lóng hông看破脚手，顛倒jú顧人怨。」 Tī leh稽考chit塊詞ê時，有chhōe tio̍h 1 kóa khah趣味ê詞，mā tī chia做夥分享hō͘各位了解：「單脚手」，to̍h是kan-na 1 ê人teh做tāi-chì niâ、「惜脚手」是leh講人kài重視ka-tī ê名聲、「鎮脚手」leh講造成人ê麻煩、「粗脚手」是leh講做粗重khang-khòe ê工人、「離脚手」leh講gín-á已經大漢，免koh pē-bú kin-tòe tī邊--á，項項照顧、「脚手賤」to̍h是講人ē偷the̍h mi̍h-kiāⁿ。咱台語內底講tio̍h脚手--ê，實在有夠chē！真趣味hōⁿ！ -- Hosting provided by SoundOn