【阿郎台語小詞典】EP. 23-Chhek｜白話字(pe̍h-ōe-jī)字幕

【A郎台語小詞典】 EP. 23-Chhek 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh來稽考chit字chhek，其實chit字chhek咱tiāⁿ leh用ê意思有幾lo̍h ê，咱seng來解說tī故事內底所講ê「歹勢chhek人ê意」，tī故事內底是leh講人真熱情、真好意beh kā咱chio、kā咱邀請，咱歹勢講m̄，無ài拒絕án-ne。簡單講to̍h是咱無ài kâng反對。Mā ē-tàng用tī khah無kâng ê情境，比論講對方是地位比你khah koân ê人，咱nā ka反對，恐驚á對咱未來ê發展khah不利，咱mā ē-tàng講「無ài chhek伊ê意」。提供1 ê例來hō͘ ta̍k-ke參考，「Chhek tio̍h伊ê意，你以後日子to̍h歹過--ah。」 「咱chhek 1 ê時間來lim咖啡？」Che to̍h無kâng--ā，chia是chhōe、安排1 ê時間，2 ê人ài去hōe，chhiâu、調整出1 ê互相lóng ē-tàng接受ê時間。參詳tāi-chì mā ē-tàng chhek，用lē來解說khah緊：「Lín 2 ê先chhek ho͘好勢，咱chiah繼續講，無，我實在m̄知beh聽siáng ê。」坐椅á mā ē-tàng chhek，像講本底tī餐廳食飯，ta̍k-ke lóng已經坐tiāⁿ，tú好1 ê朋友koh chhōa伴來，坐位ài sió調整--1-ē，chit chūn，咱to̍h ē-tàng án-ne講：「Ta̍k-ke sió chhek--1-ē，chhiâu 2 ê位hō͘ in坐。」 最後，咱beh講chhek mā有犯tio̍h禁忌ê意思，像講chhek衰、phah chhek衰，to̍h是leh講人去做1 kóa hō͘人感覺ē衰、歹吉兆ê tāi-chì，m̄-nā是做，講--ê mā算在內。「人teh辦喜事，你mài tī hia kā我phah-chhek衰haⁿh！」Koh提供1塊詞hō͘ ta̍k-ke做參考：「你án-ne歹tāi-chì做hiah chē，lóng m̄-kiaⁿ ē chhek歲壽o͘h！」Chit ê chhek歲壽，to̍h是講壽命ē變少，m̄-koh kám有影做歹ē chhek歲壽？凡勢mā無的確--lah！新聞tiāⁿ leh報1 kóa有名ê人過身--a，咱kám m̄是tiāⁿ leh thuh臭講：「Chit kho͘ nah有才調活hiah久！」 -- Hosting provided by SoundOn