【阿郎台語小詞典】EP. 29-Kā、Kah｜白話字(pe̍h-ōe-jī)字幕

【A郎台語小詞典】 EP. 29-Kā、Kah 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 今á日beh hâm ta̍k-ke來討論chit ê kā hâm kah，chit 2 ê字chêng我開始學台文了後，發現真chē朋友lóng舞bē清楚，霧sà-sà。我5年進前bat tī社交媒體頂面，分享過我所整理ê資料，到taⁿ mā是koh真chē朋友ē挖he舊文出來看，想想--leh，chit-má tng teh做ê節目有聲音，koh藉chit ê都合來分析看māi--leh，凡勢ē對iáu bē hiah清楚ê朋友，加減á有幫贊。 頭起先，咱先來講kā，chit ê kā，to̍h是「單方面」，對mi̍h-kiāⁿ a̍h是人去做1 ê動作，像講，kā伊phah，kā mi̍h-kiāⁿ khǹg--leh，kā ê對象，是咱tú-chiah所講ê「伊」hâm「mi̍h-kiāⁿ」，in 2 ê是被動ê角色。 Kah to̍h無kâng，親像我kah伊講話，to̍h是2 ê人「雙方面」lóng有leh講話，我kah伊sio-phah，to̍h是我phah--伊，伊mā phah--我，che是互相--ê，咱chiah ē用kah。 咱kám ē-sái講我kā伊開講？Bē-sái！因為開講是2 ê人互相teh對話，nā kan-na 1 ê人teh講，he to̍h親像leh kâng教示án-ne，to̍h m̄是開講--ah。 Chhiāⁿ-chhiāⁿ ē聽tio̍h人leh講「我kah你講」，che一般來講lóng是m̄ tio̍h--ê，èng該是「我kā你講」，是我有tāi-chì beh講hō͘你聽，nā講做我kah你講，ē變做對方有話beh講，我chit-má beh聽伊講，koh來我mā ē回應，beh互相討論tāi-chì án-ne。 另外koh用1 ê例來做比較，「你去kā伊講」，to̍h是你ài去講hō͘伊知影ê意思，「你去kah伊講」，to̍h有你ài去chhōe伊參詳ê意思，só͘-pái差1字，咱leh聽ê意思to̍h ē完全無kâng。 以上是kah hâm kā 2 ê字意思ê精差，另外咱mā ē-tàng ùi咱講話ê聲音來分析，「kā」一般講話ē講去第3調a̍h是第7調，「我kā³你講」、「我kā⁷你講」，chit 2種lóng有人leh講，「kah」一般咱講話ê時，ē講tī第1 a̍h是第2調，親像「我kah¹你講」、「我kah²你講」án-ne。 Chit遍咱ùi意思kah語音，來討論chit 2字無kâng ê所在，ǹg望咱ê聽眾朋友bē koh花kô-kô kiam sa無cháng。 -- Hosting provided by SoundOn