【阿郎台語小詞典】EP. 24-Thòaⁿ｜白話字(pe̍h-ōe-jī)字幕

【A郎台語小詞典】 EP. 24-Thòaⁿ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日咱beh來紹介chit字thòaⁿ，thòaⁿ ê概念to̍h是ùi 1點散--開。比論講，咱kā墨汁滴1滴tī紙面頂，墨汁ē hō͘紙suh--入-去，koh來，hit ê墨jiah to̍h ē jú tò͘ jú大jiah，一直到紙kā墨汁suh飽為止，lóng koh ē繼續變大，m̄是tú滴--落-來hiah細點，che to̍h是thòaⁿ。Nā開始thòaⁿ，to̍h是影響ê範圍ē jú來jú大，jú來jú遠。 Só͘-pái，chit字thòaⁿ，咱ē-tàng使用tī真chē所在，像講病，「伊he歹mih-á已經tùi肺部thòaⁿ去腦--ah，時間無chhun jōa chē，lín nā有siáⁿ-mih iáu-bē處理--ê，to̍h m̄-thang拖--a。」Mā有講：「Che疫情jú thòaⁿ jú嚴重，咱ta̍k-ke to̍h趕緊chhōe時間去chù預防siā，án-ne khah安心--lah。」Mā ē-tàng講植物，「Che籐á你看--tio̍h nā無緊ka bán--起-來，liam-mi to̍h thòaⁿ kah kui ê籬笆lóng是--ā！」Mā ē-tàng講火：「Che火teh thòaⁿ kài緊，ài緊去叫人來tàu phah火！」 Koh另外1種，to̍h是leh講性命產生新ê後代，che to̍h是生thòaⁿ，人生kiáⁿ，蟲thòaⁿ卵，種子puh芽，kin蕉吐kiáⁿ，lóng是thòaⁿ ê概念。咱ē-tàng講：「番薯真gâu thòaⁿ，tiâu土to̍h ē活！」咱nā beh種番薯，the̍h番薯籐，chhìn-chhái póe kóa土ka am--leh，ak水，伊to̍h ē活--ah，咱有1句俗語應該mā kài chē人bat聽--過：「番薯m̄驚落土爛，只求枝葉代代thòaⁿ。」Só͘-pái，咱主持人有講tio̍h「咱ê母語chiah ē代代thòaⁿ」，to̍h是咱ê母語ē-tàng一直活--leh，一直流傳--落-去ê意思。 -- Hosting provided by SoundOn