【阿郎台語小詞典】EP. 16-Sìm｜白話字(pe̍h-ōe-jī)字幕

【A郎台語小詞典】 EP. 16-Sìm 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日，咱beh來研究chit字sìm。Sìm一般是用來形容頂下tín-tāng ê狀況，親像咱teh行吊橋，咱ē感覺tio̍h咱脚步ka踏--lòe，橋ē先沉--落-去，koh來koh ē倒彈kàu比咱踏--lòe ê時khah koân，án-ne一直重複頂下tín-tāng，chit-lō狀況咱to̍h ē講：「行che吊橋真gâu sìm，nā行bē慣勢ê人，行tio̍h ē驚。」咱koh講1 ê例，凡勢咱mā bat看過人leh giâ神轎，he轎mā是ē有1 ê頂下頂下tín-tāng ê情形，che to̍h是sìm。 Tī A郎故事內底所講--tio̍h ê「koh用手sìm--leh sìm--leh chat輕重」，to̍h是用手面the̍h石頭輕輕á向面頂擲，ná beh離手koh ná無離手án-ne，靠hit ê石頭beh lak ùi土脚ê力，用手去感受看石頭jōa重、有合用--無。Só͘-pái，咱話mā ē-tàng án-ne講：「母--á，chit粒木瓜你sìm看有2斤--無？」「差不多斤半niâ，無kàu 2斤--lah。」你nā m̄ siàn，伊磅á to̍h ē giâ--出-來，nā ho͘磅--lòe，差不多lóng是我輸。 Siāng尾，咱來補充1塊詞，號做軟sìm-sìm，親像：「Chit間ê麻糬，軟sìm-sìm，khiū-teh-teh，連外埠頭--ê lóng ē走來買。」「嬰á ê面á軟sìm-sìm，toaiⁿ toaiⁿ án-ne，hō͘人有夠想beh chhio̍k。」掃梳gím-á mā ē-tàng用軟sìm-sìm來形容，m̄-koh nā ho͘ sut--tio̍h，實在有夠疼。 -- Hosting provided by SoundOn