【阿郎台語小詞典】EP. 21-上｜Chiūⁿ｜白話字(pe̍h-ōe-jī)字幕

【A郎台語小詞典】 EP. 21-上/Chiūⁿ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱來beh紹介chiūⁿ chit ê動詞，chit字chiūⁿ，咱tiāⁿ-tio̍h真四常teh用，意思mā真chē，chit遍咱專門ka整理--出-來，分享hō͘ ta̍k-ê做參考。 頭起seng，tī咱故事內底講ê chiūⁿ船，to̍h是peh khí-lih船頂ê意思。Chiūⁿ車、chiūⁿ kiā、chiūⁿ樓、chiūⁿ眠床、chiūⁿ台演講，lóng是kāng款ê用法。 Chiūⁿ，mā有去1 ê所在ê意思，像講chiūⁿ街、chiūⁿ工、chiūⁿ官府等等lóng是，chiūⁿ路to̍h是講beh出發，beh起行--ah，chiūⁿ山頭一般m̄是去peh山ŏ͘，是beh kā亡者kng去山頂tâi，tùi台語iáu-bē hiah熟手ê朋友ài細jī，nā無ē去hông笑。 Koh 1種是登記、記錄ê意思，chiūⁿ賬，to̍h是ài kā siàu記入去siàu簿á--ni̍h，the̍h 1 ê例來講，「Chăng A明the̍h肥料錢來，你kám有寫--起-來？」「無neh，chăng to̍h無閒kah霧sà-sà，iáu koh好你有kā我問！」「無要緊，ē記chit ài chiūⁿ簿ŏ͘！」 Kāng款ê用法koh有chiūⁿ紙、chiūⁿ冊。 Chiūⁿ千，to̍h是超過1000，「我食chit ê頭路已經chiūⁿ 2 tang--a，m̄-koh lóng無kă調薪水，想--tio̍h to̍h怨chheh。」Án-ne，凡勢tio̍h ài去chhōe看有待遇khah好ê公司--無。Koh有1句俗語：「Chiūⁿ siap to̍h bē liap！」Mā kāng款是超過ê意思。 Chiūⁿ身是講神明、邪靈來óa tī seng-khu頂，nā是chiūⁿ童，一般是leh講神明來óa，m̄是邪靈，mā有人是講chiūⁿ乩、起童。 Chiūⁿ目是看tio̍h ē kah意，chiūⁿ手是leh講khang-khòe a̍h是技術已經ē-tàng出師，學kah真gâu--ā，掌握kah真好án-ne，chiūⁿ-kioh kah chiūⁿ手，差不多是kāng意思。M̄-koh chiūⁿ手koh有另外1種意思，to̍h是the̍h tī手--ni̍h，像講，「Mi̍h-kiāⁿ chiūⁿ手，咱beh出發--ah。」「你che尾款，to̍h等kah伊khang-khòe lóng收soah，chiah thang hō͘--伊，nā無伊錢nā chiūⁿ手，凡勢ē hō͘你jiok無人。」 -- Hosting provided by SoundOn