A tarde 23-04-2026

No Día do Libro pedímoslles aos nosos oíntes que nos recomenden unha lectura; falamos con Ismael Ramos, flamante gañador do premio O. Henry de relato curto; e coñecemos con Xermán Torres, a Asociación Mesa das Verbas de Vilagarcía. No programa abordamos o problema da falta de relevo xeracional no campo galego en conversa con José Manuel Rus, coordinador da Mostra de Exposición de Muimenta. Coñecemos o traballo que desenvolve José Antonio Ferreiro en Finca Villadangos, un referente na cría da vaca rubia galega. María José Agrafojo, profesora no CEIP Abanqueiro de Boiro, dinos como foi a súa participación no proxecto Incluídas, que fomenta os intercambios internacionais para achegar ao profesorado boas prácticas de educación inclusiva. Na Coruña a presidenta da asociación de veciños dos Mallos, Ana Fernández, descríbenos o problema que teñen coa proliferación de pombas no barrio. Falamos da iniciativa solidaria posta en marcha pola comunidade peruana en Vigo para axudar unha compatriota que resultou ferida de gravidade nun atropelo. No capítulo musical Marcos Parajó preséntanos o cartel do Cruceiro Fest e Tito Lesende infórmanos sobre as novidades galegas. Ademais, volve o consultorio de Nusca Chousa.