【阿郎台語小詞典】EP. 27-Liap｜白話字(pe̍h-ōe-jī)字幕

【A郎台語小詞典】 EP. 27-Liap 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 Liap chit ê字本身有真chē意思，今á日咱ē ta̍uh-ta̍uh-á來解說。 Seng來講節目內底有講--tio̍h ê，「Chiūⁿ siap to̍h bē liap。」Siap，是40 ê ha̍p-im，chit句話ê意思to̍h是講，cha-po͘人nā 40歲了後，尿leh緊to̍h khah忍耐bē tiâu，一定ài緊去chhōe便所。Tī chia，liap，有kiu--起-來ê意思，to̍h是講，ài出力hō͘咱ê筋肉sok ho͘ ân，án-ne chiah有法度kā屎尿忍ho͘ tiâu。簡單講to̍h是liap屎liap尿án-ne。花nā lian--去，ē kiu--去，咱mā ē-tàng講花liap pó͘。 第2種，是有皺紋ê意思，親像面liap-liap，目睭皮liap-kéng。Mā ē-tàng用tī衫á褲ê裁縫方面，像講囡á時有ê人ê學生褲，ē去hō͘裁縫師傅做，差不多lóng ē liap-kéng，chit ê liap-kéng，to̍h是kā布áu ho͘ 1-chōa-1-chōa sio-tha̍h，koh ka thīⁿ--起-來，to̍h ē有khah phāⁿ ê花痕，m̄-koh訓導--ê，to̍h ē khah chhiāⁿ邀請伊去辦公廳開講。 Koh 有1種是hông勾--去，hông lia̍h--去ê意思，親像講，神魂khì hō͘妖精liap--去，hō͘鬼hō͘魔神á liap--去án-ne。 Koh來，「講tio̍h錢to̍h liap--去。」是leh khau洗hit ê人凍霜，聽tio̍h ài出錢to̍h kiu--去án-ne。台日大辭典有收1塊詞，hō做「liap屎鬼」，mā是teh keng體人真鹹，鹹koh澀，真凍霜，真有趣味，che mā the̍h來hâm各位朋友分享。 最後beh介紹--ê，是烏白生話ê意思，明明to̍h無，硬beh講kah有，白白布硬beh ka染kah烏。咱話ē-tàng án-ne講，「無影無jiah ê話mài烏白liap。」 -- Hosting provided by SoundOn