【阿郎台語小詞典】EP. 25-拆分明｜Thiah hun-bêng｜白話字(pe̍h-ōe-jī)字幕

【A郎台語小詞典】 EP. 25-拆分明/Thiah hun-bêng 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日beh hâm ta̍k-ke做夥來研究ê語詞是「拆分明」，chit塊詞ê意思to̍h是講ho͘清楚，講ho͘明，講hō͘別人ē-tàng了解。拆明、拆白、開拆mā是kāng意思。Kan-na孤1字mā ē-sái，「你to̍h kā tāi-chì拆hō͘伊聽，mài hō͘伊誤解，m̄-thang留1 ê屎尾，時到to̍h歹póe會。」 Sòa--lòe，咱koh繼續來講chit字拆，拆mā有liah ê意思，kā伊liah--破，liah開，「你去拆1張日誌紙來，chū tī桌á頂，thang好phùi魚刺。」Goán chêng細漢lóng講日誌，無講la̍h日。拆破面是leh講siang方面歹面sio看，m̄是真正kā面拆kah流血流滴ŏ͘。 Koh講1 ê我細漢tiāⁿ leh hông mē ê拆厝，拆厝to̍h是kui間厝拆了了，看是beh têng起a̍h是beh做其他ê用途。拆船、拆門窗、拆厝頂、拆籬笆，便nā無ài--ê lóng ē-tàng拆。Gín-á時，nā hâm goán小弟kui厝間kho̍k-kho̍k chông，phin-phin-phiang-phiang pin-pin-piàng-piàng，to̍h ē去hông mē講：「Lín是leh拆厝--o͘h！」 拆藥á，to̍h是the̍h先生開ê藥單，去藥房買藥á，拆股，to̍h是kā本底合做夥ê股份拆分開，無koh繼續合作，拆車票to̍h是去買車票，éng過ê車票是kui本--ê，你nā去ka買票，伊ē拆1張hō͘--你，時代進步，車票mā tòe leh進步，現此時ê車票，nā m̄是用印--ê to̍h是顯示tī手機á，已經無拆chit ê動作，m̄-koh買車票ûn-ná有人講拆票、拆車票、拆車單，tī chia，mā補充hō͘ ta̍k-ke了解。 -- Hosting provided by SoundOn