【阿郎台語小詞典】EP. 15-沿路｜Iân-lō͘︱白話字(pe̍h-ōe-jī)字幕

【A郎台語小詞典】 EP. 15-沿路/Iân-lō͘ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh來紹介ê語詞是沿路，沿路ê意思to̍h是kui chōa路，tī路--ni̍h，咱做例來解說ta̍k ê to̍h真好理解：「早起去peh山，沿路ê風景真súi，空氣mā真好。」「旅行ê siāng尾1日，已經無預定ê行程，goán沿路nā看tio̍h siáⁿ心適ê所在，to̍h隨時停落來sńg。」頭1句to̍h是講kui路ê風景lóng真súi，第2句是tī路--ni̍h其中1 ê所在ê意思，2句ê沿路意思無siáⁿ kāng款。 沿路koh 1種意思是tâng-chê時做2件tāi-chì，凡勢chit種用法tī南部ē khah普遍，辭典mā kan-na tī王育德博士ê《台灣語常用語彙》，chiah有收tio̍h chit ê用法。我ē記chit tī gín-á時，tiāⁿ-tiāⁿ ē食飯配電視，看到尾--á，lóng看kah嘴á開開，m̄知影thang食，chit時to̍h ē去hông mē講：「M̄-thang沿路看沿路食--lah！」Piān nā hông唸，碗to̍h ài緊phâng起來pe kah kui嘴tīⁿ-tīⁿ，nā是繼續khò͘-khò͘無leh信táu，to̍h ē聽tio̍h：「你是皮leh癢hiⁿh！」Hit-chūn，我to̍h慘--ah。Ná看ná食、1面看1面食，我kán-ná khah大漢以後chiah ē-hiáu講。 -- Hosting provided by SoundOn