【阿郎台語小詞典】EP. 20-Tū水｜Tū-chúi｜白話字(pe̍h-ōe-jī)字幕

【A郎台語小詞典】 EP. 20-Tū水/Tū-chúi 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh紹介ê語詞是tū水，頭起seng咱seng來紹介chit字tū。 Tū有that-tiâu--leh ê意思，像講「痰sàu bē --出-來，tū tī嚨喉，人to̍h去--ah。」Che to̍h是leh講，che痰害人bē喘氣soah失去性命。Koh親像「Hit日大水真恐怖，水tū到beh chi̍t chàn樓hiah koân，goán kui家夥á lóng走去2樓等水退。」Chia to̍h是leh講水淹kah真koân。Koh像講「便nā連假，車to̍h真gâu tū tī高速公路，bē-tín-bē動。」Chit句to̍h是teh形容that車that kah真嚴重。 Tū，koh有另外1 ê意思，to̍h是浸入去水--ni̍h ê意思。親像「Che菜頭，皮khau-khau--leh，切ho͘ 1角1角，thang好tū鹹。」To̍h是按算beh sīⁿ菜頭--ā。「Chit尾魚á seng lia̍h去水--ni̍h tū--leh，mî-á-chài chiah beh thâi。」To̍h是leh講，beh kā魚á暫時飼tī水--ni̍h，後手chiah koh繼續處理。 最後，咱翻頭轉來講tū水，相信ta̍k-ke已經lóng了解是siáⁿ意思，to̍h是人去hō͘水淹去，無法度喘氣án-ne，m̄-koh tū水kám一定ē死，che to無的確，凡勢有人去ka救，運氣nā好，koh有thang食kah百二，nā beh表示chit ê人是淹--死-ê，咱ē-tàng講tū--死，nā án-ne形容是khah tàu-tah。 台語ê動詞kài幼路，有人講動詞是台語siāng kài歹學ê部分，nā有機會，咱chiah koh做夥來研究。 -- Hosting provided by SoundOn