【阿郎台語小詞典】EP. 18-鑿目｜Chha̍k-ba̍k｜白話字(pe̍h-ōe-jī)字幕

【A郎台語小詞典】 EP. 18-鑿目/Chha̍k-ba̍k 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh來講鑿目，khêng實鑿目chit塊詞kài趣味，目睭nā去ho͘鑿--tio̍h，咱人ê反應to̍h是目睭ē sûi kheh-kheh，去jôe目睭，nā khah嚴重--leh，sûi to̍h ài去chhōe先生。Só͘-pái chit ê鑿目實在是1 ê真活跳ê形容詞，伊是借目睭去hông鑿--tio̍h ê感覺來形容，m̄是真正鑿--tio̍h-ah。 Chit ê鑿目，ē-tàng the̍h來形容去hō͘真強ê光線chiò tio̍h目睭，目睭thí bē開ê情形，to̍h像咱tī A郎ê故事內底所講ê「日頭siuⁿ iām chiâⁿ鑿目」，to̍h ài kòa烏仁目鏡chiah ē khah爽快án-ne。 Koh 1種算是thòaⁿ--出-來ê意思，親像男女朋友，tī餐廳ná食飯ná做sán-khùi，恩恩愛愛，糖甘蜜甜，nā tú好有羅漢脚á tī hia leh食飯，in to̍h ē感覺真鑿目，目睭to̍h ē thí bē開，凡勢連目屎mā強強beh流--落-來，朋友--à，有時leh做sán-khùi mā tio̍h看所在neh。有1塊詞hō做刺鑿，ûn-ná kah chit ê鑿目真sio-siāng，m̄-koh刺鑿mā ē-tàng用tī聽人ê話聽kah無kài爽快ê情形，像講：「伊講he話，倒khau正siah，彎彎khiau-khiau，聽tio̍h實在有夠刺鑿。」 最後來補充1塊詞，叫做鑿花，to̍h是tī柴頂面雕刻花草ê意思，che chit-má ê人凡勢lóng khah bē-hiáu講--ah，像chit款詞彙，咱nā都合有tú好，to̍h加減á講，咱ê話chiah bē消失--去。 -- Hosting provided by SoundOn