【阿郎台語小詞典】EP. 30-Lia̍h橫︱Lia̍h-hoâiⁿ｜白話字(pe̍h-ōe-jī)字幕

【A郎台語小詞典】 EP. 30-Lia̍h橫/Lia̍h-hoâiⁿ 訂閱做工á人Youtube頻道：https://www.youtube.com/@chokangalang 完整ê漢羅／POJ對照文稿khǹg ti官方網站：https://cho-kang-a-lang.github.io/ 【漢羅版】 咱今á日beh來講lia̍h橫，tī chia chit ê lia̍h是beh kā mi̍h-kiāⁿ控制、保持tī 1 ê固定ê狀況，tī故事內底，kā竹篙lia̍h橫，thang hâm插直直ê竹篙pa̍k做夥，thang pha̍k魚干。Nā講心肝lia̍h坦橫，to̍h是無beh照平常時ê理路teh行--ā，beh chhân-chhân ka做--lòe án-ne。 其實chit ê lia̍h，tī咱台語內底，ûn-ná有真chē意思ŏ͘，像講lia̍h魚lia̍h蝦thang好賣，a̍h是講ē-tàng食，m̄-koh nā lia̍h猴、lia̍h龍to̍h m̄是頭前hit種意思--à，m̄-thang sa leh烏白tàu。 Lia̍h mā thèng好講是beh去買精牲á，像講：「E暗有要緊ê人客beh來，你to̍h趕緊去市á lia̍h 1 chiah雞轉來thâi。」 Lia̍h mā有計算ê意思，像講lia̍h siàu。Koh做1 ê例來hō͘ ta̍k-ke參考看māi--leh：「Chit間ê厝頂ài têng hoan，你seng tàu lia̍h看ài jōa久chiah做ē了，另外1主ûn-ná teh kă chhui進度！」 Lia̍h我金金siòng，to̍h是講對我直直看，lia̍h我做尪á-mi̍h，to̍h是kā我當做是chhit-thô-mih-á án-ne對待，最後紹介1 ê khah新ê用法，咱chit-má nā tī網路頂beh chhōe資料，beh táng-ló͘，mā是lóng講用lia̍h--ê，台語nā一直有teh使用，to̍h ē創造出新ê用法，詞彙自然ē tòe leh增加。 -- Hosting provided by SoundOn